Azinforum.az İnformasiya Portalı Onlayn Xəbər Portalı
Bakı şəhər sakini Əhmədov Rüfət Musa oğlu Bakı Şəhər Dövlət Yol Polisi əməkdaşlarının fəaliyyətindən ciddi narazıdır.
Şikayətçi Azinforum.az-a açıqlamasında bildirib ki, 13 sentyabr 2015 ci il tarixində ona Badamdar dairəsində polis geyimində olan bir nəfər əli ilə işarə edib:
“Mən elə bildim ki, taksi saxlatdırır. Onun xarici görkəmində DYP əməkdaşı olduğunu sübut edən heç bir əlaməti hiss etmədim. Adəti üzrə belə hallarla çox rastlaşırıq. Müxtəlif kateqoriyalı şəxslər taksi saxlatmaq üçün yoldan keçən maşınlara əlləri ilə işarə edirlər. Təbiidir ki, onların arasında mənzilı başına çatmaq istəyən polislər də ola bilər. Taksi fəaliyyəti ilə məşğul olmadığım üçün maşını saxlamadım. Təxminən 200 metr qabaqda 99 YP 365 dövlət nömrə nişanlı DYP maşını məni saxladı. Mənə deyildi ki, güya DYP əməkdaşının “saxla” əmrinə tabe olmamışam.
Bildirilən iradla razılaşmadım və dedim ki, işarə edən yol polisi əməkdaşı olubsa, niyə onun əlində avtomobilləri saxlamaq üçün xüsusi vasitə sayılan ağacı olmayıb? Mən hardan bilim ki, o, DYP işçisidir? Tamamilə əsasız yerə mənə iki cərimə yazdılar: biri, “Saxla” əmrinə tabe olmamağa , digəri isə, dairəvi yolda digər nəqliyyat vasitələrinə yol verməməyə görə . DYP əməkdaşı Əsədov Elməddin Elman oğlu tərəfindən tərtib edilən 838722 nömrəli pratakolla razılaşmadığıma və şərləndiyimə dair qeyd əlavə etmişəm. Ümidvaram ki, DYP rəhbərliyi bu məsələnin araşdırılaraq, obyektivliyin ortaya çıxmasında mənə yardımçı olacaq”.
Azinforum.az olaraq bildiririk ki, vətəndaşın cərimələnməsinə dair redaksiyamıza təqdim etdiyi rəsmi sənəddə maraqlı detala rast gəldik. Belə ki, pratakolu tərtib edən Əsədov Elməddin Elman oğlu rütbəsini polis çavuşu kimi deyil, serjantı kimi yazaraq təqdim edib. Hər halda, Nüşirəvan Səfərovun işçilərinin özlərini SSRİ dövründəki kimi təqdim etməsi olduqca maraqlıdır…
Yazıda adları çəkilən hər bir şəxsin mövqeyini dinləməyə hazırıq.
Rövşən ƏLİ
