Bu günlərdə sərsəm iddiaları ilə gündəmə gələn istefada olan erməni generalı Norat Ter-Qriqoryans indi də siyasi bəyanatlar verməklə Ermənistana “yol xəritəsi” cızmaq fikrinə düşüb.
Erməni general bildirib ki, Ermənistan Azərbaycanla heç bir danışıq aparmamalıdır: “Biz bütün danışıqları Rusiya Federasiyası ilə aparmalıyıq. Çünki onların tərəfindən 1921-ci ildə imzalanan “Qars” və “Moskva” müqavilələri Ermənistan Respublikasının məhvi ilə nəticələnib. Bu səbəbdən də Rusiyadan tələb etməliyik ki, hər iki müqaviləni ləğv etsin”.
Qeyd edək ki, bundan əvvəlki açıqlamasında erməni general ölkəsinin atom silahı əldə etməsini zəruri saydığını bəyan edib.
Erməni generalının etdiyi təklif belə bir sualı ortaya çıxarır: Türkiyə və Azərbaycanın iştirakı olmadan “Qars” və “Moskva” müqavilələrinin ləğvi mümkündürmü?
Tarix üzrə fəlsəfə doktoru Məhərrəm Zülfüqarlı “Baki-Xəbər”ə açıqlamasında bildirdi ki, sözügedən müqavilələr tarixi əhəmiyyət daşıyır: “Erməni generalının bu tip açıqlaması sırf təxribat üçün hesablanıb. İstəyir ki, Rusiya-Türkiyə, Rusiya-Azərbaycan münasibətlərinə xələl gətirsin. Həmin müqavilələrdə Türkiyə tərəf kimi tanınıb və söhbət Azərbaycanın ərazisi olan Naxçıvandan gedir. Bu müqavilələrlə bağlı istənilən müzakirədə Azərbaycan və Türkiyə tərəf kimi iştirak etməlidir. Hazırkı dönəmdə Rusiya üçün daha qlobal məsələlərin həlli maraqlıdır. Hansısa sərsəm erməni generalının təklifi ölkələr arasında ziddiyyətli addımların atılmasına gətirib çıxara bilməz. Ermənistanın mövcudluğu həmin generalı narahat edirsə, tarixə dəqiq baxsın. Əminəm ki, bundan sonra o, əksinə, Rusiyaya təşəkkür etmiş olar. Çünki heç dən bir ölkənin qurulmasını onlara Rusiya bəxş etmiş oldu. Tarixdə Ermənistan adlı bir ölkə olmayıb. Buna görə də onun hansısa müqavilə şərtinə görə zərər çəkdiyinin iddia olunması tamamilə absurddur. Həmin erməni generalı çox yaşlanıb. Əminəm ki, psixikası yerində deyil. Belə olmasaydı, normal açıqlamalar verərdi. Bundan əvvəl Ermənistanın atom silahı əldə etməsinin vacibliyindən danışıb. Normal düşüncədə olan hərbçi belə iddia irəli sürə bilərmi? Bu adam öz sənətinə aid məsələdə belə diletant yanaşma ortaya qoyursa, onun tarixdən nə dərəcədə bilikli olduğunu müzakirə etməyə yer qalmır. Hesab edirəm ki, bu, qeyri-ciddi, heç bir tarixi əsaslara söykənməyən bir tələbdir. Ona da ciddi yanaşmaq lazım deyil”.
Məhəmmədəli QƏRİBLİ