Azinforum.az İnformasiya Portalı Onlayn Xəbər Portalı
Azinforum.az xəbər verir ki, son parlament seçkilərində 112 saylı Qax seçki dairəsindən deputatlığa namizəd olan Paşa Məmmədovun (İlusuyskiy) atası Xəyyam Məmmədov dünən tutduğu vəzifədən azad edilib. Bu barədə, məlumatı Paşa Məmmədovun özü verib. Qeyd edək ki, Xəyyam Məmmədov uzun müddət Qax rayonunun icra başçısı vəzifəsində işləyib. Onun son iş yeri isə, Ağ Ciyər Xəstəlikləri İnstitunun baş həkimi vəzifəsi olub.
Xatırladaq ki, Paşa Məmmədovun namizədliyini irəli sürdüyü dairədəki seçki mübarizəsi ən gərgin keçənlərdən biri kimi yadda qalıb. Həmin dairədə seçkilərə bir neçə gün qalmış Paşa Məmmədovun namizədliyi ləğv edildi. Namizəd bütün hüquqi instansiyalara müraciət etsə də, qərarın ləğvinə nail ola bilmədi. Rəsmi nəticələrə görə 112 saylı seçki dairəsindən iş adamı Azər Kərimli mandat qazandı.
Azər Kərimli fövqəladə hallar naziri Kəmaləddin Heydarova yaxın şəxs kimi xarakterizə edilir.
Seçki prosesində Azər Kərimli ilə Paşa Məmmədov bir-birini qara piar aparmaqda ittiham edib. Xəyyam Məmmədovun hansı səbəbdən tutduğu vəzifədən azad edilməsi barədə isə hələ ki, dəqiq məlumat verilməyib. Xatırladaq ki, Xəyyam Məmmədov həm Qaxda böyük nüfuza malik olan insan, eyni zamanda, ağ ciyər sahəsinin əvəzolunmaz mütəxəsisi kimi tanınır. İş günün sonu olduğundan məsələni Səhiyyə Nazirliyi ilə dəqiqləşdirə bilmədik. Mövzuya qayıdacayıq…
Vidadi CƏNUBLU
AZİNFORUM.AZ
