Azinforum.az İnformasiya Portalı Onlayn Xəbər Portalı
Fərəc Quliyev: “Həqiqətən belə bir qərar qəbul edilibsə, biz bundan maksimum dərəcədə yararlanmağa çalışmalıyıq”
Tahir Kərimli: “Rusiya ilə bağlı dediyiniz məzmunda bir qərarın qəbul edilməsini xatırlaya bilmirəm”
Ümumrusiya Azərbaycanlıları Konqresinin ləğvinin gündəmə gətirilməsi Kremlin Azərbaycana təzyiqi kimi qiymətləndirilir. Qurumun qeydiyyatının ləğvi istiqamətində atılan addımlara Milli Məclisin üzvləri, müstəqil politoloqlar sərt cavab verib
Məsələ ilə bağlı danışan politoloq Cümşüd Nuriyev deyib ki, məhkəmədən ÜAK-ın bağlanması qərarının çıxma ehtimalı yüksəkdir: “Məsələnin xarici işlər naziri Sergey Lavrovun çıxışından sonra gündəmə gəlməsi heç də təsadüfi deyil. Lavrov açıqlamasında bildirmişdi ki, Azərbaycan Avrasiya İttifaqına girməlidir. Ancaq rəsmi Bakı dəfələrlə bəyan edib ki, heç vaxt işğalçı dövlətin yer aldığı qurumda təmsil olunmayacaq. Hesab edirəm ki, Rusiya tərəfindən atılan addım ölkəmizə qarşı növbəti təzyiq metodudur. Xatırladım ki, 1992-ci ildə MDB-yə girmək məsələsi gündəmə gələndə də Azərbaycan ciddi təzyiqlərlə üzləşdi və ölkədə çevriliş baş verdi. Ulu öndər Heydər Əliyev hakimiyyətə gələndə Rusiya məsələni yenidən gündəmə gətirdi. O zaman MDB-yə müəyyən şərtlərlə daxil olundu və Milli Məclisdə əlavə qərar qəbul edildi. Əlavədə vurğulandı ki, əgər Azərbaycanın işğala məruz qalmış torpaqları ilə bağlı irəli sürdüyü şərtlərə 5 il müddətində əməl olunmazsa, rəsmi Bakı bir daha Rusiyanın təsir dairəsində olan heç bir quruma üzv olmayacaq. O gündən etibarən Azərbaycan nə KTMT-yə, nə Avrasiya İttifaqına, nə də Gömrük Birliyinə üzv oldu. İndi Moskva əldəqayırma birliklərini yenidən gündəmə gətirərək bu yolla Azərbaycana siyasi təzyiq etməyi düşünür. Mən bu cür hərəkəti Rusiyaya yaraşdırmadım. Belə varianta əl atmaq Kremlin zəifliyidir”.
Ekspertin sözlərinə görə, son dönəmlər ÜAK-ın nüfuzu çox sürətlə artmağa başlayıb: “Rusiyada yaşayan soydaşlarımız rus pasportu daşısa da, onların içində Azərbaycan sevgisi yüksəkdir. Fikrimcə, problemin arxasında erməni lobbisi və Lavrov durur. Düşmən və ona yardım edənlər Azərbaycanın, azərbaycanlıların mənfi imicini formalaşdırmağa çalışırlar. Ölkə mediası bu məsələni gündəmdən çıxarmamalı, televiziyalar mövzunun üzərinə getməlidir. Xüsusən Rusiya ilə münasibətlər yenidən müzakirə olunmalı, mövqeyimiz ortaya qoyulmalıdır”.
C.Nuriyevin açıqlamasında olduqca maraqlı detala rast gəlinir. O bildirir ki, vaxtilə Milli Məclis belə bir qərar qəbul edib ki, Azərbaycanın işğala məruz qalmış torpaqları ilə bağlı irəli sürdüyü şərtlərə 5 il müddətində əməl olunmazsa, rəsmi Bakı bir daha Rusiyanın təsir dairəsində olan heç bir quruma üzv olmayacaq. Bu iddianı nə dərəcədə əsaslı saymaq olar?
Millət vəkili Fərəc Quliyev “Bakı-Xəbər”ə açıqlamasında bildirdi ki, həmin dövrlər o, aktiv siyasətdə olmayıb:
“Dəqiq nəsə söyləyə bilmərəm, ancaq olduqca maraqlı məsələdir. Həqiqətən belə bir qərar qəbul edilibsə, biz bundan maksimum dərəcədə yararlanmağa çalışmalıyıq”.
Həmin dövrlər Ali Sovetin deputatı olan, hazırkı millət vəkili Tahir Kərimli də qəzetimizə açıqlamasında bildirdi ki, belə bir qərarın qəbul edilməsini xatırlamır:
“Bilirsiniz, həmin vaxt 50 nəfərdən ibarət Milli Şura da vardı. Həlledici qərarlar həmin yerdə müzakirə edilirdi. Mən həmin qurumun da iclaslarında iştirak edirdim. Ancaq Rusiya ilə bağlı dediyiniz məzmunda bir qərarın qəbul edilməsini xatırlaya bilmirəm. Bir o yadımdadır ki, MDB-yə girməklə bağlı gizli müzakirələrin aparıldığını eşitdim və istefa verdim. Mən bunun əleyhinə olmuşam. Yəqin ki, Cümşüd bəy nəyəsə əsaslanıb bunları deyir, amma mən xatırlamıram”.
Məhəmmədəli QƏRİBLİ
