Fuad Poladovun həyata keçməyən arzusu – 70 ilin xatirələri

Əməkdar artist Mehriban Zəki Fuad Poladovun cəsarətli insan olduğunu deyib: “O, çox təmkinli, səbirli adam idi. Kiminsə haqqında nəsə deməyi, danışmağı, fikir yürütməyi sevməzdi. Amma bir dəfə səfərlərimizin birində mənim haqqımda sağlıq dedi. O zaman mən anladım ki, Fuadın mənim lə bağlı ifadə etdiyi söz içindəki sözdür, özü haqqında bu sözü deyir. Dedi ki, aktyor var sənətə şan -şöhrət naminə gəlir, aktyor var gəlib rolunu oynayır, sonra da itib batıb çıxıb gedir, aktyor da var ki, sənətinin fəhləsidir. İllər boyu yorulmadan, nə qazanacağını düşünmədən hər zaman sənətinə fəhlə kimi xidmət edir.

Fuad 70 yaşı haqlamasına baxmayaraq, son dönəmlərinə qədər rol təklifi alanda uşaq kimi sevinərdi. Ona verilən rolun üzərində şövqlə, böyük sevgi ilə işləyirdi. Heç nədən qorxmaz, çəkinməz adam idi”.

Əməkdar artist Fuad Poldaovla Omsk şəhərinə səfərini yada salıb: “Bir dəfə aktyorlarla birlikdə Omsk şəhərinə getmişdik. Orada restorana daxil olarkən qarşımıza başqa mədəniyyət sahibi olan sibirin gədələri çıxdı. Mənimlə üz-üzə gələn sibirlinin boynunda barmaq qalınlığında sep, qara dəridən gödəkcə var idi. Təsəvvür edin ki, hansı qəbildən insanla qarşılaşmışdım. Mən bir xanım olaraq gözlədim ki, o, mənə yol verəcək. Ancaq bunu etmədi. Yolu üzbəüz keçdi. Mən pərt halda dedim, bəlkə mənə keçməyə yol verəsiniz. O da “nə olub? Nə baş verib?” deyə üstümə kəkələndi. Elə bu an Fuad Poladov 3 addım arxada gəlirdi. Baş verənləri görcək həmən qarşıma keçdi. Sibirli oğlana dedi, nə baş verib? Nə olub? Sözün varsa, mənə dənən. Onun zəhmini görəndə oğlan üzr istəyib, qaçıb getdi. Hər addımında dürüst, hərəkətində dəqiq insan idi.

Sosial şəbəkədə insanlar yazırlar ki, Fuad Poladovu mənfi rollarına görə seviblər. Mən isə deyərdim ki, o, həyatda, aktyorların içində mənim üçün müsbət qəhrəman idi. Belə də yaddaşımda qalacaq”.

“Onun böyük bir arzusu vardı”

Xalq artisti Fəxrəddin Manafov həmkarının ən böyük arzusundan danışıb: “Fuad Poladovla birlikdə tamaşalarda oynamışıq, çəkilişlərdə olmuşuq. Mən hər zaman ona demişəm ki, Fuad, bu günə qədər, hətta keçmiş sovet məkanında da sənin qədər sənətinə qarşı nizam- intizamlı aktyor, sənətini sevib, bu sənətin içində şəxsiyyətini qoruyan başqa bir insan görməmişəm. Fuad Poladov yaşamı, davranışı, sənətə, insanlara münasibəti ilə təsdiq etdi ki, bu sənət qeyri-ciddi iş deyil, böyük sənətdir və şəxsiyyətli olmaq vacibdir. Fuad gözəl dost və hədsiz dərəcədə istedadlı aktyor idi. Təəssüf ki, 70 yaşını adlaya bilmədi. Onun böyük bir arzusu var idi. Anton Çexovun “Altıncı palata” pyesində oynamaq fikri var idi. Amma ölüm buna imkan vermədi”.

“Peşəkarlar olmayan bilmirəm sabah nələr olacaq?”

Aktyor İlham Namiq Kamal Fuad Poladovla birgə çəkildiyi filmi, həmin günləri xatırlayıb: “Fuad Poladov Azərbaycan teatrında, kinosunda çox mühüm yerlərdən birini tutan sənətkarlardandır. O, ağlagəlməz vaxtda dünyasını dəyişdi. 30 ilə yaxın onunla birlikdə “Azdrama”da işləmişəm. Birlikdə qastrollarda olmuşuq. Daha sonra bu il 40 illiyi tamam olacaq “Qaynana” filmində 6 aya yaxın tərəf müqabili olmuşuq. Peşəkarlıqdan söhbət gedirsə, Fuad özüllü peşakarlıqdır. Azərbaycan teatrında bu səviyyədə aktyorlar azdır. Allah qismət etsəydi, bu sözləri onun yubileyində deyərdim.

Fuad çox düzgün, ədaləti itirməyən, dostluqda möhkəm, səmimi şəxsiyyət idi. Biz get-gedə əsl sənətkarları itirirk. Azərbaycan kinosu, teatrı bu cür kasadlaşır. Peşəkarlar olmayan məmləkətdə mən bilmirəm sabah nə olar?”

“Sifətinin rəngi, gözlərinin quruluşu da dəyişirdi”

Əməkdar artist Ayşad Məmmədov sənət yoldaşının ölüm səhnələrini heyranlıqla oynadığını söyləyib:

“Bizim aramızda 6-7 il yaş fərqi var idi. Onunla vizual tanışlığım “Darıxma ana” tamaşasında olub. Tamaşada ilk görüşmüz isə Şekspirin əsərlərindən birinə “Aktyor evi”ndə hazırlanmış tamaşada baş tutub. Tamaşanın rejissoru Azərpaşa Nemətov idi. Filmdə ilk görüşmüz “Güllələnə təxirə salınır” filmində olub. Fuad orada “qanuni oğru” Xan obrazını, mən isə Yetim Paşa obrazını oynayırdım. Daha sonra “Şah Qacar” tamaşasında rol aldıq.

Fuad Poladovda məni ən çox maraqlandıran cəhət o idi ki, ölüm səhnələrini çox gözəl oynayırdı. Baxmayaraq ki, mən özüm də aktyoram, aktyor texnikasına bələdəm, amma Qacarın ölüm səhnəsində necə oynayırdısa, sifətinin rəngi, gözlərinin quruluşu da dəyişirdi. Həmişə onun sehrinə düşürdüm. Ölüm səhnəsi olmamış, artıq o ölmüş adam obrazına girirdi. Bunu “Dolu” və “Ovsunçu” filmlərində də görmək olardı. Fuad aktyordan əlavə əsl kişi kimi adam idi. Onda ziyalılıq, alicənablılıq kefiyyətləri var idi”.

Qeyd edək ki, mərhum aktyor mayın 5-də uzun sürən xəstəlikdən sonra 69 yaşında vəfat edib. Mərhumla vida mərasimi evində keçirilib. Vida mərasimindən sonra “Qurd qapısı” qəbiristanlığında torpağa tapşırılıb.