Dostları Baloğlan Əşrəfovun məzarına niyə çələng göndərməyiblər? – Yusif Mustafayevdən açıqlama

Tanınmış prodüser, teleaparıcı Tarix Əliyevin (Tolik) dünyasını dəyişən Əməkdar artist Baloğlan Əşrəfovun məzarında bir çələngin belə olmadığını bildirməsi səs-küyə səbəb olub.

Ötən gün Masallı rayonunda torpağa tapşırılan sənətçinin dostları məsələyə reaksiya veriblər.

Yenisabah.az-a mövzu ilə bağlı danışan müğənni Yusif Mustafayev Toliklə dərhal əlaqə saxladığını bildirib:

“Mən də Baloğlan müəllimin dəfn mərasimində iştirak edən yaxınlarından idim. Srağagündən buradayam, dəfn etdik sonra Bakıya qayıtdım, bu gün də səhər 8-in yarısından Masallıdayam. Həm mən, həm də Baloğlan müəllimin digər yaxın dostları mərasimdə iştirak edib. O mənim böyük qardaşım idi. Tolikin sosial şəbəkədə paylaşdığı fikirləri gördüm. Dərhal ona telefonla zəng edib məsələni aydınlaşdırdım. Tolik o sözləri bizə ünvanlamayıb. İnanın, biz dəfn mərasimindən sonra heç maşında belə yatmamışıq. Tolik mənə dedi ki, o sözləri sizə yox, lazımi qurumlara demişəm. Məsələn, Masallı rayon İcra Hakimiyyəti, Mədəniyyət idarəsi və s. Belə baxanda düz də deyir”.

Sənətçi dəfn mərasimində və ondan sonrakı günlərdə də Masallıya getdiyini deyib. Onun sözlərinə görə, B.Əşrəfovun dostları dəfn zamanı gül alacaq vəziyyətdə olmayıblar:

“Mən ora qardaşımı dəfn etməyə getmişəm, gülə zamanım belə olmayıb. Bu gün Bakıya qayıdıb, sabah yenidən Masallıya gələcəm. Mən hər gün məclisdə iştirak edəcəyəm, Allah Baloğlan qardaşımın yerini cənnət eləsin. Hamımızın başı sağ olsun, Baloğlan kimi böyük sənətkarı itirdik…”

Qeyd edək ki, Tolik sosial şəbəkə hesabında “Baloğlan müəllimin məzarına baxıb çox utandım. Dəfn mərasimini izlədim, amma bir çələng də görmədim. Dostlarının 200 AZN pulu yox idi ki, bir çələng göndərsin? Ona dostum, qardaşım deyənlərə ayıb olsun» – deyə paylaşım etmişdi.