Ana səhifə / Araşdırma / Məşhur iş adamının oğlunu avtoqəzaya görə həbsə alıblar

Məşhur iş adamının oğlunu avtoqəzaya görə həbsə alıblar

“Metkartinq” istirahət və əyləncə mərkəzinin sahiblərindən olan Şahin Hüseynlinin oğlu 5 il 8 ay müddətinə azadlıqdan məhrum olunub

Azərbaycan həbsxanalarında məşhur siyasilərlə yanaşı məşhur iş adamlarının, məmurların, onların övladlarının olması günümüzün reallığıdır. Mətbuatda ara-sıra “filan məmurun oğlu qəza törətdi” başlıqlı xəbərlərə rast gəlinir. Amma mətbuatdan və ictimaiyyətdən gizlədilən qəzalar da az deyil.

Aldığımız məlumata görə, bir müddət Bakının mərkəzində,  “Alov qüllələri”nin yaxınlığında “Yaguar” markalı bahalı maşın yüksək sürətlə divara çırpılıb. Nəticədə bir nəfər ölüb. Qəza zamanı nəqliyyat vasitəsinin sükanı arxasında Bakının məşhur məkanlarından olan “Metkartinq” istirahət və əyləncə mərkəzinin sahiblərindən olan Şahin Hüseynlinin oğlu Kənan Hüseynli olub. Nəqliyyat vasitəsinin Ş.Hüseynliyə məxsus olması, qəza zamanı isə oğlunun idarə etdiyi bildirilir. Qəza zamanı dünyasını dəyişən isə K.Hüseynlinin dostu olub. Olaydan sonra Ş.Hüseynli oğlunu qurtarmaq üçün bir çox ünvanlara baş vursa da, alınmayıb. K.Hüseynli həbs edilib və 5 il 8 ay müddətinə azadlıqdan məhrum olunub. K.Hüseynli hazırda məhkumluq həyatı yaşayır.
Ş.Hüseynli özü  gündəmə 2012-ci ilin yanvar ayının 2-də Bakının məşhur “Neolit” restoranında qanlı insident törətməklə gəlib. Vaxtilə özünə məxsus olan restoranda ona irad bildirilməsi Ş.Hüseynlini qəzəbləndirib. O dövrdə  olayla bağlı Bakı Şəhər Baş Polis İdarəsi və Bakı Şəhər Prokurorluğunun yaydığı məlumatda deyilirdi ki, Şahin Hüseynli sərxoş vəziyyətdə əylənmək üçün “Neolit” restoranına gəlib. Lakin o, özünə məxsus “Yaguar” markalı avtomobili restoranın qarşısında düzgün saxlamayıb. Nəticədə restoranın əməkdaşları ilə aralarında mübahisə yaranıb. Restoranın əməkdaşlarının iradlarını qəbul etməyən Şahin Hüseynli intizama dəvət edilsə də, əksinə, o, bundan daha da əsəbiləşib. Və avtomobilinin yük yerində gəzdirdiyi özünə məxsus 16 kalibrli, yivsiz qoşalülə ov tüfəngindən restoranın giriş qapısına atəş açıb.
Bu zaman “Neolit”də istirahət edən çoxsaylı insanlar vahiməyə düşərək restoranı tərk edib, foyedə olmuş Fəxrəddin Nağıyev isə açılmış atəş nəticəsində bədəninin müxtəlif nahiyələrindən xəsarətlər alıb. Dərhal hadisə yerinə gələn Nizami Rayon Polis İdarəsinin əməkdaşları Şahin Hüseynlini zərərsizləşdirib. Faktla bağlı Nizami Rayon Polis İdarəsinin İstintaq Şöbəsində Cinayət Məcəlləsinin 221.3-cü (xuliqanlıq, silah tətbiq etməklə) maddəsi ilə cinayət işi başlanıb, hadisə yerinə baxış keçirilib. Şahin Hüseynlinin cinayətdə istifadə etdiyi tüfəng maddi sübut kimi götürülüb.

Cinayətin törədilməsində təqsirli bilinən Şahin Hüseynliyə həmin maddə ilə ittiham elan olunmaqla barəsində məhkəmənin qərarı ilə həbs-qətimkan tədbiri seçilib. Amma aradan bir müddət keçdikdən sonra Şahin Hüseynli atasının və yüksək vəzifəli qohumlarının sayəsində həbsdən çıxmağı bacarıb. Ş.Hüseynlinin əvvəllər Bakı Şəhər Prokurorluğunda işlədiyi haqda da məlumatlar var.

Həmçinin oxuyun

Rza Talıbov bu məsələyə görə Fuad Nəcəfli ilə Naxçıvanda görüşmək istəyib…

Bir neçə gün əvvəl Naxçıvan Ali Məclisində qəribə bir gərginlik yaşanıb. Muxtar respublikadakı mənbələrdən Azpolitika.info-ya …

Bir cavab yazın