Azinforum.az İnformasiya Portalı Onlayn Xəbər Portalı
Azinforum.az xəbər verir ki, Orxan Zeynal adlı şəxs öz Feysbuk səhifəsində ilahiyyatçı Elşad Miri barədə sərt ittihamlar səsləndirib. Sözügedən şəxsin yazısında qeyd edilir ki, o, bir il yarım Elşad Mirinin yanında işləyib və bu müddət ərzində ilahiyyatçıda bir çox mənfi xüsusiyyətləri aşkar edib.
Orxan Zeynal yazır ki, Elşad Miri öz rəhbərliyi altında çalışan işçilərin pulunu kəsir və özü üçün təmtəraqlı həyat tərzi keçirir. Məlum paylaşımda Elşad Mirinin barəsində olduqca sərt fikirlər olduğu səbindən həmin yazıdakı bütün incəliklərə varmırıq. Bir faktı da qeyd edək ki, narazı şəxs ilahiyyatçını hətta Allahsızlıqda belə ittiham edib.
Barəsində səslənən kəskin ittihamlara aydınlıq gətirmək üçün Azinforum.az Elşad Miri ilə əlaqə saxlayıb. İlahiyyatçı saytımıza açıqlamasında bildirib ki, belə bir şəxs doğrudan da onun rəhbərlik etdiyi Media Monitorinq Mərkəzində çalışıb:
“Onun əsl adı Orxan Zeynalovdur. Kasıb adamıydılar. Biz onları iki qardaş işə götürdük. İşdə yol verdikləri nöqsanlara: yatdıqlarına və işə daim gecikdiklərinə görə onları işdən çıxarmışıq. Maaşlarını da tam alıblar. Bu səbəbdən də gedib barəmizdə olmazın iftiralarını səsləndirirlər. Artıq bu barədə polisə müraciət etmişəm”.
M.MİRZƏ
AZİNFORUM.AZ
