“Türkiyənin daha savadlı təbəqəsi Atatürk prinsiplərinin qorunub saxlanmasına tərəf çıxıb”
Əli Əliyev: “Təhsildən nisbətən uzaq olan, dinçi kəsim isə “hə” deyib”
Türkiyədə konstitusiya dəyişikliyi ilə bağlı keçirilən referendumun nəticələri açıqlanıb. Türkiyə mətbuatı bildirir ki, artıq bülletenlərin 100 faizi açılıb. Nəticələrə əsasən, “bəli” deyənlər 51,4 faiz təşkil edib. Dəyişikliyə qarşı çıxanlar 48,8 faizdir. İstanbul və Ankarada “yox” tərəfdarları daha çox olub. İstanbulda bu rəqəm 51,4, Ankarada isə 51,2 faiz təşkil edib.
Türkiyə mətbuatının yazdığına görə, “bəli” deyənlərin faizinin az olması, xüsusilə böyük şəhərlərdə “yox” tərəfdarlarının çoxluq təşkil etməsi prezident Rəcəb Tayyib Ərdoğanı narazı salıb.
Türkiyənin Ankara, İstanbul, Antalya, İzmir, Diyarbəkir, Əskişəhr və Ərzurum kimi böyük şəhərlərində “yox” tərəfdarlarının üstünlük təşkil etməsi nə ilə bağlıdır?
Vətəndaş və İnkişaf Partiyasının sədri Əli Əliyev “bakı-xəbər”ə açıqlamasında bildirdi ki, indiki geopolitik şərtlər daxilində onun özü də konstitusion dəyişikliyin tərəfdarı kimi çıxış edib: “Ancaq ortaya gözlənilməz nəticələrin çıxması AKP üçün bir qədər diqqət etməli mövzuları ortaya çıxarır. Böyük şəhərlərdə “yox” deyənlərin qalib gəlməsini ciddi sosioloji nəticə saymaq olar. Belə nəticənin ortaya çıxmasını iki amillə izah edə bilərik. Birincisi, Türkiyənin daha savadlı təbəqəsi Atatürk prinsiplərinin qorunub saxlanmasına tərəf çıxıb. Çünki bu kateqoriyadan olan vətəndaşlar daha çox böyük şəhərlərdə cəmləşmiş olur. Təhsildən nisbətən uzaq olan, dinçi kəsim isə “hə” deyib. Başqa bir səbəbin isə coğrafi əsaslandırması var. Mərkəz hissə islahata “hə” deyib. Ancaq dənizlərə çıxışı olan, başqa ölkələrlə sıx əlaqələr quran şəhərlər isə “yox”u dəstəkləyib. Sizin dediyiniz siyahıya mən Adananı da əlavə edərdim. Mənə elə gəlir ki, Türkiyədəki səslərin yarı-yarıya parçalanması ziddiyyətlərə deyil, barışa yol açmalıdır. Bu istiqamətdə də hakimiyyətin üzərinə böyük iş düşür. Qardaş ölkənin rifahını istəyənlər kimi biz də gələcəkdə bu nəticənin əldə olunmasını istərdik”.
Məhəmmədəli QƏRİBLİ