“ABŞ bu məsələdə hətta İsraili qabaqlayır və onu paytaxtı köçürməkdə tələsdirmək istəyir”
Əli Əliyev: “Tramp bu məsələdə sırf İsrail maraqlarından çıxış edir və bunu gizlətmir”
ABŞ Senatı bazar ertəsi ölkənin İsraildəki səfirliyinin Təl-Əvivdən Qüdsə köçürülməsi və ərəb-İsrail münaqişəsinin “iki dövlət” prinsipi əsasında nizamlanmasına çağıran qətnamə qəbul edib. 100 senatordan əksəriyyəti sənədin lehinə səs verib.
“Qüdsün birləşməsinin 50 illik yubileyinin keçirilməsi haqqında” qətnamənin qısa izahatında qeyd olunur ki, sənəd Amerikanın çoxdankı ikipartiyalı siyasətini təsdiqləyir. Bu siyasətə görə, Qüdsün daimi statusu məsələsi tərəflər arasında iki dövlətin dost münasibətləri barəsində qərarlara dair yekun statusu haqqında danışıqlar yolu ilə həll olunmalıdır.
Senatın qətnaməsi məcburi xarakter daşımasa da, ABŞ-ın ali qanunverici orqanının göstərilən məsələ üzrə mövqeyini əks etdirir.
ABŞ-ın bu addımını necə şərh etmək olar?
Vətəndaş və İnkişaf Partiyasının sədri Əli Əliyev “Bakı-Xəbər”ə açıqlamasında bildirdi ki, bunu Tramp administrasiyasının İsrailə verdiyi açıq dəstək kimi dəyərləndirmək olar: “Tramp seçilməmişdən əvvəl də Netanyahu ilə görüşündə İsrailin təhlükəsizliyinin qarantı olacağına söz verdi. Onun atdığı addımlar göstərir ki, verdiyi sözə əməl edir. İranda baş verən hadisələri də həmin qəbildən saymaq olar. Bununla İsrailin potensial düşmənləri sıxışdırılır. Netanyahunun özünün proqramında paytaxtın Təl-Əvivdən Qüdsə köçürülməsi ideyası var. O bu istiqamətdə ciddi fəaliyyət göstərir.
Qüds bütün dünyada müqəddəs bir şəhər kimi tanınır. Müsəlman və xristian abidələrilə zəngin olan bir şəhərdir. Qüdsün İsrailin paytaxtı elan edilməsi həmin dəyərlərin hamısının mənimsənilməsi və onlara sahib çıxılması anlamına gəlir. ABŞ bu məsələdə hətta İsraili qabaqlayır və onu paytaxtı köçürməkdə tələsdirmək istəyir. Tramp bu məsələdə sırf İsrail maraqlarından çıxış edir və bunu gizlətmir. Hesab edirəm ki, Yaxın Şərqdə yaradılan gərginlik bizə maraqlı sürprizlər vəd edə bilər”.
Məhəmmədəli QƏRİBLİ