Azinforum.az İnformasiya Portalı Onlayn Xəbər Portalı
Naxçıvan Dövlət Televiziyasının telelayihəsi olan “Vətən uğrunda” filminin növbəti sayı 2016-cı ilin aprel döyüşlərində şəhid olan mayor Rasim Məmmədova həsr ediləcək. Bu məqsədlə televiziyanın bir qrup əməkdaşı şəhidin xidmət etdiyi Füzuli rayonuna ezam olunub.
Aprel döyüşlərində tabor komandiri kimi xidmət edən Rasim Məmmədov Lələtəpə yüksəkliyinin düşməndən azad edilməsində böyük qəhrəmanlıq göstərərək şəhidlik zirvəsinə ucalıb.
Naxcivantv.az xəbər verir ki, televiziyanın baş redaktoru Ruhiyyə Rəsulova və çəkiliş heyyətinin digər üzvləri əvvəlcə şəhidlərin xatirəsinə ucaldılan abidəni ziyarət ediblər. Daha sonra heyyət şəhid Rasim Məmmədovun xidmət etdiyi hərbi hissədə, Lələtəpə yüksəkliyində olub, döyüş yoldaşlarından müsahibələr alıblar.
Filmdə qələbənin qazanılmasında xidmətləri olan hərbçilərimizin döyüş yoluna da nəzər salınacaq. Həmçinin filmdə aprel döyüşlərindən sonra təhlükəsiz yaşayışı bərpa edilən Cocuq Mərcanlının bugünkü mənzərəsi, öz ata-baba yurdlarına qayıdan soydaşlarımızın müsahibələri də yer alacaq.
Naxçıvanda çəkilişləri başa çatdırılan film aprel ayının ikinci həftəsində tamaşaçılara təqdim olunacaq.
Qeyd edək ki, mayor Rasim Məmmodov aprel döyüşlərində göstərdiyi böyük şücaətə görə Azərbaycan Respublikasının Prezidenti İlham Əliyevin sərəncamı ilə “Qüsursuz xidmətə görə” II dərəcəli medalı ilə təltif edilib. O, 1977-ci ilin may ayının 20-də Babək rayonunun Cəhri kəndində anadan olub.
