Azinforum.az İnformasiya Portalı Onlayn Xəbər Portalı
Yasamal rayonu 2-ci Alatava 108 saylı evdə yaşayan Ağayev Xalid Babacan oğlu 25.10.2015-ci ildə Bakı şəhər Yasamal RPİ-nin 29-cu PB-nə ərizə ilə müraciət edərək həmin gecə naməlum şəxslərin gecə gizli yolla yaşadığı evə daxil olmaqla evindən xeyli miqdarda pul və zinət əşyalarının oğurlandığını bildirib.
“Qafqazinfo” Region TV-yə istinadən xəbər verir ki, 29-cu PB-nin əməkdaşları tərəfindən əməliyyat tədbirləri aparılmış və nəticədə həmin cinayəti törətməkdə şübhəli bilinən 1991-ci ildə Bakı şəhəri Lökbatan qəsəbəsində anadan olmuş, Musayeva İranə Məmməd qızı saxlanılaraq Yasamal RPİ-nin İŞ-nə təqdim edilib. Saxlanılan zaman onun üzərindən həmin evdən oğurladığı əşyalar aşkar edilərək götürülüb.
İş üzrə müstəntiq Xəqani Cəfərov cinayətlə bağlı açıqlama verib:
“Bundan sonra aparılmış əməliyyat-axtarış tədbirləri nəticəsində müəyyən edilmişdir ki, həmin şəxs Bakı şəhəri Yasamal rayon ərazisində 20-ə yaxın evlərə qanunsuz daxil olmaqla vətəndaşlara məxsus əmlakı gizli yolla talayıb”.
Fakta görə, Azərbaycan Respublikası CM-nin müvafiq maddələri ilə cinayət işi başlanıb. Həmin şəxsin Bakı şəhər Yasamal rayon ərazisində və eləcə də digər rayonların ərazilərində başqa cinayətlərin törədib-törətməməsinin aydınlaşdırılması istiqamətində əməliyyat istintaq tədbirləri davam etdirilir.
