Əziz həmyerlilərim! Mən ilk dəfə 2005-ci ilin yayında namizəd kimi sizlərlə görüşə gələrkən, çıxışlarımdan sonra mənə yaxınlaşıb söhbət edən insanların gözündə gələcəyə bir ümid, deputata bir inam yeri kimi baxdığınızı gördüm. Həm də onu duydum ki, illər boyu həll olunmamış kommunal problemlər, icra hakimiyyəti orqanları ilə qanunla danışa biləcək, arxanızda dura biləcək təmənnasız bir dosta-qardaşa ehtiyacınız var. Ancaq bu inamı söndürməyə cəhd edənlərə qarşı mən sizinlə birgə mübarizə apararaq qalib gələ bildik. Bu qələbədən sonra üzərimə düşən məsuliyyəti daha aydın dərk etdim, bir tərəfdən yerli icra hakimiyyəti orqanlarının, bəzi məmurların vəkilliyini etmiş keçmiş deputatların laqeydliyi üzündən sizdə olan inamı bərpa etmək lazım idi, digər tərəfdən həmin məmurların tabe olduqları nazirlik və komitələrdən Gədəbəy, Tovuz üçün maliyyə ayırmalarını xahiş və tələb etməli idim. Belə demək olsun ki, odla su arasında sizin vəkilliyinizi etməli idim.
Bəxtimdən sağ olsun ki, cənab prezident İlham Əliyev bölgəmizə səfərləri zamanı onunla iqtisadi miqrasiyanın səbəbləri, kommunal xidmətlərin çox aşağı olması, həmçinin infrastruktur layihələrinin mənim təmsil olunduğum bölgə üçün necə vacib olmağı haqqında çatdırdığım məsələlərə çox diqqətlə yanaşırdı və bəzən yerindəcə göstəriş verirdi.
2006-cı ilin noyabrın 1-də Gədəbəydə səfərdə olarkən stadionda 45 dəqiqə çəkən söhbətimizdə ölkə başçısına Gədəbəyin cəmi 8%-nin təbii qazla təmin olunmasını misal çəkdim, Ermənistanla həmsərhəd bölgələrdə əhalinin yolsuzluqdan, təbii qazın olmaması ucbatından ən azı 50% Bakıya köçməsindən bəhs etdim, Şınığa gedən magistral yolun bərbad olmasını, Qovlar-Qızıl Torpaq, Tovuz-Qaralar yollarının təmirinə əvvəlki illərdə pul ayrılmasına baxmayaraq hələ də təmir olunmamasını diqqətə çatdırdım. Cənab prezident elə həmin dəqiqə bütün sərhəd kəndlərinin təbii qazla təmin olunması haqqında tapşırıq verdi. Təbii ki, sizlərin həyat şəraitini yaxşılaşdırmaq hökumətin borcudur, ancaq bütün bu problemləri sizin təmsilçiniz olaraq çatdırmaq da deputatın vəzifəsidir.
2005-10 cu illərdə əksər lahiyələrin maliyyələşməsini İqtisadi Siyasət Komitəsinin üzvü olaraq büdcə qəbul olunan zamanlar, 2009-13 cü illər Regionların sosial-iqtisadi inkişafı dövlət proqramı işlənən zaman həyata keçirməyə nail oldum. Təssüflə qeyd etməliyəm ki, 2010-cu ildən kəndlərimizin təbii qazla təmin edilməsi demək olar ki, dayandırıldı. Bizim 2009 -cu ildə adıçəkilən proqrama saldırdığımız işlər də bir neçə il yubadıldı, nəzarət zəif olduğundan Gədəbəy-Qaravəllər yolu keyfiyyətsizlik ucbatından ən azı 30% sıradan çıxdı. Yenə də keçən il, bu il içtimai nüfuzumdan istifadə edərək içtimai nəzarət nəticəsində yenicə istifadəyə verilmiş yolun bərpasına başlamağa nail oldum.
Əziz seçicilərim, siz 2005-10 -cu illərdə mənim timsalımda vicdanla çalışan, həmişə sizin arxanızda duran, yerli icra hakimiyyəti orqanlarının üzərinə düşən vəzifələri iclaslarda, Milli Məclisdə, tv-lərdə, KİV-də xatırladan, tələb edən bir millət vəkili gördünüz və inandınız ki, sizin də sözünüzü deyən bir deputat var. Lakin belə bir deputatın olması bəzi məmurlara sərf etmirdi, ona görə onlar haqqımda sifarişli yazılar yazdıraraq, mənfi rəy yaratmağa çalışdılar, 2010-cu il seçki qabağı rəy sorğularında saxtakarlıq edərək YAP-ı inandıra bildilər ki, mənim dairəmdən başqa namizəd irəli sürülsün. 2010-cu ildə “Şınıx” təşəbbüs qrupu namizədliyimi irəli sürsə də, seçkilərin favoriti olsam da, mən cənab prezidentin nüfuzuna hörmət əlaməti olaraq, YAP-nın namizədinin xeyrinə geri çəkildim. Bu addımıma görə sizlər indi də məni qınayırsınız, görünür ki, indiki deputatınızın fəaliyyətsizliyi mənim də nüfuzumun daha da artmasına gətirib çıxarıb.
Bir neçə ildir davamlı olaraq sizin arzunuzu, Bakıda yaşayan ziyalı həmyerlilərimizin, ictimaiyyət nümayəndələrinin xahişlərini nəzərə alaraq 2015-ci il seçkilərinə qatılmağa razılıq vermişəm. Mənim fəaliyyətimi izləyənlər bilirlər ki, bu addımı ancaq və ancaq dövlətimizin inkişafına, qanunvericilik bazasının təkminləşdirilməsinə bir iqtisadçı kimi töhvə verəcəyimə inanaraq, ən başlıcası sizi layiqincə təmsil etmək üçün atıram. Siz isə seçkilərə gəlin, səsinizə sahib çıxın ki, yenidən 2005-10 -cu illərdə olduğu kimi öz təmsilçinizlə fəxr edəsiniz, fəxr edəsiniz ki, sizin seçdiyiniz deputat “lal kar” deputatlar siyahısında deyil, ən fəal, ən bacarıqlı və ən təşəbbüskarlar sırasındadır.
Nazim Məmmədov, iqtisadçı ekspert