Ekspertlər Rusiya ƏN-in 11 aprel qərarından Azərbaycan-Rusiya münasibətlərinin birmənalı asılı olduğu qənaətinə gəldi…
Rusiya hökumətinin Ümumrusiya Azərbaycanlıları Konqresinin (ÜAK) qeydiyyatını ləğv etmək və fəaliyyətini dayandırmaq niyyətində olduğu barədə sensasiyalı məlumat yayılıb. Məlumat “Yeni Müsavat”a Moskvadakı mənbələrdən daxil olub. Məlumatda bildirilir ki, Rusiya Ədliyyə Nazirliyinin ÜAK-ın qeydiyyatı məsələsinə aprelin 11-də baxacağı və müvafiq qərar çıxaracağı gözlənir.
ÜAK mərhum dövlət başçısı Heydər Əliyevin təşəbbüsü ilə təsis olunub, konfransda Rusiya prezidenti Vladimir Putin də iştirak edib. Bundan başqa, Azərbaycan və Rusiya prezidentləri ÜAK-ın bütün qurultaylarına təbrik məktubları göndəriblər, qurumun fəaliyyətini yüksək qiymətləndiriblər.
Yeri gəlmişkən, ötən ilin dekabrında Moskvada ÜAK-ın IV Qurultayında təşkilatın rəhbər orqanlarına yeni seçkilər keçirilib. Səsvermə nəticəsində tanınmış ictimai xadim, tibb elmləri namizədi, professor Fazil Qurbanov qurumun yeni prezidenti olub. Qurultayda ÜAK-ın Rəyasət Heyəti və Mərkəzi Şurasına yeni üzvlər də seçilib. Qurumun vitse-prezidentləri sırasında kifayət qədər tanınmış şəxslər yer alıb. Məsələn, Mixail Qusman, dünyada tanınmış iş adamları Qod Nisanov, İsgəndər Xəlilov və dünya şöhrətli rəssam Tahir Salahovun adını çəkmək kifayətdir. Qeyd edək ki, son qurultayda Azərbaycan Respublikası Prezidenti Administrasiyasının ictimai-siyasi məsələlər şöbəsinin müdiri Əli Həsənov, Diasporla İş üzrə Dövlət Komitəsinin sədri Nazim İbrahimov, Azərbaycanın Rusiyadakı səfiri Polad Bülbüloğlu, o cümlədən Rusiyanın 78 bölgəsindən 200-dən artıq təmsilçi də iştirak edib.
Azərbaycanın ən böyük diaspor təşkilatının qeydiyyatının ləğv olunacağı ilə bağlı səslənən iddiaları nə dərəcədə əsaslı saymaq olar? Onun nə kimi nəticələri ola bilər?
Dünya Azərbaycanlıları Konqresi icra aparatının rəhbəri Samir Adıgözəlli qəzetimizə açıqlamasında bildirdi ki, belə bir məlumatla mətbuatdan tanış olub: “Düzü, mən Rusiya Ədliyyə Nazirliyinin belə qərar verəcəyinə inanmıram. Çünki ÜAK Rusiyada yaşayan azərbaycanlıların ən ciddi və böyük diaspor təşkilatlarından biridir. Həmin təşkilatın Rusiyanın hakim dairələrilə olduqca yaxşı münasibəti olub. Eyni zamanda, biz müşahidə etmişik ki, Rusiya rəsmiləri də deyilən quruma müsbət münasibət bəsləyib. Bütün tədbirlərdə onların iştirakını, qarşılıqlı hörmətin olduğunu görmüşük. Hesab edirəm ki, belə bir qərarın verilməsi həm də iki ölkə arasındakı münasibətlərə mənfi təsir edər. Digər tərəfdən isə, ÜAK-ın fəaliyyətində onun qeydiyyatının ləğvinə əsas verən hər hansı bir qanun pozuntusunu görməmişik. Yəqin ki, yaxın zamanda bunun ən dəqiq cavabını tapa biləcəyik”.
“Aprelin 11-də Rusiya Ədliyyə Nazirliyinin Ümumrusiya Azərbaycanlıları Konqresinin qeydiyyatının ləğvi məsələsinə baxacağı barədə yayılan məlumat ciddi narahatlıq doğurur”. Bunu APA-ya açıqlamasında millət vəkili Elman Nəsirov bildirib. E.Nəsirov deyib ki, Heydər Əliyevin təşəbbüsü və Rusiya prezidenti Vladimir Putinin dəstəyilə yaradılmış azərbaycanlıların Rusiyada çox mühüm bir diaspor təşkilatının fəaliyyətinin dayandırılacağı barədə informasiyalar Azərbaycan ictimaiyyətini, ziyalıları olduqca narahat edir: “Məsələnin qəlizliyi ondadır ki, belə bir addım atılarsa, bu, Azərbaycan-Rusiya strateji tərəfdaşlıq münasibətlərinin bütün mahiyyətinə daban-dabana zidd addım olar”.
Deputat deyib ki, diaspor təşkilatının Rusiyada fəaliyyəti iki ölkə arasında dostluq münasibətlərinin daha da inkişafına xidmət göstərir.
Millət vəkili hesab edir ki, Rusiya-Azərbaycan münasibətlərinin yüksək inkişafı məntiqindən yanaşılsa, belə bir addımın atılması birmənalı şəkildə qəbuledilməzdir: “Deməli, burada kimlərinsə marağı var. Rusiya Ədliyyə Nazirliyində ÜAK-ın bağlanması məsələsinə aprelin 11-də baxılacağı gözlənir. Aprel ayında isə ermənilər dünyada qondarma “soyqırım”ın tanıdılması istiqamətində səylərini artırır, türklərə və azərbaycanlılara müxtəlif istiqamətlərdə ziyan vurmağa, təzyiq göstərməyə çalışırlar. Bunun üçün müxtəlif üsul və vasitələrdən istifadə edirlər. Bu məsələnin aprel ayına təsadüf etməsi bu baxımdan təsadüfi görünmür. Bu, məqsədyönlü, planlı bir fəaliyyətin nəticəsidir. Bunun arxasında Rusiyadakı, eləcə də dünyada erməni lobbisi, o cümlədən Rusiyadakı anti-Azərbaycan siyasi dairələri dayanır”.
E.Nəsirov Rusiya və Azərbaycan prezidentlərinin bu təşkilatın qurultaylarına hər dəfə təbrik məktubları göndərdiyini, ÜAK-ın fəaliyyətini dəstəklədiklərini də xatırladıb.
“Bunu daha çox Rusiyadakı, dünyadakı erməni lobbisinin adı ilə bağlamaq lazımdır. Təəssüf ki, Rusiyanın müəyyən siyasi dairələrində də Azərbaycanı sevməyən qüvvələr var və bu gün ermənilərlə birlikdə anti-Azərbaycan siyasəti həyata keçirmək istəyirlər” – deyə E.Nəsirov bildirib.
E.Nəsirov Azərbaycan ictimaiyyətinin bu prosesləri qınadığını, buna öz etirazını bildirdiyini vurğulayıb: “Azərbaycan ictimaiyyəti hesab edir ki, heç bir halda, Rusiyanın müvafiq hakimiyyət dairələri belə bir addımın atılmasına imkan verməyəcək. Çünki belə bir addımın atılması Azərbaycan-Rusiya münasibətlərinin zədələnməsində maraqlı qüvvələrin mənafeyinə xidmət göstərir”.
Politoloq Qabil Hüseynli isə Rusiya Ədliyyə Nazirliyində ÜAK-ın fəaliyyətinin dayandırılmasının müzakirəyə çıxarılmasını “gözlənilməz hadisə” adlandırıb: “Azərbaycanda rus icması azad fəaliyyət göstərir, Cəmiyyətin sədri Milli Məclis deputatıdır. Rusiyada da 2 milyon azərbaycanlı yaşayır. İndi Rusiyada yaşayan azərbaycanlıların maraqlarını qoruyan, sırf mədəni təşkilat kimi fəaliyyət göstərən və qanunlardan kənara çıxmayan ÜAK-ın fəaliyyətinin dayandırılmasına çalışılması heç cür təqdir oluna bilməz”.
Q.Hüseynli qeyd edib ki, belə bir addımın atılması Rusiya-Azərbaycan münasibətlərinə zərbə vurar.
Politoloq vurğulayıb ki, Azərbaycan həmişə iki ölkə arasında yaxın qonşuluq və bərabərhüquqlu münasibətlərin tərəfdarı olub: “Azərbaycan bu istiqamətdə digər postsovet məkanındakı ölkələrə nümunə ola biləcək davranış sərgiləyib. Məsələn, postsovet məkanında ölkələrin bir çoxunda rus dilində təhsil verən orta və ali məktəblər yox səviyyəsindədir. Amma Azərbaycanda rusdilli məktəblərin hamısı fəaliyyət göstərir. Universitetlərimizin hamısında rusdilli bölmələr var. Azərbaycanda 140 minə qədər rus yaşayır. Tolerant, multikultural bir ölkə olan Azərbaycanda rusların maraqları hər yerdə təmin edilir və qorunur”.
“Atlas” Araşdırmalar Mərkəzinin rəhbəri Elxan Şahinoğlu da ÜAK-ın vaxtilə sabiq prezident Heydər Əliyevin təşəbbüsü ilə yaradıldığını, bu qurumun yaradılmasına Rusiya prezidenti Vladimir Putinin də dəstək verdiyini xatırladıb: “Qurumun rəhbərliyində Rusiyada tanınmış azərbaycanlılar, Azərbaycanla bağlı olan Rusiya vətəndaşları yer alıb. Azərbaycan dövləti ÜAK-ın fəaliyyətinə çox önəm verir, çünki Rusiyada erməni lobbisi də çox güclüdür. Erməni lobbisi hər zaman Azərbaycan əleyhinə çalışır. Bu məsələ ilə bağlı Azərbaycan hakimiyyəti Rusiya rəsmiləri ilə dialoqu fəallaşdırmalıdır. Azərbaycanın Rusiyadakı səfiri, rusların özünün böyük hörmətlə yanaşdığı Polad Bülbüloğlu da bu məsələni diqqətdə saxlamalıdır. Ona görə ki, həqiqətən ÜAK-ın fəaliyyətini dayandırmaq istəyirlərsə, bu, böyük qalmaqala səbəb olar”.
E.Şahinoğlu düşünmür ki, ÜAK-ın bağlanması ümumilikdə Rusiya hakimiyyətinin mövqeyidir: “Ola bilər ki, hakimiyyət daxilində erməni lobbisi ilə bağlı olan kimlərsə bu məsələni “öz yolu” ilə həll etməyə çalışır. Lakin bunun baş tutması Rusiya-Azərbaycan münasibətlərinə mənfi təsir edər. Azərbaycan Rusiyanın Cənubi Qafqazdakı əsas tərəfdaşlarından biridir. İki ölkənin çox böyük ortaq layihələri, ticarət əməkdaşlığı var. Düzdür, Rusiya bölgədə Ermənistanı da dəstəkləyir, amma Rusiya Ermənistana silahı pulsuz verdiyi halda, Azərbaycan Rusiyadan 4 milyard dollarlıq silah alıb. Bu, Rusiyanın hərbi-sənaye kompleksi, büdcəsi üçün də önəmlidir”.
“Bütün ictimai təşkilatların yoxlanması Rusiya Ədliyyə Nazirliyinin səlahiyyətində olan məsələdir. Ümumrusiya Azərbaycanlıları Konqresi də Rusiyada fəaliyyət göstərən ictimai təşkilatdır. Bizim təşkilat qanun çərçivəsində işləyir, vaxtlı-vaxtında bütün sənədlərimizi qaydasına salırıq”. Bunu isə APA-nın Moskva müxbirinə açıqlamasında ÜAK prezidentinin müşaviri, təşkilatın Rəyasət Heyətinin üzvü Kamran Rüstəmov deyib. K.Rüstəmov bildirib ki, ÜAK bir gündə ləğv olunacaq təşkilat deyil: “Konqresin əsası ulu öndər Heydər Əliyev və Rusiya prezidenti Vladimir Putin tərəfindən qoyulub. Bu təşkilatı ləğv etmək asan məsələ deyil. Təşkilatımızın Rusiyanın 70-dən çox regionunda bölmələri fəaliyyət göstərir. Bu böyüklükdə təşkilatı bağlamaq ağlabatan deyil. ÜAK Rusiya və Azərbaycan prezidentlərinə arxalanan təşkilatdır”.
O qeyd edib ki, Rusiyada ictimai təşkilatlar haqqında qanuna tez-tez dəyişikliklər olur: “Qanuna əlavə və dəyişikliklər olur ki, bu da təbiidir. İctimai təşkilatlar da öz nizamnamələrini həmin dəyişikliklərə uyğunlaşdırmalıdır. Ötən ilin dekabr ayında ÜAK-ın qurultayı keçirildi. Təşkilatın yeni Nizamnaməsi qəbul olundu. İndi həmin Nizamnamə təsdiqlənmək üçün Rusiya Ədliyyə Nazirliyinə göndərilib. Onlar özləri təyin etdikləri müddətdə buna baxacaq. Biz bütün sənədləri təqdim etmişik. Onlar sənədlərdə müəyyən səhvlər tapdılar. Bunlar mexaniki səhvlərdir. Biz onların tövsiyəsi ilə həmin səhvləri düzəltdik, dəyişikliklər etdik, yenidən nazirliyə təqdim etdik. İndi onlardan cavab gözləyirik”.
Rusiya ƏN ÜAK-ın ləğvi üçün Ali Məhkəməyə müraciət etdi
Dünən günün sonunda yayılan məlumata görə, Rusiya Ədliyyə Nazirliyi Ümumrusiya Azərbaycanlıları Konqresinin ləğv edilməsi üçün Ali Məhkəməyə müraciət edib.
Bu barədə APA-ya Rusiya Ədliyyə Nazirliyindən məlumat verilib. Nazirliyin İctimai Əlaqələr Departamentindən bildiriblər ki, ÜAK fəaliyyətində Rusiya Federasiyasının mövcud qanunvericiliyini pozub: “Rusiya Ədliyyə Nazirliyi tərəfindən həyata keçirilən nəzarət-təftiş tədbirləri zamanı ÜAK-ın Rusiya qanunvericiliyini, eləcə də öz Nizamnaməsinin müddəalarını pozduğu aşkarlanıb. Rusiya Ədliyyə Nazirliyi “İctimai Təşkilatlar haqqında” Qanunu əsas götürərək, ÜAK-ın Mərkəzi Şurasının Rəyasət Heyətinə aşkar olunan pozuntuların aradan qaldırılması ilə bağlı dəfələrlə xəbərdarlıq edib”.
Qeyd olunub ki, təşkilat pozuntuları aradan qaldırmadığına görə bu il martın 3-də Rusiya Ədliyyə Nazirliyi Ali Məhkəməyə təşkilatın ləğvinə dair inzibati iddia qaldırılması üçün müraciət edib.
Rusiya Ali Məhkəməsinin qərarına əsasən, müvafiq məhkəmə işinə aprelin 11-də baxılacaq.
Xatırladaq ki, ÜAK 2001-ci ildə yaradılıb.
Məhəmmədəli QƏRİBLİ