“Azərbaycanda deputatlara yaltaqlıq qadağan olunmalıdır”.
Azinforum.az xəbər verir ki, bu təkliflə Milli Məclisin ötən ay keçirilən iclasında “Azərbaycan Respublikası Milli Məclisi deputatının etik davranış qaydaları haqqında” qanun layihəsinin müzakirəsi zamanı deputat Qüdrət Həsənquliyev çıxış edib. Çox maraqlıdır ki, deputatın həmin çıxışı onun partiyadaşları və yaxınları tərəfindən partiya sədrinin xeyri üçün ciddi piar edilib. Hətta bəzi təqdimatlarda bu innovativ təklifin ölkəmizdə ilk dəfə Qüdrət Həsənquliyev tərəfindən səsləndirildiyi bildirilib. Ancaq Azinforum.az-ın apardığı araşdırmadan sonra məlum olub ki, əslində, belə bir təkliflə ilk dəfə Milli Məclisdə sabiq millət vəkili, YAP Siyasi Şurasının üzvü Musa Musayev çıxış edib. Musa Musayev Azinforum.az-a açıqlamasında bildirdi ki, məddahlığın qarşısının alınması üçün qanunvericiliyə yeni bəndin salınması ilə bağlı təklif ilk dəfə onun tərəfindən 15 il əvvəl səsləndirilib:
“Mənim Milli Məclisdə etdiyim bütün çıxışların stenoqramı və videosu durur. İstəsəniz tarixinə kimi deyə bilərəm. Mən həmin çıxışı Milli Məclisdə 26 aprel 2005-ci ildə etmişəm”.
Azinforum.az hər iki çıxışın videosunu təqdim edir.
Rövşən ƏLİ
Azinforum.az