Azinforum.az İnformasiya Portalı Onlayn Xəbər Portalı
Keçmiş kürəkəni Səbail Rayon Məhkəməsinin sədri Ağamalı Qafarovun onun oğlunu və əmlakını əlindən aldığını iddia edib.
“Qafqazinfo”ya müraciət edən Vüqar Nağıyev bildirib ki, 2010-cu ildə A.Qafarovun qızı Türkanla ailə həyatı qurub və 2018-ci ildə boşanıb. Birgə nikahdan 2011-ci ildə Murad, 2015-ci ildə Siyara dünyaya gəlib.
V.Nağıyev iddia edir ki, A.Qafarovun təzyiqi, Nərimanov Rayon Məhkəməsinin sədri Tofiq Paşayevin tapşırığı ilə onun iştirakı olmadan məhkəmə nikahı pozub və uşaqları anaları Türkanın himayəsinə verib, iki uşağa görə isə Vüqar Nağıyevin hər ay 600 manat aliment ödəməsinə qərar verib. Bu qərarı isə Ağstafa rayon İcra Hakimiyyətinin həbs edilən keçmiş başçısı Nizaməddin Quliyevin oğlu, hakim Ramin Quliyev çıxarıb. V.Nağıyevin sözlərinə görə, apellyasiya şikayəti vermək istəsə də, R.Quliyev qətnaməni ona verməkdən imtina edib.
Vüqar Nağıyev qeyd edib ki, onun övladları ilə görüşünə imkan verilməyib:
“Qızım Siyara 2019-cu ildə anasının yanında olarkən böyüklər üçün olan hovuzda boğularaq ölüb. Türkanın başı qarışıb telefona, uşağa baxmayıb. Lakin prokurorluq bu işi araşdırmadı. Türkan boşandıqdan sonra uşaqları evdə tək qoyub gedirdi, onların təmizliyinə, dərslərinə nəzarət etmirdi. Oğlumun səs yazısı var ki, onu necə psixoloji təsir altında saxlayırlar. Mənlə görüşmək istədiyini bildirsə də, icazə vermirlər. Onlar oğlumu ölən bacısının otağında saxlayırlar, onun hissləri, psixologiyası ilə oynayırlar”.
Ağamalı Qafarov
V.Nağıyev deyir ki, Ağamalı Qafarov onu hədələyərək evini əlindən alıb: “Oğlumla görüşmək, əmlakımı geri almaq üçün məhkəməyə, hüquq-mühafizə orqanlarına müraciət edirəm. Lakin bütün orqanlarda Ağamalı Qafarovun təzyiqi ilə qarşılaşıram, bütün qərarlar mənim əleyhimə çıxarılır. Onun qızı isə öz əyləncəsindən qalmır. Hətta qızımın 40-ı çıxmamış Türkan Antalyaya öz dili ilə desək, “stres atmağa” getmişdi”.
V.Nağıyevin sözlərinə görə, o, oğlu M.Nağıyevin həyatından narahatdır: “Oğlumun hüquqlarının mənə qaytarılmasını, mənə məxsus olan evin də oğlumun adına keçirilməsini və Türkan Qafarovanın analıq hüququndan məhrum edilməsini istəyirəm”.
Qarşı tərəfin mövqeyini öyrənmək üçün ötən həftə Səbail rayon məhkəməsi ilə əlaqə saxladıq. Sədrin otağının iş telefonu abunə haqqını ödəmədiyi üçün bağlı idi. Bu səbəbdən əlaqə nömrəsi verərək bizimlə əlaqə saxlayıb mövqeyini bildirməsini xahiş etdik. Bu gün bir neçə dəfə müraciət etməyimizə baxmayaraq, A.Qafarovla əlaqə saxlamaq mümkün olmayıb.
