Çərşənbə , Sentyabr 22 2021
Ana səhifə / Cəmiyyət / Tanınmış ağdamlılardan Ağdama turist səfərləri ilə bağlı etirazlar

Tanınmış ağdamlılardan Ağdama turist səfərləri ilə bağlı etirazlar

Dövlət Turizm Agentliyi (DTA) Qarabağa turist səfərlərinin təşkil edilməsinə başlayır. Bu barədə agentliyin sədri Fuad Nağıyev məlumat verib. Onun sözlərinə görə, ilk səfər bu ayın sonunda Ağdama təşkil olunacaq: “Bu səfər ”Yolumuz Ağdamadır” adı ilə baş tutacaq. Biz Ağdamda doğulmuş və təxminən 30 ildir ki, ora gedə bilməyən sakinlərin ziyarətini təşkil edəcəyik”.

DTA-nın Regional inkişaf sektorunun müdiri Elgün Cavadov isə bildirib ki, bu ilin əvvəlindən Qarabağ Turizm Marşrutları konsepsiyası hazırlanıb: “Konsepsiyaya Ağdam və Füzuli-Xocavənd marşrutları daxildir. Ağdama səfər barədə ictimaiyyətə məlumat veriləcək. Çünki iştirakçılıq məsələsi var. Həmçinin biletlərin onlayn və oflayn alınması məsələsi var. Qiymətlərə gəlincə isə hazırda bu barədə müzakirələr aparılır. Belə ki, hazırda İdarələrarası Mərkəz səviyyəsində müzakirələr gedir və biz təkliflərimizi vermişik. Sonuncu müzakirədə qiymətlərlə bağlı qərar veriləcək. Füzuli-Xocavənd marşrutu üzrə isə biz özümüz oralarda olmuşuq və maraq yaranarsa, gələn ildən bu istiqamətdə də turlar təşkil edə bilərik”.

Bəs niyə turist səfərləri ilk olaraq Ağdama təşkil edilir, Şuşaya yox? Belə turist səfərlərinin təşkili necə qiymətləndirlir? Bu sualları əslən Ağdamdan olan tanınmışlara ünvanladıq.

Deputat Aqil Abbas belə səfərlərin təşkilinin əleyhinədir: “Bu səfərlərdə iştirak etmək fikrim yoxdur. İstədiyim vaxt oralara gedə bilirəm. Bir də Ağdamıma niyə turist kimi getməliyəm? İnsanlar var ki, gedə bilmirlər. Onların səfərlərini təşkil etsinlər, amma onlara turist deməsinlər. Yoxsa ağdamlı Ağdama turist kimi gedir?

Aqil Abbas: “Deputat köməkçilərinin sərbəst hərəkətinə icazə verilməlidir”

Aqil Abbas: “Ağdamıma niyə turist kimi getməliyəm ki?”

Şəhərin mərkəzində mina təmizlənib. Təhlükəli durum yoxdur. Belə olan şəraitdə ağdamlıları turist kimi oralara aparmaq doğru deyil. Bir təşəbbüs göstərilib, bunun nə lehinə, nə də əleyhinəyəm. Amma Ağdam marşrutu aça bilərlər, könüllü şəkildə kim istəsə gedə bilər. Həmişə ağdamlılar Ağdamdan pul qazanıblar, eybi yox, qoy bu dəfə də başqaları Ağdamdan pul qazansınlar.

Qarabağa turizm marşrutları hazırlayırlarsa, Şuşadan başlasınlar, Şuşa yerindədir. Ağdama gedib nəyi görəcəklər? Şəhər darmadağındır. Bir dənə məscid qalıb. Kəlbəcərə marşrut açsınlar. Bu gün o xarabalıqları göstərmək o qədər də uyğun deyil. Bunun turizmə nə dəxli var? İnsanları mənzərəli yerlərə deyil, dağıdılmış ərazilərə, özü də turist adı ilə aparmağın nə anlamı var? İndiyə qədər Ağdama təxminən 2-3 min adam gedib. Sakinlərin də hissə-hissə turist kimi deyil, vətənlərinin həsrəti ilə yaşayan insan kimi aparılması ən doğrusu olardı”.

Akif Nağı: “Məni vəhşi kimi göstərmişdilər”

Akif Nağı: “Belə ziyarətin təşkilini turizm şirkətlərinə etibar etmək olmaz”

Qarabağ Azadlıq Təşkilatının sədri Akif Nağı belə səfərləri vacib sayır: “İşğaldan azad olunmuş ərazilərə insanların səfərlərinin təşkili vacibdir. Bununla bağlı biz bir qrup ağdamlı ilə birlikdə Prezidentə müraciət etmişdik, verdiyimiz təkliflərin içərisində bu məsələni də xahiş etmişdik. İndi bu proses başlayır, çox yaxşı. Amma bunu tur və ya turist səfəri adlandırmaq olmaz, ziyarət adlandırılmalıdır. Tur və ya turist səfəri çox gülməli və təhqiredici görünür. 30 il torpağına həsrət qalan insan oraya turist kimi qayıda bilməz, bu, çox böyük biabırçılıqdır. Bu ziyarətin təşkilini də turizm şirkətlərinə etibar etmək olmaz. Hətta Kəbə ziyarətlərində də bu turizm şirkətlərinin hansı oyunlardan çıxdığını bilirik. Onların əksəriyyəti dələduzluqla məşğuldur. Tam əmin ola bilərsiniz ki, onlarla rəsmi, qeyri-rəsmi turizm şirkəti bu işə qoşulacaq, baha qiymətə biletlər satacaqlar, adamlar gedib qalacaqlar Ağdamın girəcəyində, tıxaclar, növbələr yaranacaq. Adamlar orada saatlarla, bəlkə günlərlə gözləməli olacaqlar. Möhtəkirlik baş alıb gedəcək, hamı narazı qalacaq. Biz təklif edirik ki, ziyarətə getmək istəyənlər Daxili İşlər Nazirliyindəki portala müraciət etsinlər, portal əməkdaşları adamları on-on qruplaşdırsınlar, bu qruplara məlumat göndərsinlər ki, filan tarix, filan saatda Quzanlıda və ya başqa yerdə olun, sizi oradan ziyarətə götürəcəklər. Oradandan DİN və ANAMA əməkdaşlarının, həmçinin könüllülərin iştirakı ilə hamını razı salan ziyarət təşkil edilə bilər”. Musavat.com

Həmçinin oxuyun

Distant təhsil tələbi ləğv edildi

Distant təhsil tələbi ləğv edilib və əyani təhsilə keçid müəyən edilib. Bu, Nazirlər Kabineti “Xüsusi …