Cümə axşamı , Yanvar 28 2021
Ana səhifə / Cəmiyyət / Hansısa Ruslan Bakı rayonlarından birində “hakimiyyət” olub… – ŞİKAYƏT

Hansısa Ruslan Bakı rayonlarından birində “hakimiyyət” olub… – ŞİKAYƏT

Oliqarxlar icra hakimiyyətlərinin məmurları vasitəsilə Bakının ən “yağlı” ərazilərini tutmaqda davam edirlər. Və əgər onlar əvvəllər öz qəsbkar əməllərinə heç olmasa “qanuni don” geyindirirdilərsə, indi elementar hüquq və ümumbəşəri normalara məhəl belə qoymur və daha qətiyyətlə hərəkət edirlər.

Xətai rayonundakı Turşu küçəsi 23/25-də yaşayan Şamil Abbasovun virtualaz.org-un redaksiyasına müraciəti də məhz bu mövzudadır.

“Biz, qardaşım və anamla – Ramil Abbasov və Məhəbbət Abbasova ilə, necə deyərlər, bir parça torpaqda ümumi sahəsi 226 kv.metr olan üç kiçik ev tikmişik. Keçən ilin dekabrında Xətai Rayon İcra Hakimiyyətinin (RİH) əməkdaşları Elcan Əhmədov və Etibar Əhmədov gözlənilmədən bizə gəldilər. Məmurlar tələb etdilər ki, biz dərhal öz evlərimizi tərk edək, çünki bizim evlərimiz söküləcək və bu ərazidə dövlət sifarişinə uyğun olaraq, çoxmərtəbəli bina tikiləcək. Kompensasiya kimi bizə 180 min manat təklif etdilər. Üç evə görə!” – deyə Ş.Abbasov danışır.

Sonra aydın oldu ki, ərazidə tikintini “İnkişaf ADEC” şirkəti həyata keçirəcək, ancaq hansı əsasda o belə funksiyaları öz üzərinə götürüb və niyə buradakı evləri də elə o sökəcək, heç kim izah edə bilmədi. Məsələ aydındır: məhz bu dövlət sifarişinin yerinə yetirilməsi üçün heç bir tender keçirilməyib!

Bütün bunlar Abbasovlara şübhəli görünüb və onlar halal pulları və öz əlləri ilə tikdikləri evlərdən çıxmamağa qərar veriblər. Ancaq məmurların xəbərdarlığından heç bir ay keçməmiş, yeni il bayramlarından dərhal sonra bura RİH-in başqa əməkdaşları gəlib və 3 ailəni, sözün həqiqi mənasında, küçəyə atıblar.

“Gün ərzində bizim evimizi yerlə-yeksan etdilər, hətta əşyalarımızı çıxarmağa belə imkan vermədilər. Biz hara müraciət edək, belə özbaşınalığa necə və nə ilə cavab verək?”, – deyə Şamil Abbasov çaşqınlıqda əllərini yelləyir.

Bu suala vəkil Elmar Sulyemanov son dərəcə aydın cavab verdi: “Kiminsə şəxsi evinin sökülməsi yalnız məhkəmənin qərarı ilə həyata keçirilə bilər. Hətta əgər inşaatçı həqiqətən dövlət sifarişini icra edirsə… Ancaq göründüyü kimi, “İnkişaf ADEC” hər hansı tenderdə iştirak etməyib, deməli, onun hərəkətinin də dövlət sifarişi ilə əlaqəsi yoxdur”.

 

Abbasovların evlərini sökməyə kimin sərəncam verdiyini aydınlaşdırmaq üçün Xətai RİH-in baş memarı Vadim Surxayevlə əlaqə saxladıq.

Onun cavabı sitat gətirilməyə layiqdir: “Mən anlamıram, Abbasovlar ailəsi niyə virtualaz.org-a müraciət edir? Bəyəm sizin saytınız məhkəmə orqanıdır? Əgər Abbasovlar öz evlərinin icra hakimiyyəti tərəfindən sökülməsindən narazıdırlarsa, qoy məhkəməyə müraciət etsinlər. Redaksiyanın buna nə dəxli var?!”.

“Bəs Rayon İcra Hakimiyyəti niyə qanunun tələb etdiyi kimi, məhkəməyə müraciət etməyib və Abbasovların xüsusi mülklərini özbaşına söküb” sualına cavabında baş memar qürurla bildirdi: “Biz dövlət sifarişinə əsasən hərəkət edirik”.

Memar hər halda dövlət sifarişi, hətta “Ağ şəhər” dövlət layihəsi haqda təkrar danışdı və bildirdi ki, bu layihə ilə əlaqədar Xətai rayonunda hər şey söküləcək və hər şey yenidən tikiləcək. Amma Vadim Surxayev bu “söküntü-tikinti” prosesində evlərini itirən vətəndaşların harada və necə yaşayacaqlarını, həmin “Ağ şəhər”də onlara ev verilib-verilməyəcəyini dəqiqləşdirmədi…

Virtulaz.org daha bir suala aydınlıq gətirmək istədi: “Tikinti şirkətinin seçimi zamanı tender keçirilibmi?”

Cavabında yalnız bunu öyrənə bildik ki, “İnkişaf ADEC” MMC ölkənin inşaat bazarında 2007-ci ildən fəaliyyət göstərir. Şirkətin təsisçisi Ruslan Sadıxovdur. Ancaq nə təsisçinin özü, nə də bu şirkətdən başqa kiminləsə əlaqə saxlamaq cəhdlərimiz alınmadı…

Həmçinin oxuyun

Oqtay Əsədovun Sulutəpədəki villası – FOTOLAR

Milli Məclisin keçmiş sədri Oqtay Əsədovun Bakının Sulutəpə qəsəbəsindəki villası ilə bağlı yeni məlumatlar yayılıb. …