Əlikram Əliyev vəzifəsi ilə vidalaşdı
Bu gün Mədəniyyət və Turizm Nazirliyində ilin yekunları ilə bağlı kollegiya iclası keçirilib. Azinforum.az xəbər verir ki, iclasda bir çox mühüm qərarlar qəbul edilib. Bir müddət öncə şiddətli töhmət verilən Azərbaycan Xalça və Xalq Tətbiqi Muzeyinin direktoru Röya Tağıyevanın vəzifəsinə xitam verilib.
Bundan başqa, nazir Əbülfəs Qarayev kollegiya iclasında korrupsiya faktlarına rast gəlindiyini və bu səbəbdən də bir neçə şöbə müdirinin də işdən çıxarıldığını qeyd edib. Onun sözlərinə görə, nazirlik daxilində kadr islahatları gələn il də davam edəcək.
Azinforum.az bildirir ki, kollegiya iclası ilə bağlı maraqlı məqamlardan biri Bakı Şəhər Mədəniyyət və Turizm İdarəsinin rəhbəri Əlikram Əliyevlə bağlı hər hansı bir qərarın ictimaiyyətə açıqlanmamsıdır. Qeyd edək ki, yol verdiyi nöqsanlar və etdiyi korrupsiya əməllərinə görə adı daima mətbuatın gündəmini zəbt edən Əlikram Əliyevin hələ bir müddət əvvəl tutduğu vəzifədən azad edildiyi bildirilir.
Məlumatı dəqiqləşdirmək üçün Əlikram Əliyevin özü ilə əlaqə saxladıq. O, Azinforum.az-a acıqlamasında vəzifədən azad olunduğunu təsdiqlədi :
“Kollegiya bu dəqiqələrdə yekunlaşıb. Ancaq orada mənimlə bağlı hansısa məsələ müzakirə olunmayıb. Mən, bir neçə gün əvvəl yazdığım ərizəm əsasında vəzifədən azad edilmişəm. Hesab edirəm ki, 8 il dövlətimə bacardığım qədər xidmət edə bilmişəm. Dekabrın 28-dən mənim vəzifəmi “Nizami” kinoteatırının direktoru Vüqar Zeynalov icra edəcək. Yəni Bakı Şəhər Mədəniyyət və Turizm İdarəsinin yeni rəhbəri həmin adam olacaq. Fürsətdən istifadə edib Vüqar müəllimi yeni təyinat münasibəti ilə ürəkdən təbrik edirəm”.
Əlikram Əliyev həmçinin bildirdi ki, hələlik bir müddət istirahət etmək planı var:
“Sonra hansı vəzifəni lazım bilərlərsə, orda da işləməyə hazıram”.
M.MİRZƏ
Azinforum.az