Ana səhifə / Araşdırma / “Qara bazar”da tuthatutdur – dollar alverçiləri hədəfdə…

“Qara bazar”da tuthatutdur – dollar alverçiləri hədəfdə…

Və ya turistlərin Bakıda valyutadəyişmə problemi

Azərbaycanda valyutadəyişmə məntəqələrinin lisenziyası ləğv edildikdən sonra “qara bazar”a tələbat artdı. Son günlər bankların dollar satışını dayandırması da “qara bazar”da canlanmaya səbəb oldu.  Dollara ehtiyacı olanlar məcbur olub banklara və bank filiallarına, orada mümkün olmadıqda isə qeyri-leqal fəaliyyət göstərən dollar alverçilərinə üz tutmalı olurlar. 
Əlində olan vəsaiti dollara çevirmək istəyən vətəndaşlar, idxal-ixrac əməliyyatları ilə məşğul olan sahibkarlar və  ölkəyə gələn on minlərlə turist də valyuta dəyişməklə bağlı problem yaşayır. Birincilər, manatı dollara, turistlər isə əllərindəki dollar və avronu manata çevirə bilmirlər. Xüsusən qeyri-iş günlərində  banklar bağlı olduğundan insanların son ümid yeri “qara bazar” olur.
Lakin son günlər polisin paytaxtın mərkəzi küçələrində qanunsuz valyuta dəyişənlərə qarşı əməliyyatlar keçirməsi, dollar alverçilərinin saxlanması “qara bazar”ı da dağıtdı. Amma az sayda olsa da, yenə də gizli şəkildə valyuta satanlara rast gəlmək mümkündür.
“Qara bazar”da həbslər dalğası…
 
Musavat.com-un müxbiri  “28 May” metro stansiyası yaxınlığındakı “qara bazar”da olub və vəziyyətlə maraqlanıb.
Əvvəlki günlərlə müqayisədə  dollar alverçilərinə daha az rast gəlinir. Fəaliyyət göstərənlər isə gizli işləyirlər. Müştəri qismində onlara yaxınlaşıb, dolların və rublun məzənnəsi ilə maraqlandıq. “Qara bazar” alverçiləri dolların kursunun alışını 1.70 AZN-dən, satışını isə 1.71 AZN-dən hesablayırlar. Rus rublunun alış qiyməti 0.0250, satışı isə 0.0280 AZN-dir.
Özünü Rəsul kimi təqdim edən şəxs tanıdığı bir çoxunun həbs olunduğunu  dedi: “Yeganə qazanc yerimiz buradır. Hər dəqiqə qorxu içindəyik ki, gəlib həbs edəcəklər. İki gün əvvəl tanıdığımız şəxslər saxlanıldı. Biz burada milyon qazanmırıq ki… Şənbə və bazar günləri banklar bağlı olduğundan10-15 manat çörək pulu üçün çıxırıq”.
Turistlər ac və evsiz qalsın?
Valyutadəyişmə məntəqələrinin olmaması turistləri də çətin vəziyyətə salır. Onlar da  əllərindəki xarici valyutanı milli valyutaya çevirməkdə çətinlik çəkirlər. Həftənin 5 günü, saat 17:00-a kimi işləyən banklar çox vaxt turistlərin üzünə bağlı olur. Bu səbəbdən onlar istədikləri zaman valyuta dəyişə bilmirlər.
“Qara bazar”da dollar dəyişən həmsöhbətim turistlərin valyuta dəyişməkdə çətinlik çəkdiklərini dedi: “Tutaq ki, turist axşam saat 18:00-da Azərbaycana çatdı. Bu saatda isə nə bank, nə də onun filialları açıq olur.  Belə olan təqdirdə turist ac qalacaq və küçədə yatmalı olacaq. Əgər bu vəziyyət şənbə və bazar günləri baş verərsə, vay o turistin halına… Bu, ölkəmizin imicinə də zərərdir. ”Qara bazar”ın yeri burada görünür. İstənilən vaxt gələn xarici rahatlıqla pulunu xırdalaya bilir. Məzənnə də banklardan sərfəlidir”.
 
Banklar dollar satışını tam dayandırıb
Banklar isə ümumiyyətlə, dollar satışı həyata keçirmir. Eksperiment olaraq, Dilarə Əliyeva 241 ünvanında yerləşən bank filiallarına da baş çəkdik. Məzənnəni göstərən tablolarda alış qiymətləri yazılsa da, satış qiyməti qrafası boş saxlanılmışdı. “Bank Standart”ın filialından bizə  bildirdilər ki, dollar satışı həyata keçirilmir. Nizami rayonu ərazisində yerləşən digər  banklarda da vəziyyət eynidir.
“Xalq Bank”dan da dollar satışının dayandırıldığını bildirdilər. Bu banklarda dolların alış qiyməti 1.68 AZN  göstərilib. Yəni hər 100 manata görə “qara bazar” qiymətindən 2 manat aşağı…
Bu durumdan bələdçilər qazanır…
Bu durum ölkəyə gələn turistlərə bələdçilik edən şəxslərə daha çox sərf edir. Onlar həm xarici qonağın işini asanlaşdırır, həm də özləri qazanırlar. Bələdçilər özləri ilə kifayət qədər pul götürüb, yerindəcə valyutanı dəyişirlər. Həm bələdçilikdən, həm də valyutadəyişmədən qazanırlar. Bu zaman dolların alışı da fərqli olur. Bələdçi şəxslər dolların alışını 1.50 AZN-dən hesablayırlar.  Xarici turistlər də valyutadəyişmə məntəqələri axtarmağa və ya “qara bazar”a getməyə məcbur qalmırlar.





Həmçinin oxuyun

Rza Talıbov bu məsələyə görə Fuad Nəcəfli ilə Naxçıvanda görüşmək istəyib…

Bir neçə gün əvvəl Naxçıvan Ali Məclisində qəribə bir gərginlik yaşanıb. Muxtar respublikadakı mənbələrdən Azpolitika.info-ya …

Bir cavab yazın