Bazar , Oktyabr 2 2022
Ana səhifə / Aktual / Müəllimlərin dərs yükü və ya nazirin F- 317 nömrəli əmrinin gözardı olunması…

Müəllimlərin dərs yükü və ya nazirin F- 317 nömrəli əmrinin gözardı olunması…

Təhsilimizin bərbad gündə olması heç kimə sirr deyil. Ali məktəblərə daxil olanların demək olar ki, 90-95 faizi repetitorlar vasitəsi ilə hazırlanır.

Valideynlər övladlarının xoş gələcəyi üçün ailənin boğazından kəsib öz övladlarının ali məktəblərə qəbul olması üçün bu istiqamətdə kifayət qədər vəsait xərcləməli olurlar. Üstəlik, məktəb direktolarını da razı salmalıdır ki, repetitor yanına gedən övladlarına maneçilik törədilməsin. 

Məktəblərdə tədrisin yüksək səviyyədə olmamasını elm və təhsil naziri Emin Əmrullayev də müsahibələrinin birində qeyd edib. Doğrudur, nazirin bu açıqlaması sosial şəbəkələrdə müəyyən müzakirə mövzusu olsa da, təhsildəki mövcud çatışmazlıqlar tənqid olunsa da, dəyişən heç nə yoxdur.

Hələ bu azmış kimi regionlarda nazirin əmr və göstərişlərini saya salan yoxdur. Belə ki,  Təhsil nazirinin 19 iyun 2020- ci il F- 317 nömrəli əmr kağız parçasından başqa heç nəyə yaramır.

Əmrdə ölkəmizdə fəaliyyət göstərən ümumi təhsil müəssisələrində müəllimlərə tələbatın müəyyənləşdirilməsi, pedaqoji kadrların işə qəbulu və yerdəyişməsi qaydaları müəyyən edilib. Amma bu qaydaların müddəaları Gəncə-Daşkəsən Regional Təhsil İdarəsinin Göygöl rayon üzrə təhsil sektorunun məsul şəxsləri tərəfindən kobud şəkildə pozulur. 

Əmrin 2.2 bəndində qeyd edilir: “Müəllimlərin yeni tədris ili üçün dərs yükü müəssisə rəhbəri tərəfindən müəllimlər əmək məzuniyyətinə çıxanadək müəyyənləşdirilir və onlara bu barədə məlumat verilir. Müəllimlərin dərs yükü tədris ili ərzində, bir qayda olaraq, sabit saxlanılır.

Dərs yükü bölüşdürülərkən mövcud qanunvericiliyin və təlimati sənədlərin tələbləri, müəllimlərin diaqnostik qiymətləndirmədə göstərdiyi nəticələri müəssisə rəhbəri tərəfindən nəzərə alınır. Dərs bölgüsü aparılarkən müəssisədə işləyən müəllim üçün həftəlik dərs yükü 18 saat (bu zaman həftəlik dərs yükü 2 stavkadan artıq olmamalıdır) müəyyənləşdirilir. Vakant dərs yükü 18 saatdan az olarsa, həmin saatlar ilk növbədə müəssisənin ixtisaslı müəllimləri arasında bölüşdürülür.

Müəssisədə hər hansı ixtisasdan kadr olmadıqda, həmin ixtisas üzrə tədris planına əsasən müəyyənləşdirilmiş həftəlik dərs yükü 18 saatadək olduğu halda, yerli təhsili idarəetmə orqanının və ərazi maliyyə hesablaşma mərkəzinin razılığı ilə müəssisə rəhbəri tərəfindən digər müəssisələrdən əvəzçiliklə və ya saathesabı qaydasında müəllim dəvət olunur. Bu mümkün olmadıqda həmin dərs saatları vakant hesab olunur və Nazirliyin internet səhifəsində elan edilir”.                                                  

Burada çox aydın şəkildə müəllimlərin dərs yükünün, vakant yerlərin müəyyyənləşdirilməsinin təhsil müəssisəsinin rəhbərinin səlahiyyətlərinə aid olduğu qeyd olunub.  Amma Gəncə-Daşkəsən Regional Təhsil İdarəsinin Göygöl rayon üzrə təhsil sektorunun məsul şəxsləri nə edir?

Məktəb direktorlarından tələb edirlər ki,  diaqnostik qiymətləndirmədə bir az aşağı nəticə göstərən müəllimlərə  həftəlik 8-10 saatdan yuxarı dərs verilməsin, artıq qalan saatlar vakansiayaya çıxarılsın. Amma əslində əmrdə qeyd olunduğu kimi, əgər tədris planında dərs varsa, müəllimin dərs yükü həftəlik 18 saatdan ( bir stavka) aşağı olmamalıdır.  İki stavkanı, yəni 36 saatdan yuxarını isə keçməməlidir. Sektorun əməkdaşları əlavə heç bir sənəd təqdim etmədən qanunsuz olaraq məktəb direktorlarının səlahiyyətlərinə müdaxilə edirlər. Onlardan hansı qaydalara əsasən nə üçün bu cür addım atdıqlarının səbəbini soruşduqda isə bildirirlər ki, Gəncə-Daşkəsən Regional Təhsil İdarəsinin rəhbərliyi tərəfindən onlara belə bir göstəriş verilib. Bu cür müdaxilə və özbaşınalıqların olması tədrisin keyfiyyətinə mənfi təsir göstərir, müəllimlərdə ruh düşkünlüyü yaradır. Amma bu cür özbaşınalıq nə vaxtadək davam edəcək, bilinmir?

Hər halda ümid edək ki, yeni yaranan elm və təhsil nazirliyində hansısa möcüzələr nəticəsində yeniliklər baş verəcək, özbaşınalıqların qarşısı alınacaqdır. 

Həmçinin oxuyun

Həbsdə olan jurnalist Sənan Həsənoğlu təcili əməliyyat edilməlidir, amma…

Jurnalistlər Sənan Həsənoğlu və İlqar Atabəylinin istintaqı yekunlaşıb, baxılması üçün Gəncə Ağır Cinayətlər Məhkəməsinə göndərilib. …