Azinforum.az İnformasiya Portalı Onlayn Xəbər Portalı
Bu gün Bakı Ağır Cinayətlər Məhkəməsində Rabitə Nazirliyinin yüksək vəzifəli şəxslərinin cinayət işi üzrə məhkəmə prosesi davam etdirilib.
“Qafqazinfo”nun verdiyi xəbərə görə, hakim Əfqan Hacıyevin sədrliyi ilə keçirilən prosesdə Vergilər Nazirliyinin nümayəndəsi Nail Xəlilov iştirak edərək artıq şikayətçi olmadıqlarını bildirib.
N.Xəlilov qeyd edib ki, nazirlik təqsirləndirilən şəxslərə qarşı verilən 255 min manatlıq mülki iddiadan imtina edir: “Rabitə Mülki Tikinti” MMC və “Təmir Təchizat Servis” MMC-in vergi borcları yoxdur, artıq ödənilib”.
Daha sonra şahidlər dindirilib. Həsən Orucov bildirib ki, özünün yaratdığı MMC vasitəsilə tenderlərdə qalib gələrək tikinti işləri görüb və nazirlikdən ayrılan pulların bir hissəsini Oqtay Rüstəmova verib.
O.Rüstəmov isə bunun yalan olduğunu deyib. Vidadi Zeynalov MMC rəhbərlərinin nazir Əli Abbasovun göstərişi ilə tenderlərdə qalib olduğunu deyib.
Hakim Əfqan Hacıyev bildirib ki, şahidlərdən biri boşanıb və həyat yoldaşına aliment vermədiyi üçün ölkədən qaçıb, biri vəfat edib, digərləri isə xəstə olduqları üçün prosesə qatıla bilmirlər.
Vidadi Zeynalova sərbəst ifadə vermək təklif olunsa da, o yenə də bundan imtina edib: “İttiham aktındakı qüsurlu məsələlər, maliyyə işləri tam araşdırıldıqdan sonra ifadə verəcəyəm”
Məhkəmə prosesi fevralın 15-də davam etdiriləcək.
