ReAL Partiyası növbədənkənar parlament seçkilərində 30-a yaxın
namizədlə iştirak etsə də, onların əksəriyyəti seçki dairələrində
hərəkətlilik yarada bilmirlər. Tanınmış simalar da medianın, sosial
şəbəkələrin gündəminə apardıqları effektli seçki kampaniyasının təsiri
ilə deyil, müxtəlif diskusiyalarla, çəkişmələrlə gəlirlər.
Məsələn,
12 saylı Qaradağ-Binəqədi-Yasamal Seçki Dairəsindən ReAl Partiyasının
icraçı katibi Natiq Cəfərli, 16 sayl Yasamal Seçki Dairəsindən isə
partiyanın qurucu üzvü Erkin Qədirlinin deputat mandatı alacaqları
barədə müzakirələr gedir. Bu ehtimallar isə hələ seçkidən xeyli əvvəl
gündəmə gəlmişdi. Hakim Yeni Azərbaycan Partiyasının (YAP) hər iki
dairədən formal namizədlər irəli sürməsi isə sözügedən 2 ReAL
təmsilçisinə mandat veriləcəyi ehtimalını daha da qüvvətləndirdi. Bu
alternativsizliyi bir “Feysbuk” statusunda Erkin Qədirlinin özü belə
ifadə etmişdi:
“16
saylı Yasamal ikinci Seçki Dairəsinin indiki durumu çox mənasızdır.
Orada udmaq belə ayıbdır. Çox urvatsız qələbə olacaq. O da olacaqsa. Bu
dairədən 25 namizəd var, özümdən başqa heç kimi tanımıram. Heç özümü
tanıdığıma da əmin deyiləm…”
Milli
Şuranın sədri Cəmil Həsənlinin açıqladığı deputat siyahısında
N.Cəfərlinin və E.Qədirlinin də adlarının olması isə, sanki, odun
üzərinə yağ tökdü. Xatırladaq ki, C.Həsənli 125 dairə üzrə hakimiyyətin
hansı namizədə mandat verəcəyini əks etdirən siyahı yaymışdı. ReAl-ın
hər iki namizədi C.Həsənliyə açıq narazılıqlarını bildirdilər. Natiq
Cəfərli Milli Şuranın sədrini ağır ifadələrlə ittiham etməkdən də
çəkinmədi.
Erkin
Qədirli isə, incikliyini həmkarından bir qədər “yumşaq formada belə
ifadə etmişdi: “Cəmil Həsənli o boyda siyahını yazmaq yerinə, bir kəlmə
yazaydı ki, Milli Məclisi Natiq Cəfərliyə və Erkin Qədirliyə görə
buraxıblar”.
“ReAL”çıların,
deputat olub-olmayacaqları məlum olmasa da, onların apardıqları seçki
kampaniyasını kifayət qədər uğursuz saymaq olar. Məsələn, Natiq Cəfərli
sosial şəbəkədə seçki dairəsi ərazisində guya aktiv kampaniya apardığını
əks etdirən fotolar yayımlayır. Amma fevralın 2-də onun Lökbatan
Mədəniyyət Evində seçicilərlə keçirdiyi görüşdən yayılan fotolar,
reallığın əslində nədən ibarət olduğunu göstərdi. 360 nəfərlik zalın bir
küncündə 40-50 nəfərlə bir aya gələn namizədin piar menecerləri
fotodakı boş yerləri gizlətmək üçün xeyli əziyyət çəkiblər. Buna
baxmayaraq N.Cəfərlinin partiyadaşları və dostları sosial şəbəkələrdə
“möhtəşəm görüş”lə bağlı postlar paylaşıb, onu təbrik ediblər.
Maraqlı
məqamlardan biri də odur ki, əgər, hakimiyyət ReAL üzvünün deputat
seçilməsində maraqlıdırsa, lazım olan görüntünü niyə təmin etmədi?
Görünür,
ya Natiq Cəfərlinin deputat olacağı barədə ehtimallar bir qədər
şişirdilib, ya da hakimiyyət ReAL namizədlərini urvatsız edərək mandat
vermək istəyir.
Erkin
Qədirli isə ümumiyyətlə seçkiyə könülsüz qoşulub. O, əvvəldən qeyd edib
ki, seçkidə hər hansı saxtakarlıq olacaqsa, parlamentdə oturmayacaq və
deputat mandatından imtina edəcək. Digər tərəfdən isə demək olar ki,
təbliğat-təşviqat kampaniyası aparmır. Seçki kampaniyasının bitməsinə 4
gün qalsa da, ReAL-ın namizədi ancaq təşviqat materiallarını paylayıb,
bir neçə məhəllə və binada sakinlərlə söhbət edib. Onun “Facebook”
səhifəsində bir dənə də olsun seçki kampaniyasını əks etdirən foto
paylaşılmayıb.
Bundan
sonrakı seçki təşviqatını isə E.Qədirli evindən idarə etmək
niyyətindədir. Bunu dünən özü bəyan edib. Sitat: “Söz verdiyim kimi, bu
gündən başlayaraq, hər axşam saat 21:00-da səhifəmdə canlı yayım olacaq,
seçki təşviqatı kontekstində danışacağam”.
Əlbəttə,
Erkin Qədirli tanınmış şəxsdir, sosial şəbəkələrdə kifayət qədər
izləyicisi var. O, bir namizəd kimi seçki platformasını internet
üzərindən, müasir kommunikasiya vasitələri ilə seçicilərə çatdıra bilər.
Amma
bu üsullar, ReAL partiyasının parlament seçkilərinə qatılmaq qərarında
göstərilən hədəflərlə üst-üstə düşmür. Partiya bəyan edib ki, əsas
məqsədi əhalini fəallaşdırıb seçkiyə gətirmək, seçkiyə inandırmaq və
səsləri ictimai təzyiqlə qorumaqdır. Şübhəsiz ki, bu hədəfə çatmağın
birinci şərti namizədlərin qızğın seçki kampaniyası aparması,
seçicilərlə intensiv işləməsidir. Amma ReAL-ın ən parlaq iki funksioneri
bu istiqamətdə nə edirlər? Natiq Cəfərli görüntü yaratmağa çalışırdı,
alınmadı. Erkin Qədirli isə evə qapanmağa üstünlük verdi.
Yeni
yaradılmış siyasi partiyanın vətəndaşlarla ciddi iş aparmasına,
dəstəyini artırmasına, proqramını yaymasına, cəmiyyətdə özünə inam
yaratmasına ehtiyac var. Seçki prosesi bu fəaliyyət üçün ən uğurlu zaman
sayılır. Amma ReAL-ın namizədləri buna çalışırlarmı? Göründüyü kimi,
namizədlər partiya maraqlarını açıq şəkildə görməzdən gəlirlər.
Başqa
tərəfdən, namizədlərin seçicilərlə birbaşa ünsiyyəti, seçki
texnologiyalarının ən vacib şərtidir. Bu zaman seçiciyə ehtiram
göstərilir, onların arzuları, problemləri özlərindən eşidilir. Vətəndaşa
göstərilən bu sayğı və diqqət, əlbəttə, cavabsız qalmır. Hakimiyyəti
daim seçiciyə hörmətsizlik etdiyinə görə tənqid edən müxalifət
partiyasının özü iqtidar nümayəndələri ilə eyni dairədə fırlanır. Bu
paralellik, sinxron yanaşma, əlbəttə, cəmiyyətin diqqətindən yayınmır.
Yəqin ki, hakimiyyətin də nəzərindən qaçmayacaq…
AzPolitika.info
Həmçinin oxuyun
“Rusiya Azərbaycan vasitəsilə Paşinyanı cəzalandırmaq niyyətindədir”
Siyasi Menecment İnstitutunun direktoru Azər Qasımlı Meydan TV-yə deyir ki, Rusiya sülhməramlılarının Azərbaycanı vaxtından əvvəl …