Son iki gündə dünyanın iki superdövlətinin münasibətlərində ən diqqətçəkən hadisənin fonunda Azərbaycanın da adının keçməsi təkcə geosiyasi proseslərin təhlili ilə məşğul olan analitiklərin yox, bundan daha çox sadə ictimai dairələrin maraq mərkəzindədir.
ABŞ və Rusiyanın ali hərbi rəhbərləri hələlik tam çərçivəsi açıqlanmayan məsələlərin müzakirəsi üçün Bakıda görüşdülər. Tarixdə dünyanın taleyini həll edən böyük dövlətlərin əsas maraqların toqquşduğu yerdən və ya birbaşa döyüş meydanından uzaq neytral regionlarda görüşdüklərinə dair nümunələr az deyil. Bu kontekstdə lap elə müasir günlərimizin əsas konfliktləri olan Suriya probleminin Cenevrədə, Almatıda, daha öncə Liviya məsələsinin Avropada, İranın nüvə probleminə dair Almaniyada keçirilən müzakirələrə baxmaq olar. Bir az da əvvəllərə getsək, Cənub-Şərqi Asiyada XX əsrin ortalarındakı müharibələri müzakirə etmiş 1955-ci il Paris Sülh Konfransı, ondan da əvvəl Çar Rusiyası ilə Osmanlı dövlətinin müharibə ziddiyyətlərinə dair 1878-ci il Berlin Sülh Konfransı, hələ bir qədər də tarixə getsək, Napoleonun istilaları ilə Avropada yeni geosiyasi münasibətləri aydınlaşdırmış 1815-ci il Vyana Sülh Konfransı, XX və XXİ əsrlər üçün dünyanın siyasi xəritəsini yenidən cızmış Stalin-Çörçill-Ruzvelt arasında Tehran görüşü və sair yada düşür. Bütün hallarda, ikitərəfli və çoxtərəfli müzakirələr üçün beynəlxalq siyasətdə hansısa şəhərin seçilməsi prinsipial xarakter daşıyıb və təsadüfi olmayıb. Hətta bəzi hallarda şəhərin adı orada müzakirə olunacaq məsələlər qədər əhəmiyyətli olub.
ABŞ Silahlı Qüvvələri Komitəsinin Baş Qərargah rəisi, general Danford və Rusiya SQ Baş Qərargah rəisi, general Gerasimovun görüş üçün məhz Bakını seçmələrinə tarixdən gətirdiyimiz bir neçə nümunənin prizmasından yanaşmaq lazımdır. Qapalı görüşlər üçün şəhərlərin təsadüfən seçilmədiyini göstərən sadaladığımız tarixi faktlar özlüyündə dəmir sübutlardır ki, ABŞ və Rusiya rəhbərliyi Bakının üzərində çox ciddi arqumentlərə söykənərək dayanıb. Diplomatik mənbələrdən sızan informasiyalara görə, Moskva, Minsk, Qərbi Avropa şəhərlərindən hansılarınsa adları keçən siyahının sonda Bakı variantı ilə yekunlaşması çox ciddi məsələdir. Beləliklə, ABŞ və Rusiya rəhbərliyi dünyanın taleyi üçün son dərəcə ciddi müzakirə məkanı olaraq niyə məhz Bakını seçdi? Özlüyündə çox maraqlı olan səbəblərin bir hissəsi müasir müstəqil Azrbaycan dövlətinin regional və dünya siyasətindəki sanballı mövqeyi ilə bağlıdır. Başqa hissəsi Cənubi Qafqazın dərin geosiyasi rəqabətlə xarakterizə olunan ABŞ – Rusiya münasibətlərindəki xüsusilə maraqlı region statusundan irəli gəlir. Dünya nəhənglərinin prinsipial və məntiqli Bakı seçiminin gerçəkləşməsinin digər qrup səbəbləri isə Prezident İlham Əliyevin dövlət başçıları arasındakı ağır siyasi çəkisi, onun xarizmasını və avtoritetini təyin edən şəxsi xarakter keyfiyyətlərilə bağlıdır.
Beləliklə, ABŞ və Rusiyanın “Niyə məhz Bakı” seçimi ətrafında araşdırmaların şərti olaraq üç qrup səbəblər üzərində aparılması daha real və məntiqli görünür.
Birinci qrup səbəblər Azərbaycan dövlətinin beynəlxalq və regional müstəvidə anlayışla qəbul olunan, müstəqil, konstruktiv, aydın və kimdəsə qıcıq yaratmayan, kimlərisə bir-birilə toqquşdurmayan prinsipial siyasət aparmasıdır.
İkinci qrup səbəblər – cənab İlham Əliyev dünya liderləri arasında yüksək şəxsi nüfuza malikdir, regional və dünya siyasətinin bütün məsələlərini “səbəb-nəticə” kontekstində tam aydın izah edərək, buna uyğun praktik davranışlar göstərir, dünya liderləri arasında şəxsi ünsiyyətlərin beynəlxalq münasibətlərdə nə qədər önəmli olmasına lazımi qiymət verə bilir, şəxsi ünsiyyət üçün rahat xarakterə malikdir, öz siyasi ritorikasına bütün situasiyalarda tam nəzarət edə bilir, hadisələrə mahiyyətli yanaşa bilir, öz ölkəsinin milli maraqlarını regional və qlobal proseslərlə bəşəriyyətin mənafeləri naminə maksimum uzlaşdıra bilir, erudisiyalı şəxsiyyətdir (təkcə öz dövlətini – onu da alayarımçıq və böyük ziyanlarla idarə edən Sarkisyan kimilərdən çox fərqli olaraq) və sair.
Üçüncü qrup səbəblər – Cənubi Qafqaz ABŞ – Rusiya münasibətlərində dünyanın xüsusi əhəmiyyətli azı 6 geosiyasi regionundan biridir.
Elə sonuncudan başlayaq. Cənubi Qafqaz həm geosiyasi vahid, həm də üç dövlətin ərazisindən ibarət coğrafi məkan kimi əsasən 1991-ci ildən ABŞ – Rusiya münasibətlərində açıq və yeni rəqabət meydanı kimi özünü göstərməyə başlayıb. ABŞ və Rusiyanın nəzərində Cənubi Qafqazın xüsusi önəmi öz yerində, onu bu önəmə “mindirən” isə, mübahisəsiz, Azərbaycandır – əhəmiyyətli geosiyasi mövqeyi ilə, zəngin təbii sərvətləri ilə, ölkəni ən sivil beynəlxalq və regional proseslərin səmərəli təmas meydanına çevirə bilən ağıllı liderləri ilə… Ermənistan və Gürcüstan belə göstəricilərə, ən yumşaq şəkildə desək, malik deyillər, deyilən status göstəricilərinin hamısı eyni vaxtda onlarda yoxdu. Bir anlığa üç ölkənin təbii sərvətlərə malik olmaq göstəricisini kənara qoyaq və digər amillərlə onların regional və dünya siyasətindəki imic və təsirlərini müqayisə edək. Məhz ağıllı və uzaqgörən liderlərin yoxluğu üzündən müstəqil dövlətçilik tarixinə təcavüzkar siyasətin doğurduğu ağır nəticələrlə başlayan Ermənistan sonda acınacaqlı daxili duruma və faktiki başqa dövlətdən asılı vəziyyətə düşüb. Hətta sırf özünün daxili siyasət məsələlərini başqa dövlətin zövq və istəyi ilə müəyyən edir. Qonşularına aqressiv və əsassız iddialarla yanaşma üzündən sülh üçün təhlükə mənbəyinə, üstəlik başqa dövlətin mübahisəsiz əlaltısına çevrilən bir “dövlətin” paytaxtı iki dünya nəhənglərinin görüş yeri kimi, təbii ki, cəlbedici ola bilməzdi. Cənubi Qafqaz kimi spesifik bölgə üçün heç məqbul sayılmayan siyasi strategiya olaraq iki qütb arasında qəti seçim etmiş Gürcüstan paytaxtı da belə görüşlər üçün hər iki tərəfin məqbul seçimi ola bilməzdi. Daha açıq desək, İrəvandansa Moskvada, Tiflisdənsə Vaşinqtonda görüşməyin məzmunca hansı fərqi var ki… Ancaq bu variantlar konkret şəraitdə məqbul və mümkün ola bilməzdi.
Demək, ABŞ və Rusiya hərbi rəhbərliyinin görüş üçün məhz Bakıya gəlmələri bu regionda Azərbaycanın əla seçimi olan təmayülsüz və halal tarixi haqqa söykənən xarici siyasət kursu ilə ilk növbədə birbaşa bağlıdır. Seçim edən ABŞ və Rusiya hərbi rəhbərliyi Bakının, digər regional paytaxtlarla müqayisədə daha möhkəm təhlükəsizlik göstəricilərinə və saysız beynəlxalq tədbirləri uğurla keçirmək təcrübəsinə malik olduğunu, sözsüz ki, nəzərə alıb. Ən incə mətləblərdən biri budur ki, Azərbaycan hələ mərhum prezident Heydər Əliyevin dövründən başlayan, indi də davam etdirilən siyasi kursla gedərək, geosiyasi rəqabətdə dünyanın ABŞ və Rusiya kimi iki nəhəngini açıq şəkildə toqquşduran bircə addım da atmayıb. Halbuki, Heydər Əliyevdən əvvəlki hakimiyyət bir az da qalsaydı, bu toqquşma labüd olacaqdı. Necə ki, 2008-ci ildə Saakaşvili Gürcüstanda onları açıq hərb meydanının bircə addımlığına gətirmişdi. Elə bilirsiniz ki, ABŞ və Rusiya rəhbərliyi onları Gürcüstanda, Ermənistanda, Azərbaycanda açıq toqquşmaya çəkən rəhbərlərdən məmnun qala bilər? Qətiyyən… Onlar üçün ən məqbul lider heç bir kataklizmə yol açmadan toqquşa biləcək maraqları incə şəkildə tənzimləyən, toqquşmadan yayındıran, bununla həm bölgəni, həm də dünyanı lüzumsuz hərbi toqquşmalardan xilas edə bilən ölkə başçılarıdır.
Azərbaycan Prezidenti İlham Əliyevin dövlətçilik fəaliyyətində özünü göstərən bu təzahürlər Bakı seçimini etmiş ABŞ və Rusiya rəhbərlərinin nəzərindən, sözsüz ki, qaçmayıb. ABŞ və Rusiyanın çox kəskin konfliktə getdikləri Suriya münaqişəsinə və İranın nüvə proqramına münasibətdə İlham Əliyevin incə və perspektivli mövqeyini sonradan hamı gördü. Hər iki məsələdə indikindən fərqli siyasət aparılsaydı, ABŞ-Azərbaycan-Rusiya üçtərəfli münasibətlər müstəvisində pis mənada çox şeylərin indiki kimi olmayacağına hamı dərindən təəssüf edərdi. Bakı seçiminin gerçəkləşməsində Prezident İlham Əliyevin bu anadək apardığı barışdırıcı və daha çox pozitiv perspektivlərə işləyən diplomatiyanın həlledici rolu şəksizdir. Qədim İpək yolu üzərində “dəmir nəqliyyat və enerji” körpüsü layihəsini uğurla həyata keçirərək Qərbin firavanlığına və stabil inkişafına ardıcıl töhfəsini verən Azərbaycan paytaxtı heç bir prinsipial seçimdən kənarda qala bilməz. Həm də söhbət təkcə Qərbin və Avropanın enerji təhlükəsizliyində səmərəli iştirakla məhdudlaşmır. Bir vaxtlar dünya terrorunun məkanı sayılan Əfqanıstanda ABŞ və Rusiyanın birgə antiterror əməliyyatlarına logistik və hərbi dəstək verilməsində də Azərbaycan önəmli rol oynadı. Türkiyə-Rusiya münasibətlərinin ən böhranlı şkaladan çıxmasında Azərbaycan Prezidentinin şəxsi avtoritetinin nə qədər təsirli olduğunu Putin də, Tramp da bilir.
Bakı görüşünün məzmunu tam açıqlanmadığına görə, Heydər Əliyev Mərkəzində baş tutmuş görüşə hələlik “yarımqapalı” demək məcburiyyətindəyik. Ancaq görüşdən qabaq Pentaqon və Kremldən verilmiş bir-iki cümləlik son dərəcə diplomatik leksikonlu açıqlamalar təxminən eyni məzmuna malikdir. Demək, dünyanın ən təhlükəli sayılan Suriya, İraq, Əfqanıstan və sair problemlərinin həlli yolunda zəruri olan daha dəqiq işbirliyi Bakıda – Azərbaycan Prezidentinin “evində” müzakirə olunur. Bu o deməkdir ki, Azərbaycanın balanslı xarici siyasətini hər iki tərəf başa düşür və qəbul edir, ən mühüm beynəlxalq layihələrin və ziddiyyətlərin həllində Azərbaycan Prezidentinin təşəbbüskarlığına və orijinal ideyalarına hörmət qoyulur, Azərbaycandakı sabitliyə önəm verilir, Tramp və Putin üçün İlham Əliyevin etibarlı tərəfdaş olması özünü göstərir, başa düşürlər ki, NATO və KTMT kimi bir-birinə tam zidd olan iki blokun arasında Azərbaycan-NATO-KTMT maraqlarını məharətlə uzlaşdıran bir liderin “evində” ən ciddi beynəlxalq problemləri rahatca müzakirə və həll etmək olar. Obamanın son prezidentlik dövründən ABŞ-Rusiya münasibətlərinə hansı miras qalıb? Hərbi ritorika müharibə havasına köklənib, Baltikyanı ölkələrdə və Polşada ABŞ raketləri, Kalininqradda “İsgəndər”lər yerləşdirilir. ABŞ-İran münasibətləri yenidən “buz bağlayır”, İrana qarşı hətta hansısa hərbi “Ərəb bloku”nun yaradılması barədə söhbətlər gedir, Suriya səmasında hərbi təyyarələr bir-birilə toqquşmasın deyə adi radioəlaqə səviyyəsində hərbi əməkdaşlığı nəzərə almasaq, ABŞ və Rusiya rəhbərliyi Bakıya az qala “müharibə ərəfəsi” ovqatla gəliblər. Söz yox ki, bu görüşdən sonra ovqat dəyişəcək, ABŞ və Rusiya hərbi başqalaşacaq, Bakı dünyanın iki supergücünün 1961-ci ildəki qorxulu Karib böhranından sonra ikinci hərbi gərginlikdən isti ünsiyyətə qayıtmasına şahidlik etmiş şəhər kimi, həm də Tramp və Putinin xüsusi xatırlayacaqları şəhər kimi tanınacaq… Yeni dünya düzəni Bakıdan başlayır…
Aydın QULİYEV