Son günlər bəzi internet informasiya saytlarında keçmiş Milli Təhlükəsizlik Nazirliyi ilə məxfi əməkdaşlıq etdikləri bildirilən bir sıra şəxslər və ya onların məxfi təxəllüsləri haqqında məlumatlar yayılıb.
Dövlət Təhlükəsizliyi Xidmətinin İctimai əlaqələr şöbəsindən bildirilir ki, fakt üzrə DTX-də həmin məlumatlarda qeyd edilən halların düzgünlüyü, dövlət sirri təşkil edən məlumatların yayılması və açıqlanma mənbəyi ilə bağlı məsələlər araşdırılır.
DTX bəyan edir ki, kəşfiyyat, əks-kəşfiyyat və əməliyyat-axtarış fəaliyyətini həyata keçirən orqanlarla konfidensial əsaslarla əməkdaşlıq edən və əməkdaşlıq etmiş şəxslər haqqında məlumatlar dövlət sirrini təşkil edir və belə məlumatların yayılması qanunla müəyyən edilmiş qaydada cinayət məsuliyyəti yaradır.
Dövlət sirri təşkil edən məlumatların ictimailəşdirilməsi hansı fəsadlara səbəb ola bilər?
Təhlükəsizlik orqanlarının sabiq əməkdaşı Elşən Həsənov qəzetimizə açıqlamasında bildirdi ki, həbs edilmiş MTN zabitlərinin məhkəmə prosesi haqqında mətbuatda getmiş yazıları oxuyanda əvvəlcə gözlərinə inanmayıb:
“Açıq şəkildə keçirilən məhkəmə iclasında agentur şəbəkəyə daxil olan insanlar, onların məxfi kod adları barədə açıqlamaların verildiyini görüncə, məndə hətta şübhə də yarandı. Çünki bu, sadəcə olaraq, mümkün deyildi. Dövlət və xidməti əhəmiyyətli sirrin bu şəkildə açıqlanması, faktiki olaraq, agentin leqallaşdırılması, bütün prosedur qaydalarının pozulması demək idi. Təhlükəsizlik orqanlarının əməkdaşları bunun nə demək olduğunu daha yaxşı bilər. Mənim üçün maraqlı olan həm də məsələnin digər tərəfi idi. Məlumat informasiya vasitələrinə hansı yolla daxil olmuşdu? Bütün bu məsələlərə məhkəmə prosesi zamanı açıq şəkildə toxunulmuşdusa, o zaman günahı, ilk növbədə, prosesin keçirilməsinə cavabdeh olan şəxslərdə axtarmaq lazımdır. Bundan savayı, düşünürəm ki, belə bir halın baş verəcəyi təqdirdə prosesi işıqlandıran KİV nümayəndələri də yazılarında daha məsuliyyətli olmalı, dövlət sirri təşkil edən məlumatın yayılmamasına çalışmalı idi. Görünür, baş verənlərdən bundan sonra nəticə çıxarılacaq. DTX-də bu məsələ ilə bağlı araşdırma aparılması haqqında qərarın verilməsi düzgün və vaxtında atılmış addımdır”.
Ekspert daha sonra bildirdi ki, söhbət, faktiki olaraq, dövlət və xidməti sirrin yayılmasından gedir ki, bu da özlüyündə cinayət tərkibi olan məsələdir:
“Bu addımı bilərəkdən ataraq dövlət sirrinin yayılmasına vasitəçi olan şəxslər sözsüz ki, cəzalandırılmalıdır. Gəlin etiraf edək ki, indiki zamanda internet resursu yaradaraq, adını xəbər saytı qoyaraq, özünü də jurnalist elan edən şəxslər günü-gündən artmaqdadır. Jurnalistikadan tam xəbərsiz olan, hansı xəbərin necə verilməsi, etik normalar, dövlət sirri və s. haqqında anlayışı olmayan şəxslər, heç bir məsuliyyət hissi olmadan, demək olar ki, xəbərləri araşdırmadan, sadəcə, köçürüb saytlarına yerləşdirir. Artıq bu sahədə də qanun-qayda yaradılmasının vaxtı gəlib çatıb. Mətbuatın işini əlaqələndirən və ona nəzarət funksiyasını həyata keçirən orqan və şəxslər bu məsələyə ciddi diqqət ayırmalıdır”.
E.Həsənov daha sonra agentin nə mənanı daşıması anlamı ilə bağlı danışdı:
“Gəlin bir anlıq özümüzə sual verək: agent kimdir? Qısaca olaraq deyirəm: agent müəyyən edilmiş tapşırıqların yerinə yetirilməsində dövlətlə məxfi şəkildə əməkdaşlıq edən şəxsdir. Bu həmin insanlardır ki, yaşadıqları ölkənin, Vətən adlandırılan məkanın, digərlərinin təhlükəsizliyini qorumaq naminə bəzən öz sağlamlığı, həyatı bahasına risqə getməli olur. Təəssüf edirəm ki, agent anlamı Azərbaycan ictimai şüurunda hələ də mənfi obraz olaraq canlanır ki, bu da müəyyən məsələlərlə bağlıdır.
Son olaraq fikrimi belə tamamlamaq istərdim. Hər birimiz, tutduğumuz mövqedən, hansı cəbhədə dayanmağımızdan asılı olmayaraq, bir amal, bir dilək ətrafında yekdil olmalıyıq – Vətənin təhlükəsizliyi, ərazi bütövlüyü və müstəqillik.
Mətbuatı təmsil edən yoldaşlardan da bir xahişim var. Araşdırma aparmadan sual yarana biləcək məsələlər barədə yazılar paylaşmayın. Senzura hər bir insanın daxilində olmalıdır. Bu məsələlərdə diqqətli olun”.
Məhəmmədəli QƏRİBLİ