Qəbələ şəhərinin bir qrup sakini AYNA-nın redaksiyasına müraciət
ünvanlayıb. Sakinlər, rayonun mərkəzi küçələrindən birinin bərbad və
gediş-gəliş üçün əlverişsiz şəraitdə olmasından şikayət edirlər.
“Qəbələ
rayonunda 2 böyük prospekt var. Biri rayonun yuxarı hissəsindən bazar
istiqamətinə qədər uzanan Heydər Əliyev prospektidir, digəri isə rayonun
nisbətən kənarında yerləşən akademik Zərifə Əliyevanın adını daşıyan
küçədir. İkinci küçənin sağ və sol istiqamətlərində, təxminən 800-900
mənzil yerləşir. Sənəd üzərində bu küçəyə asfalt çəkildiyi qeyd olunsa
da, ayrılan pullar mənimsənildiyi üçün küçəyə asfalt vurulmayıb və küçə
sakinlərə problem yaradır”, – deyə sakinlər gileynəliblər.
Dediklərinə
görə, Qəbələ Rayon İcra Hakimiyyətinə (RİH) etdikləri şikayətə verilən
reaksiya qəribə olub: “Bir neçə dəfə Qəbələ Rayon İcra Hakimiyyətinə
müraciət etdik ki, küçənin bərbad vəziyyətdə olması ən azından
akademikin adına yaraşmır. Lakin şikayətimiz əsasında küçəni təmir etmək
əvəzinə, adını dəyişdilər. Bir az da təmizlik işləri apardılar və
proses bununla da sona çatdı. Artıq 20 ildir ki, küçə bu vəziyyətdədir.
Yerli İcra Hakimiyyəti isə müraciətlərə heç bir müsbət cavab vermir”.
“Hətta
küçənin, rayonun əsas istiqamətlərindən birində – Bakı-Şəki yolunun
Qəbələdən keçən hissəsində yerləşməsi də onun acınacaqlı vəziyyətinə
müsbət təsir göstərmir. Çünki bu günə qədər bu küçədə heç bir abadlaşma
işləri aparılmayıb. Dəfələrlə Prezident tərəfindən Qəbələ rayonunun
küçələrinin abadlaşması üçün vəsaitlər ayrılsa da, Qəbələdə yalnız bir
küçədə təmir işləri aparılıb. Bütün vəsait də mərkəzi küçəyə xərclənib.
Digər küçələrin əksəriyyəti isə arzuolunmaz vəziyyətdədir”, –
şikayətçilər bildirirlər.
Qəbələ Rayon
İcra Hakimiyyəti (RİH) başçısının birinci müavini Abil Ağasəfov AYNA-ya
verdiyi açıqlamada sakinlərin şikayətlərini əsassız adlandırıb:
“Sakinlərin qeyd etdikləri küçə əslində Zərifə Əliyeva küçəsi deyil.
Zərifə Əliyeva küçəsi asfatlanmış, işıqlandırılmış bir küçədir. Şikayət
olunan küçə isə şəhərin digər yaşayış məntəqəsində yerləşir. Bu küçə də
şəhərin genişləndirilməsi ilə əlaqədar dövlət proqramına daxil edilib.
Əslində həmin ərazilər kənd təsərrüfatı təyinatlı torpaqlar olduğu üçün
həmin küçəni vətəndaşlar özbaşına ərsəyə gətiriblər. Amma o təyinat
dəyişəndən sonra həmin əraziyə asfalt salınacaq və yol çəkiləcək. Həmin
ərazidə həm də evlərin qeydiyyata düşməsi məsələsi var ki, onun da
dəyərləndirməsi gedir. Prezidentin sərəncamına uyğun olaraq bu işlər öz
həllini tapacaq”.
A.Ağasəfov
küçənin adının dəyişməsi iddiasını da təkzib edib: “Həmin küçə haqqında
kifayət qədər məlumat var. Bu tikililərin hər biri sakinlər tərəfindən
qeyri-qanuni olaraq yaradılıb. Yəni bunun sözügedən küçə ilə heç bir
əlaqəsi yoxdur. Təyinat dəyişəndən sonra problemin həll olunacağını
onlara izah etmişik. Sadəcə həmin ərazilər kənd təsərrüfatı təyinatlı
olduğu üçün, hazırda vəsait ayırmaq mükün deyil”.
“Qəbələ
Rayon İcra Hakimiyyəti tərəfindən küçəyə ayrılan vəsaitin mənimsənilməsi
də həqiqəti əks etdirmir. Biz şikayətçilərə problem haqqında dəfələrlə
məlumat vermişik. Küçədə təmir-bərpa işlərinin aparılmasını biz də
istəyirik. Amma həmin ərazi kənd təsərrüfatı təyinatlı torpaqlar olduğu
üçün hələlik heç nə etmək mümkün deyil. Torpaqların təyinatı dəyişən
kimi bu problemlər öz həllini tapacaq. Lakin ilk növbədə təyinat
dəyişməlidir. Bu da gələn il üçün nəzərdə tutulub”, – qurum rəsmisi
əlavə edib. (AYNA)
Ana səhifə / Aktual / Qəbələ icra hakimiyyətinə qarşı ağır ittiham… – Prezidentin ayırdığı vəsait mənimsənilib
Həmçinin oxuyun
Xocalı aeroportu Azərbaycanın nəzarətinə keçir – VİDEO
İşğaldan azad edilmiş ərazilərdə daha bir mühüm strateji obyekt tam Azərbaycanın nəzarətinə keçəcək. Bunu açıqlamasında …