Cümə axşamı , Mart 28 2024
Ana səhifə / Cəmiyyət / “İLYAS İSMAYILOV MƏNƏ XƏYANƏT EDİB”- “HANSI BİQEYRƏTƏ XOŞ GƏLMƏK İSTƏYİR, BƏLLİDİR”- QARŞILIQLI İTTİHAMLAR

“İLYAS İSMAYILOV MƏNƏ XƏYANƏT EDİB”- “HANSI BİQEYRƏTƏ XOŞ GƏLMƏK İSTƏYİR, BƏLLİDİR”- QARŞILIQLI İTTİHAMLAR

Azinforum.az xəbər verir ki, tanınmış hüquqşunas Aslan İsmayılovun “BakıPost.az” saytına verdiyi müsahibə geniş rezonansa səbəb olub. Onun açıqlamasında bir çox tanınmış şəxslərin bostanına daş atması reaksiyasız ötüşməyib. Qeyd edək ki, son günlər Aslan İsmayılovla bir çox tanınmış siyasətçilər və iş adamları arasında qalmaqal yaşanır. Bu hadisələrin paralel şəkildə cərəyan etməsi doğrudan da sual doğurur. Maraqlıdır ki, hüquqşunasdan son müsahibəni götürən sayt ona iş adamı Mürvət Həsənli barədə də suallar ünvanlayıb, ancaq müsahibənin həmin hissəsi hələ ki, yayınlanmayıb. İş adamı Mürvət Həsənli mediaya verdiyi açıqlamada bildirib ki, Aslan İsmayılovun onun haqqında irəli sürdüyü ittihamlarla bağlı məhkəməyə müraciət edib. Tərəflər arasındakı qalmaqalın kökündə duran məsələ ölkəyə xaricdən gətirilən damazlıq yumurta ilə bağlıdır. Hüquqşunas iddia edir ki, Mürvət Həsənli onun hüquqlarını müdafiə etdiyi şirkətə  xeyli miqdarda pul borcludur və həmin məbləği verməkdən imtina edir. İş adamı isə həmin iddiaları rədd edərək bildirir ki, Aslan İsmayılovun hüquqlarını qoruduğu şirkətrin səhmlərinin 30 faizi erməni əsilli iş adamlarına məxsusdur. Son müsahibədə Aslan İsmayılov Ədalət Partiyasının sədri İlyas İsmayılovun da ünvanına tənqidi fikirlər səsələndirib. Müsahibənin həmin hissəsinə cavabı İlyas İsmayılovun oğlu Etimad İsmayılov verib. Azinforum.az hər iki müsahibəni təqdim edir.

 

Tanınmış hüquqşunas Aslan İsmayılovun BakiPost.az-a müsahibəsi:

– Aslan müəllim, son ayların ən qalmaqallı adamlarından birisiniz. BAXCP sədri Qüdrət Həsənquliyevlə bağlı sərt çıxışlar etdiniz – qarşı tərəf sizi məhkəməyə verdi. Bu məsələ bitməmiş deputat Fəzail Ağamalı, daha sonra Etibar Məmmədova hücuma keçib, onları aşağılayan ifadələr işlətdiniz. Eyni zamanda bir iş adamı ilə qarşılıqlı ittihamlarınız var. Nə baş verir? Bütün bunlar bir prosesin tərkib hissələridir, yoxsa, bu təsadüfən belə alınıb?

– Heç nə təsadüfi deyil. Mən indiyə kimi heç nəyi nə təsadüfən, nə də şəxsi maraq üçün etməmişəm. Sadəcə olaraq, mən ədalətsizliyə dözə bilmirəm. Mən Bakıya 1989-cu ildə gəlmişəm. Burada yüksək vəzifələrdə işləmişəm, meydan hərəkatından tutmuş, bu günə qədər  bütün proseslər gözümün önündə olub, bəzi vacib məsələlərin iştirakçısı olmuşam.

İndi özlərini qəhrəman hesab edənlərin hamısının “dabaqda gönünə bələdəm”. Mən Etibar Məmmədovu 89-dan – mitinqlərdən tanıyıram. Onda milli qəhrəman olmuşdu. Özüm onu sevə-sevə dinləmişəm. Amma sonra məlum oldu ki, bu adam dağıdıcıdır. 91-də Etibar AXC-ni bir hərəkat olaraq parçaladı və başladı bu təşkilatın içərisində qarşıdurma yaratmağa. Bir qədər keçdi, Rəhim Qazıyev məsələsi gündəmə gəldi, Milli Məclisin qapalı iclası keçirildi və o, vətənə xəyanətdə suçlandı, ona görə də istefa verdi. Həmin vaxt Etibar Məmmədov Rəhimi müdafiə edirdi. Bir qədər sonra Surət Hüseynov məsələləri ortaya çıxdı. Açıq görünürdü ki, Rusiya Surətin əliylə milli hökuməti yıxır, Elçibəyi devirmək istəyir. Onda da Etibar Məmmədov Surət Hüseynovun müdafiəsinə qalxdı. Bacarıqsız olmasına baxmayaraq, milli hakimiyyəti yıxmağa başladı.

Etibar Məmmədovla yanaşı Nemət Pənahlı və Şadman Hüseynov müdafiəçi qismindəydilər. Həmin vaxt Elçibəy də, İsa Qəmbərov da bu adını çəkdiyim şəxsləri satqınlıqda, vətənə xəyanətdə açıq ittiham edirdilər. Sonra bu proseslər yaddan çıxdı, başqa proseslər başladı. Hər şey xalq tərəfindən unuduldu, bunlar yenə maydan oxumağa başladılar.

98-ci ildə bu adam yenidən meydana gəldi, prezident seçkilərinə qatıldı. Həmin vaxt hakimiyyət dəyişikliyinin olması real idi. Amma Elçibəy və İsa Qəmbər seçkilərdən geri çəkildilər, Etibar Məmmədov qaldı tək. Bu dəfə onlar Etibarı satdılar. Ondan sonra başladı parlament alveri. 95-də Əli Kərimlinin dəstəsi getdi parlamentə, 2000-də yenə AXCP parlamentdə təmsil olundu. Sonra Əli Kərimli hakimiyyətlə əlaqələri kəsdi. Bundan sonra İsə Qəmbərin dəstəsi hökumətlə razılığa gəlib parlamentə qatıldılar, mandat aldılar. Bir sözlə, Heydər Əliyev dönəmində hakimiyyətə satılmayan adam qalmadı. Bir dəfə bu oynadı, bir dəfə o…

Bu proseslərin hamısı mənim gözümün önündə baş verib. Ona görə də, kimsə gəlib özünü başqa cür təqdim edəndə dözmürəm. Onların bu yeni nəslə yalan danışmalarına imkan vermək olmaz. Mənim heç vaxt siyasi iddiam olmayıb, olmayacaq da. Bu məsələləri ona görə deyirəm ki, bilirəm, 10-20 il sonra bu prosesin iştirakçılarının gorunu söyəcəklər. Satqınları da söyəcəklər, durub susanları da. İstəmirəm mənə “gorbagor” desinlər. İstəyirəm desinlər ki, bir kişi var idi, hər dəfə çıxıb olanları deyirdi, satqınları ifşa edirdi.

– Hadisələrin üstündən bu qədər vaxt keçib. Etibar Məmmədov siyasətdən tam kənardadır. Sizə qarşı münasibətin bu qədər kəskin olduğu vaxt niyə yenidən həmin məsələlərə qayıdırsız?

– O gün təsadüfən mətbuatdan oxudum ki, Etibar yenidən siyasətə qayıdır, Baş nazir olmaq istəyir. Ona görə elə belə yazdım. Sonrakı yazılar göstərdi ki, elə belə yazdıqlarım tam ünvana dəyib. Bu yenə meydana girib gəncləri aldatmaq istəyir. Gənc nəsil də baş verənləri bilmədiyindən bunlara yenidən inana bilər.

– Sizcə, bu mümkündürmü?

– Müstəqillik tarixinə nəzər salsaq görərik ki, bizim xalq çox sadəlövhdür və onu aldatmaq elə də çətin deyil. Rusiya öz mövqelərini möhkəmləndirən kimi Etibar Məmmədov, Rəhim Qaziyev və başqaları fəallaşır. Mətbuata fikir verin və dediklərmin şahidi olun. Bax indi həmin proses gedir.

– Bəlkə Qüdrət Həsənquliyevin Rusiya, İlham Rəhimovla bağlı dediklərinin kökündə elə bu proseslərin getməsindəndən qaynaqlanan narahatlıq dayanır? Siz də durub onu ittiham edirsiz…

– Səmimi deyirəm, əgər bilsəydim o yazı belə bir ajiotaj doğuracaq, mənim fikirlərimi o yönə istiqamətləndirəcəklər, heç vaxt həmin statusu yazmazdım. Mənim Qüdrət Həsənquliyevlə bağlı heç bir problemim yoxdur.

– Yəni Q.Həsənquliyevlə konfliktə getmək istəməzdiniz…

– Yox, əsas məsələ Qüdrət deyil. O mənimçün heç kimdi. Mənim o statusumu elə yozdular ki, guya, mən İlham Rəhimovu müdafiə edirəm, onun diqtəsiylə yazmışam. Mən özümü İlham Rəhimovdan qat-qat üstün sayıram. Mən dəyərimi bilən kişiyəm. Mən kiməsə qulluq edəsi olsaydım, elə gedib ölkənin Prezidentinə qulluq edərdim. Niyə gedib İlham Rəhimova qulluq edirəm? O baxımdan deyirəm ki, istəməzdim. Yoxsa Qüdrət mənimçün heç kim olub, indi də heç kimdi, gələcəkdə də heç kim olacaq. Sadəcə o fikirləri deməkdə məqsədim, hədəfim Qüdrət olmayıb.

Onu niyə hədəfə alım ki? Guya, kim bilmir ki, Qüdrətin dedikləri öz fikirləri deyil. Ona deyirlər belə danış, o da çıxıb danışır, kiminsə fikirlərini çatdırır. Yoxsa Qüdrət İlham Rəhimova – Putinin dostuna qarşı gedə bilər? Bunu hamı bilir ki, Qüdrət hakimiyyətdə müəyyən qrup adamların fikirlərini deyir. Mən bunu bilə-bilə Qüdrəti ittiham eləmərəm. Mənim aqresiyam Qüdrətə yox, onu danışdıran adamlara idi ki, qardaş düz eləmirsiz.

– Nəyi düz eləmirlər?

– Qarabağın açarı olan Rusiya ilə münasibətləri bu şəklə salmaq olmaz. Putinə söz deyə bilən və bununla bizim ən böyük problemimizin həllinə yardımçı ola biləcək adamı ittiham etməyin, əksinə, ondan istifadə edin. Bir baxın da ermənilərə. Nümunə götürün də. Öz təbliğləri üçün bütün vasitələrdən, bütün imkanlardan istifadə edirlər. Gedib Kim Kardaşyanı gətirirlər. Fahişə gəlib Ermənistanın prezidenti ilə görüşdü və milli qəhrəman oldu. Niyə belə etdilər? Ona görə ki, ondan müəyyən məsələlərin təbliği üçün istifadə də bilsinlər. Onlar fahişəni milli qəhrəmana çevirirlər, biz isə İlham Rəhimov, Vahid Ələkbərov  kimi adamları özümüzdən incidirik…

Mən hələ 94-cü ildə Prezident Aparatında işləyəndə “Azərbaycan” qəzetində bir səhifəlik yazı ilə çıxış etmişəm. Demişəm ki, mütləq Azərbaycanın diasporu yaradılmalıdır. Və o zaman öz imkanlarımdan istifadə edib müəyyən işlər də görmüşəm. Yəni bu məsələləri bilən, diqqət edən adamam. İlham Rəhimov sıradan bir adam deyil. Siz bunu niyə gözümçıxdıya salmısız? Niyə ondan düşmən düzəldirsiz? Mənim dediklərimin qayəsində bu olub ki, bunu özünüzdən uzaqlaşdırmayın, əksinə, istifadə edin. Yazmışdım ki, xaricdə yaşayan imkanlı, nüfuzlu adamları niyə didərgin salırsız? Niyə erməni fahişəni gətirib qəhrəman edib, sonra da ondan istifadə edir, siz isə Qarabağ probleminin açarını əlində saxlayan bir kişinin yanına gedə, onunla yeyib-içən adamı burdan diksindirirsiz?

– Amma hər kəsə bəllidi ki, İlham Rəhimovla yaxın münasibətləriniz var. Uzun illər bir yerdə olduğunuz “Ədalət Partiyası”nın  sədri İlyas İsmayılovla aranız dəyən kimi onunla kəskin münasibətlərdə olan İ.Rəhimovla yaxınlığa başlamısız… Demək istəyirəm ki, Qüdrət Həsənquliyev barədə yazdıqlarınızın Rəhimovun müdafiəsi kimi anlaşılması bir qədər də təbiidir.

– Gəlin belə danışaq. Yenə deyirəm, mən heç kimi özümdən artıq kişi hesab eləmirəm! Düzdür, vaxtilə İlyas İsmayılovla çox yaxın dost olmuşam. Amma bu gün tamam pis münasibət var. Düzdü, mən İlyas İsmayılovla yaxın olanda, onun İlham Rəhimovla münasibətləri çox pis olub. İlham həmişə mənə xoş münasibət bəsləsə də, mən ona qarşı aqressiv olmuşam və bunu aşıq nümayiş etdirmişəm, özü də İlyasa görə. İndi bəziləri öz şərəflərinə uyğun olaraq, mənə şər atırlar, deyirlər ki, guya mən onu “kaşelyoka”-filana dəyişmişəm. Mən heç kimi heç nəyə dəyişməmişəm. İlyas İsmayılov mənə xəyanət edib! Ona görə də onunla münasibəti kəsmişəm. Mən 20 il ərzində onun bir sözünü iki eləməmişəm. Həyatda elə adam tanımıram ki, ona mənim qoyduğum hörməti qoysun…

Yəni məsələlərin dostluğa dəxili yoxdur. Mən haqqı deyirəm, kim necə qanır, özü bilər. Hərə öz dünya görüşü, əxlaqına uyğun şəkildə nəyisə qavrayır. Mən prinsiplərimi qarına dəyişənlərdən deyiləm.

– BAXCP ilə qarşıdurmadan sonra İlham Rəhimovla əlaqəniz, söhbətiniz olubmu?

– Bəli. Bir dəfə görüşmüşük.

– Nə deyir, bu məsələlərə reaksiyası necə oldu?

– Açığı deyim ki, mən bu gün içimdə İlham Rəhimovdan narazıyam. Ona görə ki, məndən çox onu söyürlər və o susur. Onun imkanı da mənimkindən dəfələrlə çoxdu. Bəs niyə çıxıb birinə cavab vermir?! Ortalıqda mən qalmışam. Bilirsən ki, mən prinsiplərimlə ilə bir yerdə səni də sən demədən, kişiyana müdafiə etmişəm! Bir reaksiyan olsun da!

– Hər halda bilir ki, sizi məhkəməyə veriblər… Nə deyir bu barədə?

– Görüşəndə dedim. O isə dedi ki, əşi boş ver, məhkəmə söhbətləri boş seydi. Elə bu da mənim xətrimə dəydi. Ola bilər səninçün boş seydi, amma axı mənə ağızlarına gələni deyirlər… Onun imkanları, işçiləri var. İstəsə mənə olan hücumların qarşısını aldıra bilər. Qalmışam bir ordunun qabağında tək. Hamısını qısqırdırlar üstümə. Bu qədər təhqirlərə dözmək elə bilirsiz asandı? Ola bilsin o ifadələrə layiq olanlar üçün bu asandır. Mən özümü zorla saxlayıram. İki oğlum var, onları da zorla saxlayıram. Xaricdə yaşasalar da zorla qarşılarını alıram. Arada istəyirəm, gedib öldürəm o alçaqları. Bu da mənə yaraşmaz.
Düzdü, məni söyənlərin hamısını vermişəm məhkəməyə. Amma məhkəmələr də sifariş alıb, iddialarımı müxtəlif bəhanələrlə götürmür.

– Kimlərdi onlar?

– Elçin Mirzəbəyli, Niyaməddin Orduxanli, Taleh Şahsuvarlı, Əli Həziquliyev…

– Bəs belə çətinliklərlə üzləşdiyiniz bir vaxtda, niyə başqalarını da prosesə qoşdunuz? Məsələn, Fəzail Ağamalını…

– Onunla necə odu, heç yadımda deyil. Yəqin təsadüfi olub.

– Bayaq dediniz heç nə təsadüfi deyil, ona görə soruşdum…

– Təsadüfi o baxımdan ki, mənim Fəzail dərdim yoxdu. Fəzailin hansı yuvanın quşu olduğunu hamı yaxşı bilir. Onun keçmişi də, indisi də… Mən həmin yazımda tək Fəzaildən söz açmamışdım. Biləsuvarda camaat ayağa qalxanda mən deputatların siyahısına baxdım. Dedim hamı Vahid Əhmədov deyil ki, Qubada narazılıq olanda xalqın qarşısına çıxsın, ağsaqqallıq eləsin. Fəzail və bir neçəsinin adını çəkib sual etmişdim ki, bu adamlar xalqın qarşısına çıxa bilərlər? Bunların işi xalqın yanında olmaq deyil, Milli Məclisdə tapşırıq yerinə yetirməkdir. Sonra da o mənə zəng elədi, hədə diliylə danışdı, “odboy” verdim. Əslində onun zəngi də, danışıq tərzi də göstərir ki, millət vəkilliyinə aidiyyəti yoxdur. Qanunverici orqanda əyləşən adam necə hədə dilində, küçə ifadələriylə danışa bilər? O Azərbaycanda nəyi təbliğ edir? “Oğruları”, cinayətkar aləmin adamlarını. Buna deputat demək olarmı?
Qaldı Etibar Məmmədova, onun da kim olduğunu hamımız bilirik.

– Bütün bunlar az qala hamıda belə bir fikir formalaşdırır ki, Aslan İsmayılov intriqaçıdır, qalmaqalı sevir… 

– Mən elə adam deyiləm. Səmimi deyirəm bu cür adamlardan da zəhləm gedir. Əlavə olaraq bildirim ki, buna sağlamlığım da imkan vermir.

– Eyni vaxtda hamıya, xüsusən eyni regionun adamlarına cəbhə açmaq, həm də xüsusi bir məqsədin olması fikri də yaranır…

– Həmin adamların eyni regiondan olması ağlıma gəlməyib. Yeni informasiya oldu. Qaldı ki, məqsəd məsələsinə, vallah-billah heç bir məqsədim yoxdu. Mənim elədiklərimin 99 faizi balalarıma, bir faizi millətimə görədi. Mən istəmirəm nə vaxtsa, mən öləndən sonra mənim balalarıma mənim haqqımda da gorbagor desinlər.

– Bu proseslərin axırı nə ilə qurtaracaq sizcə?

– Bəlkə də öldürəcəklər… Qarşıda məni hansı təhlükələrin gözlədiyini bilən adamam. Tutula da bilərəm, öldürülə də bilərəm. Amma bunun heç biri məni qorxutmur. Artıq 60-a yaxınlaşıram Bu günə kimi şərəflə yaşamışam. Həyatda olan bütün iddialarımı təmin etmişəm. Kişi kimi də ölmək istəyirəm. Hörmət elədiyim vəkil Adil İsmayılov bir dəfə mənə dedi ki, səni öldürəcəklər, o qədər düşmən qazanmısan kimin öldürdüyünü müəyən edə də bilməyəcəyik.
Bu gün məni söyənlərin hamısını alın siyahıya. Yadda saxlayın. 20 ildən sonra onların harda olduğuna da baxarsız, mənim də.
AXC şinelindən çıxanların hamısı zəhərə bulaşıb. O qədər intriqalar, boş-boş qalmaqallar görüblər ki, heç istəsələr də başqa cür ola bilməzlər. Vaxtilə Əli, İsa Rəhim Qazıyevə satqın deyirdilər. İndi hamısı susub, Rəhim meydana gəlib. O gün “Azadlıq”a zəng elədim. Dedim, ay qardaşlar, siz palaz-palaz yazılar yazıb, bunun satqın olduğunu bildirirdiniz. İndi nə oldu, nə dəyişdi ki, bu adama meydan verirsiz? Dedilər, indi bizim məqsədimizə uyğun gəlir. Mən bu adamlara nə deyim? Heç vaxt marağıma uyğundur prinsipini qəbul etməmişəm.

– Aslan müəllim, dediklərinizdən belə görünür ki, vətənpərvər adamsız, dövlətə, millətə görə narahatsınız.  Amma indi siz özünüz də satqınlıqda ittiham olunursuz. Mən, vaxtilə SSRİ-nin agenti kimi ölkəyə göndərilməyinizlə bağlı iddiaları nəzərdə tutmuram. Söhbət “Xəmsə” restoranının sahibi Mürvət Həsənlinin sizin açıqlamalarınıza qarşılıq olaraq irəli sürdüyü ittihamı – erməniləri müdafiə etməyinizi nəzərdə tuturam. Bunla bağlı nə deyə bilərsiz?

 
********************************************************************************************************

et

 

«HANSI BİQEYRƏTƏ XOŞ GƏLMƏK İSTƏYİR, BƏLLİDİR…» – Aslan İsmayılova cavab

Ədalət Partiyasının sədr müavini Etimad İsmayılov vəkil Aslan İsmayılovun “BakiPost.az” saytına müsahibəsində bu partiyanın sədri və atası İlyas İsmayılovla bağlı işlətdiyi hörmətsiz fikirlərə cavab verib. E.İsmayılov “AzPolitika”ya göndərdiyi yazılı cavabında A.İsmayılovun Ədalət sədrinə hansı səbəbdən qəzəbli olmasını da açıqlayıb.

Etamad İsmayılov vəkilə cavabında yazır: “Təəssüf… Çox təəssüf. Səmimiyyətlə bildirirəm ki, bu açıqlamanı yazmaqla özümü narahat hiss edirəm. Çünki bu açıqlamam şəxsiyyətlərinə dəyər verdiyim, xətirlərini uca tutduğum, çörək kəsdiyim insanların qəlbinə dəyəcək. Uca və Əzəmətli Allahım məni bağışlasın. Amma kimlərəsə yarınmaq, içindəki natamamlıq kompleksini çözmək məqsədiylə 79 yaşlı atamı – İlyas İsmayılovu uzun müddət hədəfə alan birisinin cavabını verməyi özümə oğul borcu bildim.

Mən Aslan İsmayılovu 25 ilə yaxındır tanıyıram. Həyatının böyük bir hissəsi gözümün önündə keçib. Çox şərəfli, əxlaqlı, işıqlı bir ailəsi var. Özü ilkin vaxtlarda məndə ədalətli, qabiliyyətli, təvazökar, aza qane olan insan təsəvvürü yaratmışdı. Vaxt keçdikcə onu bir çox vəziyyətlərdə gördüm, necə mənfiyə doğru transformasiya olunduğunun şahidi oldum. Buna baxmayaraq, hər zaman onun hörmətini saxladım, sıxıntılı vaxtlarında, Allahın rizasıyla, hər cür dəstək oldum. O da mənə qarşılığını verirdi.

Bildiyiniz kimi, mən 2008-ci ildə Rusiyada şərlənib həbs olundum. Allaha həmd-səna olsun, uzun mübarizədən sonra 2012-ci ildə kassasiya şikayətim təmin olundu və mən azadlığa çıxdım. Tam bəraət almağımın qarşısını Rusiya FTX aldı. Bildirdilər ki, FTX səni tutub deyə bəraətlə buraxa bilmərik. Bakıya dönəndə zəng etdiyim insanlardan biri də Aslan İsmayılov oldu. Dəfələrlə zəng etməyimə baxmayaraq, mənə cavab vermədi. Başqa bir nömrədən zəng edəndə səsimi eşidib tutuldu, “zəng edirəm niyə cavab vermirsiniz” sualıma cavabında bildirdi: “…Etimad, İlyas müəllim mənim xətrimə dəyib. Mən ona zəng etdim, danşıdıq. Sonra İlyas müəllim telefonu söndürmədi və mən eşitdim ki, yanındakı adama deyir ki, bunun məzhəbi bəlli deyil, özü də bilmir nə istəyir. Ona görə də, mən İlyas müəllimə aidiyyatı olan adamlarla təmas saxlamaq istəmirəm”.

Mən Aslan İsmayılova dedim ki, zatən İlyas müəllim bu sözləri sizin özünüzə də hər zaman deyib, dəngəsiz, fürsətcil olmağınızı qınayıb. Qaldı ki, təmas məsələsinə, sizin seçiminizə hörmətlə yanaşıram.

2013-cü ilin Prezident seçkiləri ərəfəsiydi. Aslan İsmayılov “Azadlıq” qəzetinin səhifələrində Milli Şuraçılarla birlikdə seçkiləri “oyun” adlandıraraq, İlyas İsmayılovu bu seçkilərdə “aktyorluqda” ittiham etdi. Ədalət Partiyasının üzvləri keçmiş silahdaşlarının (Aslan İsmayılov həm Ədalət Partiyasının, həm də ADP-nin üzvü olub – E.İ.) bu qədər əndazəsiz davranışına qarşı sərt mövqe bildirmək istəyəndə İlyas müəllim buna qarşı çıxıb dedi ki, ehtiyac yoxdur, hərkəsin öz fikri ola bilər, hər kəs öz əxlaqına görə davranır. Buna baxmayaraq, mən o zamanlar “Azpolitika.info” saytına müsahibə verərək, Aslan İsmayılova üz tutub bildirdim ki, arada olan duz-çörəyi, xətir-hörməti qaldırmaq istəyirsə, kimin kim olduğunu sübutlarla xalqa bildirək. Bir muddət susdu. Onun və bizi sifarişli siyasi oyunbazlıqda ittiham edənlərin ən gözəl cavabı Ədalət Partiyasının seçki nəticələrini tanımaması oldu. İnsaf naminə deyim ki, hörmətli yazar Elnur Astanbəyli “İlyas müəllim, haqqınızı halal edin” sərlövhəli bir yazıyla çıxış edərək, səhvlərini etiraf etdi. Çünki cılız insan deyil.

Bu gün Aslan İsmayılov yenə də İlyas İsmayılovu hədəfə alıb. Özü də hörmətsiz şəkildə. Atası yaşında adama “İlyas” deyir. Nəyə görə edir bu “qoçuluğu”, hansı namussuz biqeyrətə xoş gəlmək istəyir, mənə bəllidir…

Amma bu gün də Allahıma sığınaraq, Aslan İsmayılova üz tutub deyirəm ki, qərar sizin, kimin kim olduğunu xalqa bildirək? Cavabını jurnalistlər öyrənsinlər”.

Azinforum.az

Həmçinin oxuyun

Bakı meriyasında müşavirə keçirilib, bu şəxsə şiddətli töhmət verilib

Bakı Şəhər İcra Hakimiyyətində martın 26-da Binəqədi rayonunda qadının liftin qapıları arasında qalaraq ölməsi faktı …

Bir cavab yazın