Vətəndaş Balabəyov Vüsal Əmiraslan oğlu Azinforum.az-a şikayətində bildirir ki, ona heç bir əsas olmadan Dövlət Yol Polisi (DYP) əməkdaşları tərəfindən cərimə yazılıb. Şikayətçinin sözlərinə görə, bu günlərdə onun idarə etdiyi 99DH751 dövlət nömrəli “Mercedes” markalı avtomobil Masazır qəsəbəsinin yaxınlığında “Duz gölü” deyilən əraziyə yaxın yerdə saxlanılaraq, ona avtomobilinin arxa yan şüşələrində olan pərdənin standarta uyğun olmadığına görə irad bildirilib:
“DYP əməkdaşları mənə dedilər ki, pərdəyə görə cərimələnirsən. Mən dedim ki, axı, pərdəyə qanunla noyabrın 15-nə kimi icazə verilir. Onlar maşınımda olan pərdənin standarta cavab vermədiyini əsas gətirərək , məni 869447 saylı protokoll əsasında cərimələdilər. Mən bu cərimə ilə razılaşmıram. Çünki qanunvericiliyə görə yalnız, kustar üsulla hazırlanan pərdələrdən istifadə qadağandır. Mənim avtomobilimdə olan pərdə isə sənayə üsulu ilə hazırlanıb və bütün mağazalarda açıq satışdadır. Mənə cərimə yazan DYP naryadına iradımı bildirdikdə onlar dedi ki, ürəyin hara istəyir şikayət et. Mən , sizin sayt vasitəsilə DYP rəhbərliyinə müraciət edərək, onlardan bu məsələnin dəqiq araşdırılması üçün göstəriş vermələrini xahiş edirəm. Çünki heç bir günahım olmadan mənə yazılan cərimənin məbləği aylıq qazancımın yarısı qədərdi. Bəs mən, övladlarımı nə ilə saxlayım?”
Azinforum.az olaraq edilən şikayətlə bağlı DYP rəsmiləri ilə əlaqə saxladıq. Onlar şikayətçinin DYP rəhbərliyinin adına rəsmi müraciət etməsinin zəruriliyini bildirdilər: “Yalnız bundan sonra həmin şikayət ətrafında araşdırılma aparıla bilər”.
M.MİRZƏ
AZİNFORUM.AZ