Arvadını evə qaytara bilmədi, şərikini bıçaqladı

Deyilənlərə görə, hər bir ailənin öz mövcudluğunu qoruyub saxlaması qarşılıqlı hörmətin, inamın və səmimiyyətin olmasından irəli gəlir. Bunlar olmadıqda ər-arvad arasında söz-söhbət, münaqişə yaranır. Bu cür ailədə yaşamaq hər iki tərəf üçün çətinlik törətsə də, ən çox əziyyət çəkən uşaqlar və yeniyetmələr olur.

Bakı Ağır Cinayətlər Məhkəməsində 47 yaşlı Qazax rayon sakini Natiq Məmmədovun cinayət işi üzrə məhkəmə prosesi yekunlaşıb. Virtualaz.org saytının xəbərinə görə, prosesə hakim Rauf Əliyev sədrlik edib.

İstintaq yolu ilə müəyyən edilib ki, Natiq Məmmədov 23 dekabr 2015-ci ildə axşam saatlarında təsadüfən keçmiş biznes şəriki Mübariz Abdullayevlə rastlaşıb. M.Abdullayevin onun ailə işlərinə müdaxilə etməsinə irad bildirən N.Məmmədov əlindəki kəsici alətlə onun sifətinə zərbə endirib.

Törətdiyi cinayət əməlinə görə N.Məmmədova qarşı Cinayət Məcəlləsinin 126.1-ci maddəsi ilə ittiham irəli sürülüb.

 

Özü getsə də, arvadı kafeni tərk etmək istəmədi

Təqsirləndirilən şəxs qismində dindirilən N.Məmmədov ona elan olunmuş ittihamla özünü qismən təqsirli bilib. O, ifadəsində 2011-ci ildən Mübariz Abdullayevlə birlikdə şərikli kafe işlətdiklərini, eyni zamanda, həyat yoldaşı Vüsalə Xiyalovanın da həmin kafedə aşpaz kimi çalışdığını göstərib. Sonradan kafenin gəliri ilə bağlı problemlər yarandığından, şəriklər ortaqlığa son qoyub. Amma N.Məmmədovdan fərqli olaraq, Mübariz kafeni işlətməyə davam edib. Üstəlik, şərikinin həyat yoldaşı da kafeni tərk etməyib. Bundan sonra N.Məmmədov dəfələrlə arvadını işdən çıxarmaq istəsə də, buna nail olmayıb.

”Vüsaləni hər şeyin qaydasına düşəcəyinə inandırır, işdən çıxmağa qoymurdu. Bununla bağlı Mübarizlə aramızda dəfələrlə mübahisələr olmuşdu. Ona ailə işlərimə qarışmamağı tapşırmışdım. Mübariz isə mənə köməklik etmək istədiyini deyirdi”, – müttəhim söyləyib.

 

Şəriki oğlunu evindən apardı

Yaranmış vəziyyət ər-arvad arasındakı heç də ürəkaçan olmayan münasibətləri daha da gərginləşdirib. Hətta iş o yerə çatıb ki, ailə başçısı böyük oğlunun anası ilə görüşməsinə belə icazə verməyib. Həmin ərəfədə Mübarizin tanışlarından iki nəfər N.Məmmədovun evinə gedib, onun icazə verməməsinə rəğmən oğlunu anasının yanına aparıblar. Bundan hiddətlənən N.Məmmədov keçmiş şərikinə zəng vurub niyə belə hərəkət etdiyini soruşub: ”Mübarizə dedim ki, bir gün bunun cavabını verəcəksən. Hadisə baş verən gün dəmiryol vağzalında rastlaşdıq. Kiçik oğlum onun yanındaydı. Mübarizi qırağa çəkib soruşdum ki, oğlumun sənin yanında nə işi var? Mübariz “yaxşı edirəm, sən kimsən?” deyə cavab verdi. Onu bir qədər kənara çəkib mübahisə etdim, əlbəyaxa olduq. Sellofan torbada oboy kəsmək üçün istifadə edilən bıçaqla onun sifətindən vurdum və qaçıb getdim”.

Zərərçəkmiş şəxs qismində dindirilən Mübariz Abdullayev ifadəsində göstərib ki, Natiq Məmmədovla maddi məsələlərlə bağlı mübahisələri yarandığına görə şərikliyə son qoyub: “Arvadı kafedə qalıb işləyirdi. Natiq zəng vurub deyirdi ki, arvadım o kafedə işləməyəcək. Dəfələrlə telefonda mübahisə edir, hətta məni öldürəcəyi ilə hədələyirdi. Hadisə baş verən gün Natiqin kiçik oğlu ilə birlikdə Ağstafaya yük göndərməyə gedərkən rastlaşdıq. Natiq nə üçün oğlu ilə birlikdə olduğumu soruşdu. Dedim ki, oğluna kömək edirdim, qardaşlarına yemək göndərirdi, yükü ağır idi. Məni kənara çəkib bıçaqla üz nahiyəmdən vurdu, sifətimdən qan axmağa başladı. Şahini anasının yanına yola salıb özüm xəstəxanaya getdim. Natiqlə barışmışam. Ona qarşı heç bir tələbim və şikayətim yoxdur”.

 

Vüsalə məhkəmədə nə dedi?

Şahid qismində dindirilən Vüsalə Xiyalova ifadəsində əri və onun şəriki Mübarizlə icarəyə götürdükləri “Məxməri” kafesində aşpaz işlədiyini, həmin ərəfələrdə Natiqlə münasibətlərinin yaxşı olmadığını göstərib: “Natiq böyük oğlumla ayrı, mən də kiçik oğlumla ayrı yaşayırdım. Ərimin Mübarizi vurduğunu sonradan öyrənmişəm”.

Məhkəmənin hökmü ilə N.Məmmədov 4 il müddətinə azadlıqdan məhrum edilib.