Bazar , Avqust 25 2019
Ana səhifə / Cəmiyyət / “Avropada irqçilik, dözümsüzlük artır” – Fuad Ələsgərov

“Avropada irqçilik, dözümsüzlük artır” – Fuad Ələsgərov

“Yaxın Şərqdə yaşanan miqrasiya problemləri Azərbaycana da təsir edir. Azərbaycana saxta sənədlərlə getdikcə daha çox miqrant daxil olmağa çalışır”.

Bunu Azərbaycan Prezident Administrasiyasının Hüquq mühafizə orqanları ilə iş şöbəsinin müdiri Fuad Ələsgərov Bakıda keçirilən Müstəqil Dövlətlər Birliyinə (MDB) üzv ölkələrinin miqrasiya orqanlarının rəhbərləri Şurasının 19-cu iclasında çıxışı zamanı deyib.

“Bu gün miqrasiya sahəsində böhranın təsirinin ən bariz nümunəsi Suriyadan milyona yaxın qaçqının kütləvi şəkildə Avropaya gedişidir. Yüz minlərlə suriyalı qaçqın Avropa ölkələrində sığınacaq axtarmaq məcburiyyətində qalıb. Ancaq bu ölkələrdə onlara, o cümlədən qadınlara və uşaqlara qarşı sərt və qəddar siyasət nümayiş etdirilir”, – deyə F.Ələsgərov bildirib.

PA rəsmisi qeyd edib ki, güclü miqrasiya axını Qərb ölkələrinin siyasətinin nəticəsində yaranıb. Onun sözlərinə görə, hazırda Avropada miqrasiya məsələlərinin həll üzrə aktiv müzakirələr aparılsa da, xüsusi səmərəli həllər hələ də tapılmayıb:

“Bir çox hallarda qaçqınların hüquqları qorunmur. Orta Şərqdə baş verən proseslər fonunda Avropada qaçqınlarla təhqiramiz davranılır. Avropa İttifaqında miqrasiya problemi ilə effektiv həll mexanizmi hələ tapılmayıb. Bir çox halda adi insan hüquqlarına əməl edilmir. Digər tərəfdən, miqrasiya böhranı fonunda Avropada irqçilik, dözümsüzlük, ksenofobiya, islamofobiya, milliyyətçilik xüsusiyyətləri də artır və bəzi avropalı siyasətçilər populyarlıqlarını artırmaq üçün tez-tez bunların adlarını çəkir”, – deyə şöbə müdiri bildirib.

F.Ələsgərov Azərbaycanın bu sahədə əməkdaşlığın inkişafına böyük əhəmiyyət verməklə miqrasiya problemlərinin həllinə öz töhfəsini verdiyini əlavə edib. O, əlavə edib ki, Ermənistanın işğalına məruz qalan Azərbaycan ciddi miqrasiya problemi ilə üzləşib: “Ermənistanın etnik təmizləmə siyasəti və Azərbaycan torpaqlarının 20% faizini işğal etməsi nəticəsində Azərbaycan postsovet məkanında böyük miqrasiya axını ilə üzləşən ilk ölkə olub. Bir milyondan çox adam öz doğma torpaqlarını tərk etmək məcburiyyətində qalıb, respublikanın hər səkkiz nəfərindən biri qaçqın olub”.

Azərbaycanda “ASAN Visa” xidməti noyabrda işə başlayacaq deyən PA rəsmisi qeyd edib ki, bu, ölkəmizə gələrkən viza alınması prosesinin rahatlığını əhəmiyyətli dərəcədə yüksəldəcək.

Həmçinin oxuyun

Krım sözünün yaranması və Krım türklərinin tarixçəsi

Tarix boyu Krım müxtəlif xalqlar tərəfindən idarə edilib. Kimmerlər bu yarımadada e.ə. VII əsrdə məskən …

Bir cavab yazın