Ana səhifə / Cəmiyyət / Deputatdan etiraz: “Sürücülər neçə məmur qapısı döyməli olur”

Deputatdan etiraz: “Sürücülər neçə məmur qapısı döyməli olur”

“İcbari sığorta sahəsində elektron informasiya sistemlərinin inteqrasiya olunması irəliyə addımdır. İstər avtonəqliyyat, istər daşınmaz əmlak və digər sığorta növlərində göstərilən xidmətlərdən narazılıq çoxdur. Sığorta sisteminin dəqiq və şəffaf işləməsi həm də dövlətin yükünün azaldılması deməkdir. Bu gün onlarla şirkət tərəfindən müxtəlif sığorta xidmətləri göstərilsə də, vətəndaşlar onlara hələ də etibar etmir”.

Bu fikirləri deputat Razi Nurullayev Milli Məclisin iclasında söyləyib. Deputatın sözlərinə görə, bu etibarsızlığın bir neçə səbəbi var: “Ona görə də maddə 8-ə, icbari sığorta müqaviləsinə, o cümlədən 22-ci maddəyə – sığortalının hüquq və vəzifələrinə dəyişiklik edilməsini və konkret olaraq yüngülləşdirici və sadələşdirici müddəaların salınmasını istəyirəm. İstər avtonəqliyyat, istərsə də daşınmaz əmlak sığorta hadisəsi yarananda, sığortaçı əlindən gələn və ağlından keçən bütün əyri yolları işlədir ki, ya sığorta ödəməsin, ya da az ödəsin. Mən insanlar tanıyıram ki, başına açılan oyunlardan bezərək sığorta pulundan imtina edib. Bir neçə il bundan qabaq “Atəşgah” sığorta ilə bağlı bir sığorta hadisəsi yaşadıq. Mən müxtəlif üsullardan istifadə edib rəhbərliyə, ən azından bir şöbə müdirinə çıxmaq istədim. Mümkün olmadı. Qaynar xətt telefonuna zəng etməli olursan, bir xanımla danışırsan, o da eyni sözləri dalbadal təkrar edir. Bilmirsən canlıdır, yoxsa robot. Facebook-da bir paylaşım etdim, şərhlər bölümündə 500-dən çox şərhləri oxusaydınız görədiniz ki, sığorta bazarı hansı vəziyyətdədir”.

R.Nurullayev bildirib ki, digər bir məsələ sığortaolunanın həftələrlə, aylarla qapılar döyməsidir: “Qanunu daha da sadələşdirək, məmurun əyri manevrlər etməsi üçün yolları bağlayaq. Bəzən kiçik avtonəqliyyat hadisəsində belə vətəndaş həftələrlə incidilir. Olmaz axı belə. Avtoqəza olub, zərərçəkən də avtonəqliyyat vasitəsidir, sürücü və sərnişinlərin heç burnu da qanamayıb. Sürücülər neçə məmur qapısı döyməli olur, iş polisə verilir ki, araşdırsın və sonra sürücü polisdən kağız gətirib sığorta şirkətinə verməlidir. Buna nə ehtiyac var? Sığorta şirkəti belə məqamlarda bəhanələr gəzir ki, kaş ki, o sürücünün bir problemi yaransın ki, şirkət sığorta ödəməsin. Belə olan halda sığorta sisteminə hansı etibardan danışmaq olar?”

Musavat.com

Həmçinin oxuyun

Təcrübəsiz adamlar necə direktor olur? – “Dostluq, qohumluq əlaqələri…”

Son vaxtlar məktəb və kollec direktorlarının fəaliyyətində nöqsan aşkarlanması və bu səbəbdən həmin vəzifəli şəxslərin …