“Yəqin ki, Aİ-nin son jestindən sonra erməni qaçqını adı ilə daha çox terrorçunun işğal altındakı torpaqlara yerləşdirilməsi davam etdiriləcək”
Vəfa Heydərli: “Aİ-nin həmin qərarı pislənməli və ona kəskin etiraz bildirilməlidir”
Avropa İttifaqı (Aİ) Livan, İordaniya və Türkiyədə sığınacaq tapan suriyalı qaçqınlara kömək məqsədilə 275 milyon avro ayırıb. Beynəlxalq Qaçqınlar Günü münasibətilə ayrılan ianə həmin ölkələrə və təşkilatlara minlərlə uşaq və gəncin təhsil, peşə hazırlığı və psixoloji yardımı üçün nəzərdə tutulub.
Məlumata görə, ümumilikdə indiyə qədər Aİ-nin bu istiqamətdə ayırdığı maliyyə vəsaitinin həcmi yüzlərlə milyon avro təşkil edib. Ən maraqlısı isə budur ki, bu layihə çərçivəsində Suriyadan Ermənistana köçən ermənilər üçün də 3 milyon avro vəsait ayrılıb. Ermənistan rəsmilərinin verdiyi məlumata görə, hazırda Suriyadan Ermənistana 22 min adam köçüb ki, onların da əksəriyyəti vətəndaşlıq alıb. Doğrusu, Avropa İttifaqının ermənilərə yönəlik bu addımı heç cür başadüşülən deyil. Çünki bir çox təkzibolunmaz məlumatlara görə, Suriyadan Ermənistana köçürülən ailələrin çoxu işğal altında saxlanan Azərbaycan ərazilərinə yerləşdirilib. Hətta onların arasında çoxlu sayda terroristin olduğu da qeyd edilir. Bu yaxınlarda İranda silsilə terror aktları törədənlərin də Ermənistan vasitəsilə həmin ölkəyə keçdiyi qeyd olundu. Belə olan təqdirdə fəaliyyət növləri bilinməyən, terrorla əlaqəli olmaları şübhə doğurmayan bir kontingenti erməni qaçqını adı ilə maliyyələşdirməkdə Avropa İttifaqı hansı məqsədi güdə bilər?
Ekspert Vəfa Heydərli qəzetimizə bildirdi ki, Avropa İttifaqı bu məsələdə böyük yanlışlığa yol verir: “Onlar bunu humanizm nöqteyi-nəzərindən edirlərsə, inandırıcı görünmür. Çünki biz özümüzə münasibətdə anoloji halın şahidi olmadıq. Azərbaycan bir milyondan artıq qaçqın qəbul etdi. Onda niyə Avropa İttifaqı bizə tranş ayırmırdı? Görünür ki, burda ikili standartlı yanaşma var. Bu yaxınlarda BBC-nin Ermənistandakı Rus xidməti Suriyadan qaçan ermənilərin xeyli hissəsinin Ermənistana üz tutması haqda veriliş hazırladı. Qeyd edilirdi ki, zəngin olanlar daha çox Qərb ölkələrinə getməyə üstünlük verir.
Əsəd rejiminə dəstək verən ermənilər üsyançıların qorxusundan ölkədən qaçır, Ermənistan isə onların Azərbaycanın işğal altındakı ərazilərində yerləşdirilməsini həyata keçirir. Hətta bu məqsədlə “Yenidən məskunlaşma üzrə İctimai Şura” yaradılıb.
Erməni saytlarında yer alan məlumatlara görə, suriyalı ermənilərin Xocavənd, Kəlbəcər, Füzuli və digər işğal altındakı bölgələrdə düşərgə formasında məskunlaşdırılması həyata keçirilib.
Maraqlıdır ki, Suriyadan erməni köçünün baş tutmasında Ermənistana dünyadakı erməni diaspor təşkilatları ilə yanaşı, Aİ-də maraq göstərir. Suriyadan Ermənistana gəlmək istəyən ermənilər yenə var. Ancaq Ermənistan büdcəsinin bərbad vəziyyətdə olması bu ölkədən kömək uman suriyalı erməniləri çətin vəziyyətdə qoyub. Xalqı səfalət içində yaşadan iqtidar məskunlaşmaya razılıq verənlərə ancaq torpaq sahəsi ayırmağa hazırdır. Yəqin ki, Aİ-nin son jestindən sonra erməni qaçqını adı ilə daha çox terrorçunun işğal altındakı torpaqlarımıza yerləşdirilməsi davam etdiriləcək. Aİ-nin həmin qərarı pislənməli və ona kəskin etiraz bildirilməlidir”.
Məhəmmədəli QƏRİBLİ