Cümə axşamı , Mart 28 2024
Ana səhifə / Araşdırma / Polkovnik generalları işfa edən ifadə verib: “Bizi özlərinə yaxın buraxmırdılar”

Polkovnik generalları işfa edən ifadə verib: “Bizi özlərinə yaxın buraxmırdılar”

MTN polkovnikinin istintaqa verdiyi ifadəsi məlum olub. Şöbə rəisi olan polkovnik dedikləri ilə həbsdə olan MTN generallarının ayrı-ayrı şəxsləri qanunsuz olaraq necə dinləməsini danışıb və üzləşdirmə zamanı onları ifşa edib.

Həmin polkovnik 2006-cı ildən MTN-nin Monitorinq Mərkəzinin 5-ci şöbəsinin rəisi vəzifəsində çalışmış polkovnik Soltanov Vidadi Seyfulla oğludur.

Polkovnik ifadəsində MTN-nin Anti-Terror Mərkəzinin rəis müavini polkovnik İlqar Əliyev, Monitorinq Mərkəzinin rəisi general-mayor Teymur Quliyev və digərləri barəsində ifadə verərək onların qanunsuz əməllərindən danışıb.

MTN ləğv edildikdən sonra hazırda Dövlət Təhlükəsizlik Xidmətində (DTX) fəaliyyətini davam etdirən polkovnik ifadəsində söyləyib ki, vəzifəsi MTN-nin strukturlarından daxil olan tapşırıqların icrasını və mərkəzdə olan kompüterlərdən məlumatların sızma kanallarının təhlükəsizliyinə nəzarət etmək olub.

“Şöbənin baş mütəxəssisi (hədəf inzibatçısı) Fərhad Atayevin vəzifəsi nəzarətə qoyulan mobil nömrələri sistemə daxil etmək, tapşırıq blanklarının qeydiyyatını aparmaq, kompüterlərdə məlumatların sızma kanallarını yoxladıqdan sonra nəticəsinə dair akt tərtib etmək idi. Monitorinq Mərkəzinin rəisi general mayor Teymur Quliyev dəfələrlə konkret şəxslərin istifadələrində olan mobil nömrələrlə aparılan danışıqlara qulaq asılması barədə mənə qeyri-rəsmi, qanunsuz göstərişlər verib”- deyə polkovnik ifadəsində deyib.

Vidadi Soltanov həmçinin onu da etiraf edib ki, MTN zabitləri tutduqları vəzifələrdən istifadə edərək sahibkarları dinlədikləri kimi, şəxsi münasibətlərinin pis olduğu şəxsləri də dinləyiblər:

“İlqar Əliyevlə Teymur Quliyev dost idi. Günlərin birində söhbət zamanı Teymur Quliyev mənə dedi ki, “İlqar Əliyevlə MTN-dən çıxarılan şəxslər arasında intriqa var. O, xahiş edib ki, həmin şəxslərin istifadələrində olan mobil nömrələr nəzarətə götürülərək telefon danışıqlarına qulaq asılsın”. Sonra Teymur Quliyev, İlqarın ona verdiyi sabiq MTN əməkdaşlarına aid mobil nömrələri mənə verdi. Mən də həmin nömrələrin qanunsuz olaraq sistemə daxil edilməsini təmin etdim. Hətta İlqar Əliyevin verdiyi mobil nömrələrlə aparılan danışıqlara şəxsən özü və Monitorinq Mərkəzinin rəisi Teymur Quliyev otaqlarda olan texniki vasitələrlə qanunsuz qulaq asırdılar”- deyən polkovnik bildirib ki, bütün göstərişlər şifahi şəkildə həyata keçirilib.

Şahid kimi dindirilən polkovnik əlavə edib ki, Teymur Quliyev şifahi göstərişlər əsasında nəzarətə qoyulan mobil nömrələrə dair tapşırıqların çoxunu İlqar Əliyev vasitəsi ilə rəsmiləşdirib: “MTN-nin 4-cü Baş İdarəsinin rəis müavini Füzuli Əliyev də bir neçə dəfə Teymur Quliyevə müraciət edərək konkret şəxslərə aid mobil nömrələrin nəzarətə götürülməsini istəyirdi. Teymur Quliyev bu barədə mənə göstərişlər verirdi”.

Vidadi Soltanov ifadəsində bildirib ki, telefon danışıqlarının dinlənilməsi konkret olaraq bir dəstə tərəfindən həyata keçirilib. Digər MTN əməkdaşları bu işə yaxın buraxılmayıb.

Polkovnikin istinataqa dediklərindən: “Qanunsuz dinləmələr həmin mərkəzin rəisi olmuş Teymur Quliyev tərəfindən təşkil olunmaqla konkret etibar etdiyi hədəf inzibatçısı Fərhad Atayev və 1-ci şöbənin 2-ci bölməsinin rəisi Anar Şirəliyev vasitəsi ilə həyata keçirilirdi. Onların şəxsi münasibətləri də yaxşı idi. Teymur Quliyev onlara tam etibar edirdi. Qalan əməkdaşları, məni və mərkəzin rəis müavini Fuad Səfərovu yaxın buraxmırdılar, etdiklərinin səbəblərini dəqiqliyi ilə bildirmirdilər. Bizi özlərinə yaxın buraxmırdılar. Dinlənilmələr məhkəmə qərarları alınmadan həyata keçirilirdi”.

Şahid qismində 2005-ci ildən MTN-nin Monitorinq Mərkəzinin 2-ci şöbəsinin rəisi vəzifəsində çalışmış polkovnik Rövşən İsmayılov da ifadə verib.

O deyib ki, vəzifələri beynəlxalq terrorçuluqla mübarizə və ictimai-siyasi vəziyyət sahələrində mobil telefon nömrələrinin zəruri monitorinqinin və analizinin aparılması olub.

R.İsmayılov bildirib ki, əməkdaşların vəzifə bölgüsü Mərkəzin əsasnaməsi və rabitə kanallarının monitorinqi (RKM) barədə təlimatla tənzimlənib. Əməliyyat-axtarış tədbirləri əsasən telefon nömrələrinə qulaq asma və rabitə kanallarından məlumatların çıxarılmasından ibarət olub.

Telefon danışıqlarına qulaq asmanın yalnız müvafiq məhkəmə qərarı və onun əsasında verilən tapşırıqlar üzrə həyat keçirilməli olduğunu deyən R.İsmayılov bunları deyib:

“Mənə şifahi qaydada hansısa telefon nömrəsinin nəzarətə qoyulması barədə göstəriş verilməyib. Nömrələrin nəzarətə qoyulmasına yalnız sistem administratoru Fərhad Atayev səlahiyyətli idi. 2015-ci ilin oktyabr ayının əvvələrində Monitorinq Mərkəzinin rəisi Teymur Quliyev məni çağırıb, əməliyyat müvəkkili Eşqin Əliyevin qeyri-iş saatlarında monitorinq zalında oturmasının narahatlıq doğurduğunu dedi. Onun fəaliyyətinin araşdırılmasını tapşırdı. Statistik bölmə mənim şöbəmdə olduğundan sistem administratoru və statistik proqram üzrə audit xidmətini mən aparırdım. Eşqin Əliyevin son bir ay ərzində fəaliyyətini yoxladım və müəyyən etdim ki, həmin şəxs işçi yerindən 170 səhifəlik sorğuların cavabları olmaqla ümumilikdə 40-a yaxın nömrə barədə sorğu göndərib. Eyni nömrələrlə eyni əməliyyatı təkrar edib. Sorğuları gəlmiş nömrələrin mesajlarında CVC sözləri və parolu yazılmış mətnlər, telefon istifadəçilərinin plastik bank kartları ilə bağlı əmliyyatlara dair məlumatlar var idi. Eşqin Əliyevin sorğu göndərdiyi nömrələrin içərisində xarici operatorlara aid nömrələr də oldu. Məlumatları təhlil etdikdə Eşqin Əliyevin ayrı-ayrı şəxslərin plastik kartlarından pul köçürdüyü qənaitinə gəldim. Bu barədə Teymur Quliyev məlumat verdim. Eşqinin ciddi şəkildə cəzalandırılması barədə nazir qarşısında Teymur Quliyevin vəsatət qaldırdığını bilirdim”.

Qeyd edək ki, MTN zabitləri Fizuli Əliyev, Teymur Quliyev və İlqar Əliyev qulluq mövqelərindən sui-istifadə etmədə, gizli qaydada sahibkarlıq fəaliyyəti ilə məşğul olan ayrı-ayrı şəxslərin telefon danışıqlarını dinləmədə, çoxsaylı sahibkarların külli miqdarda əmlaklarını ələ keçirmədə, bu əməllərində odlu silahdan istifadə etmədə, vətəndaşalra qarşı zorakılıqda, sahibkarların və digər vəzifəli şəxslərin qanunsuz azadlıqdan məhrum edilməsində təqsirləndirilirlər. (Musavat.com)

Həmçinin oxuyun

AYNA-nın “menecer”i Anar Rzayev millətin başında qoz sındırmalıdır? – ETİRAZ

Paytaxtda parkinq qiymətlərinin artırılması narazılıq yaradıb. Problem təkcə qiymət artımı deyil, həm də yer “parkovka” …

Bir cavab yazın