Çərşənbə axşamı , Dekabr 1 2020
Ana səhifə / Aktual / OMON-çu məhbus aclıq aksiyasına başladı

OMON-çu məhbus aclıq aksiyasına başladı

Qarabağ Azadlıq Təşkilatının (QAT) sədri, Ömürlük Məhbusların Hüquqlarını Müdafiə Komitəsinin rəhbəri Akif Nağı ömürlük həbs cəzası çəkən, keçmiş OMON-çu Elçin Əmiraslanovun ağır vəziyyəti və aclıq aksiyasına başlaması ilə əlaqədar Azərbaycan Respublikasının prezidentinə, ədliyyə nazirinə, penitensiar xidmətin rəisinə müraciət göndərib.

Bu barədə musavat.com-a QAT Mətbuat Xidmətindən məlumat verilib.

Müraciətdə göstərilir: Qobustan həbsxanasında ömürlük həbs cəzası çəkən keçmiş OMON-un dəstə komandiri Elçin Əmiraslanovun ağır vəziyyəti ilə bağlı yenidən Sizə müraciət edirik. Elçin Əmiraslanov Azərbaycanın ərazi bütövlüyü uğrunda fədakarlıqla vuruşub, dəfələrlə yaralanıb, dövlət tərəfindən bir neçə dəfə təltif olunub, mərhum prezident Heydər Əliyev tərəfindən onun xidmətləri yüksək qiymətləndirilib. Elçin Əmiraslanov 22 ildir ki, ömürlük həbs cəzası çəkir. Onun sağlamlığı üçün ciddi təhlükələr yaranıb, səhhətində ciddi problemlər var.

Penitensiar Xidmətin Mərkəzi Xəstəxanasının baş nevroloqu Məhərrəm İsayev ötən il oktyabrın 13-də onu müayinə edib, dərhal mərkəzi müalicə müəssisəsinə köçürülməsi ilə bağlı rəyini bildirib. Digər həkimlər də eyni fikri dəfələrlə bildiriblər. Lakin nə üçünsə bu vaxta qədər Elçin Əmiraslanov müalicə müəssisəsinə köçürülmür, bunun səbəbini də izah etmirlər. Elçin Əmiraslanov bu cür biganə münasibətə etiraz olaraq bu gündən aclıq aksiyasına başlayacağını və ölənə qədər davam etdirəcəyini bildirib. Elçin Əmiraslanov bu gün də Azərbaycan dövlətinə sədaqətlə xidmət etməyə, ərazi bütövlüyü uğrunda yenidən döyüşə atılmağa hazır olduğunu dəfələrlə bildirib. Onun aclıq aksiyasına başlaması haqsızlığa qarşı son etiraz cəhdidir. Onun taleyinə biganə qalmayacağınıza, məsələyə ədalətli mövqedən müdaxilə edəcəyinizə inanır və əvvəlcədən təşəkkür edirik.

 

Həmçinin oxuyun

Rusiya MN Laçın rayonunun Azərbaycanın nəzarətinə verilməsi barədə məlumat yayıb

Rusiya Müdafiə Nazirliyi Laçın rayonunun Azərbaycanın nəzarətinə verilməsi barədə məlumat yayıb. APA-nın Moskva müxbirinin məlumatına …