Orxan Qasımlı: “Bununla onlar özlərini monoetnik olmayan, multikultural bir ölkə kimi qələmə verməyə çalışır”
“Ancaq reallıqları gizlətmək mümkün deyil”
Əli hər yerdən üzülən Ermənistan hakimiyyəti dünyaya növbəti yalanını sırımaq istəyir. Ermənistanın haqlı tənqid olunduğu mövzulardan biri də onun monoetnik olmasıdır. Bu faktor ölkə üçün əvvəldən xarakterik olmayıb.
Ermənistanın tərkibində müxtəlif etnoslar yaşayıb. Rəsmi İrəvan çox primitiv bir vasitə ilə faktı təkzib etməyə çalışır. Ermənistan mətbuatı bir neçə aydan sonra keçiriləcək parlament seçkilərilə bağlı ölkədə yaşayan etnik azlıqların siyahısını açıqlayıb. İddiaya görə, Ermənistanda 2011-ci ildə keçirilən ən son siyahıyaalmanın nəticəsinə əsasən, etnik azlıqlar 4 millətin nümayəndələrindən təşkil olunur. Guya Ermənistanda 35308 yezidi kürd, 11911 rus, 2769 assori, 2162 kürd yaşayır.
Ermənistan bu yalanı ilə nəyi sübut etmək istəyir?
Miqrasiya üzrə mütəxəssis Orxan Qasımlı qəzetimizə açıqlamasında bildirdi ki, Ermənistanın bu cür ucuz şouya əl atması təsadüfi deyil:
“Bununla onlar özlərini monoetnik olmayan, multikultural bir ölkə kimi qələmə verməyə çalışır. Ancaq reallıqları gizlətmək mümkün deyil. Bilirsiniz ki, hətta 20-ci əsrin əvvəllərində ermənilər hazırda yaşadıqları ərazilərdə etnik azlıq olub. Oradakı əhalinin böyük əksəriyyətini biz təşkil etmişik. Yürüdülən daşnak siyasəti nəticəsində soydaşlarımız bir neçə dəfə öz ata-baba yurdlarından deportasiya edilib. Təkcə son illər ərzində 200 mindən çox azərbaycanlı oradan didərgin salınıb. Ermənistandakı dözülməz iqtisadi şərait və hakimiyyətin yürütdüyü monoetnik siyasət ölkəni yalnız çarəsiz ermənilər üçün “münbit” edib. Tam məsuliyyətilə demək olar ki, Ermənistanda etnik azlıqların nümayəndəsini mikroskopla axtarmaq olar. Bu acınacaqlı vəziyyət bütün beynəlxalq təşkilatların hesabatlarında da özünü göstərir. Ruslar deyəndə yəqin ki, onlar həmin ölkədəki rus hərbi bazalarında olanları nəzərdə tutur. Heç onların da sayı ifadə olunduğu qədər deyil. Görürsünüz ki, təqdim olunan milli azlıqların siyahısında yezidilərlə digər kürdlər ayrı təsnifatlandırılır. Ermənistanda yaşayan kürdlər müsəlman olublar. Onlar da azərbaycanlılarla birlikdə son deportasiya zamanı ölkədən çıxarılıb. Bu gün Ermənistanda bir nəfər də olsun müsəlman kürd qalmayıb. Barmaqla sayılacaq qədər yezidi ola bilər. Bir daha xatırladıram ki, rəqəmlər ölkənin imicini qaldırmaq üçün kökündən təhrif edilib. Vəziyyət bu şəkildə davam edərsə, bir neçə ildən sonra Ermənistanda heç erməni qalmayacaq, nəinki etnik azlıq”.
Məhəmmədəli QƏRİBLİ