Azinforum.az İnformasiya Portalı Onlayn Xəbər Portalı
“Avanqard-İnşaat” MTK mənzilimi əlimdən alır. Şirkət yalan sənədlərlə qanunsuz olaraq mənə qarşı məhkəmə iddiası qaldırıb. Artıq məhkəmələrdə sürünməkdən bezmişəm, stressdən xəstəlik tapmışam…”
Belə şikayətlə virtualaz.org-a Yasamal rayonu, Bünyadzadə küçəsində yaşayan Elçin Quliyev müraciət edib. İkinci qrup əlil olan şikayətçi bildirir ki, illərdir davam edən məhkəmə prosesləri sağlamlığına ciddi zərbə vurub, stressdən şəkərli diabet xəstəliyi tapıb.
Məsələ belədir ki, Elçin Quliyev Yeni Yasamalda yerləşən “196” MTK-nın inşa etdiyi 12 mərtəbəli binanın 10-cu mərtəbəsindən 2012-ci ildə mənzil alıb. Sonradan bu şirkətin rəhbəri Elşən Rüstəmov həbs olunub.
“Həmin şirkətlə “Avanqard-İnşaat” MTK arasında olan məhkəmədən sonra bildim ki, mənim mənzilimi də “Avanqard-İnşaat”a veriblər. Halbuki bu qərardan əvvəl Yasamal Rayon Məhkəməsininmənzilin mənə məxsus olduğu barədə qüvvəyə minmiş qərarı var idi. Bunadan sonra mən evimi geri qaytarmaq ücün əlavə kassasiya qaydasında Ali Məhkəmənin plenumuna müraciət etdim. Ali Məhkəmədə bu iş 9 ay araşdırdı, hər tərəfin sənədləri yoxlanıldı. Ali Məhkəmənin plenumunun qərarıyla evim mənə qaytarıldı. Sonra Ali Məhkəmənin İnzibati-iqtisadi kollegiyasi işə baxaraq bu qərarı bir də təsdiq elədi”-şikayətçi deyir.
E.Quliyev deyir ki, 9 ay Ali Məhkəmədə iş araşdırılıb və “Avanqard-İnşaat” MTK-dan heç kim məhkəməyə gəlməyib. Məhkəmə qərarına görə, əslində həmin MTK bu qərara şikayət verə bilməz, ona görə də fırıldağa əl atıblar.
“Başqa bir şəxsə sənəd düzəldib veriblər ki, guya bu mənzil ona satılıb. Halbuki mənim əlimdə bütün sənədlər, o cümlədən, ödəniş qəbzlərim də var. Mənzilin pulunu tamamilə ödəmişəm və məhkəmə qərarıyla da ev mənimdir. İndi həmin şəxs haradan ortaya çıxıb, bilmirəm. Məhkəmədən 2 il kecməsinə baxmayaraq niyə Nizami Rayon Apellyasiya Məhkəməsi ərizələri qəbul edir? İş bitib və ev mənə verilib. Hər il məhkəmə olar? Bunun qarşisini kim alacaq? 1 evə bir dəfə qərar verilər də. Xəstəyəm, bir dəfə klinik ölüm keçirmişəm, məhkəmədə şəkərdən ağzım quruyur danışa bilmirəm”, – Elçin Quliyev bildirir.
Hazırda “Avanqard-İnşaat” MTK-nın şikayəti əsasında Nizami Rayon Məhkəməsində və eyni zamanda Apellyasiya Məhkəməsində məhkəmə baxışı gedir.
Problemlə bağlı qarşı tərəfin mövqeyini öyrənməyə çalışsaq da, MTK-ya məxsus rekvizitləri tapa bilmədik. Şirkətin saytı yoxdur və əlaqə nömrələri internetə yerləşdirilməyib. Yalnız onu öyrənə bildik ki, “Avanqard-İnşaat” MTK-nın adı bir çox dələduzluq faktlarında hallanır. Hətta Prezident Administrasiyası ən çox şikayət daxil olan n MTK-lar arasında “Avanqard-İnşaat” MTK-nın da adınınyer aldığını açıqlayıb.
Gülnar Əliyeva
Virtualaz.org
◀▶
