Bakı Nəqliyyat Agentliyinin dayanma-durma qaydalarını pozan
sürücülərə qarşı cərimə tətbiq etməsi, uzun müddətdir ki, ictimaiyyətdə
sərt şəkildə tənqidlərə səbəb olur. Sürücülər bildirirlər ki, ilk
növbədə BNA avtomobillərin qanuni park edilməsi üçün yerlər yaratmalı,
təkliflər verməli, sonra bu cür cərimələri yazmalıdır. Eyni zamanda
bildirilir ki, bu cür cərimələr BNA tərəfindən heç bir xəbərdarlıq
edilmədən yazılır.
Qurumla
sonuncu bu cür qalmaqal müğənni Aybəniz Həşimovanın arasında yaşanıb.
Belə ki, A.Həşimova sosial şəbəkədə yazdığı statusda BNA-nın işçilərinin
yazdığı cərimələrdən gileylənmiş, bunu biabırçılıq adlandırmışdı.
Söyləmişdi ki, əgər marketlərin qarşısında maşın saxlamağa qadağanız
varsa, onda zəhmət olmasa bunu insanlara bildirin. Onlar da bilsinlər
ki, marketdən alış-veriş etmək üçün yalnız taksidən istifadə
etməlidirlər:
“Ödəniş
aparatı qoyulub bir neçə marketin qarşısına. İnsanlar orada pulu
ödəyib, marketə daxil olurlar. Evə çatmamış isə artıq BNA-nın cəriməsi
gəlir. Bunu necə başa düşək? Zəhmət olmasa bu yerlərə bir işarə qoyun,
insanlar da bilsin ki, orada maşın saxlamaq olmaz”.
BNA-nın
mətbuat katibi Mais Ağayev isə İTV-də yayımlanan “3D” verilişində qonaq
olarkən, A.Haşımovanı tənqid edərək, bunları deyib:
“Əməkdar
artist Aybəniz Həşimova səhər saat 7-8 arası bir status paylaşmışdı ki,
BNA bizim insanlara həyətlərində belə maşın saxlamağa imkan vermir.
Dərhal xanım müğənnimizlə əlaqə saxladım və avtomobilinin dövlət
qeydiyyat nişanını istədim. Əməkdar artist avtomobilin nömrəsini verdi,
sağ olsun. Baxdım ki, düz 4 yerdə qayda pozub. Sual verdim ki, bu
ünvanların hansında yaşayırsınız? Heç birində. Biri restoranın
qarşısıdır, biri gözəllik salonunun qarşısı, digəri isə ticarət
mərkəzinin. Yəni bu gün mən restorana və ya başqa yerə gedirəmsə, mənim
ora getməyimə görə ictimai nəqliyyatdan istifadə edənlər əziyyət
çəkməməlidir”.
“Yeni Müsavat”a danışan nəqliyyat eksperti İlqar Hüseynli bildirib ki, əslində BNA ondan gözlənilənləri tam doğrultmadı:
“Əsas
gözləntilər ondan ibarət idi ki, şəhər ərazisində ciddi infrastruktur
imkanları yaradılacaq və BNA da buna hər hansı bir töhfələr verəcək.
Eyni zamanda ölkənin ən ciddi problemlərindən olan parklanma ilə bağlı
ciddi irəliləyişlərin olacağına ümid var idi. Lakin çox təəssüf ki, Bakı
Nəqliyyat Agentliyi vətəndaşlara xidmət sektorundan daha çox, cərimə
yazan, sürücülərin problemlərini artıran qurum funksiyasına gəlib-çıxdı.
Bu qurum özünü ölkə ictimaiyyətinə dediyim formada təqdim edə bilib.
Əgər biz məsələyə sırf qanunvericilik baxımından yanaşarsaq, dayanma və
durma ilə bağlı qadağan olunan işarələrin olduğu yerdə sürücüyə
cərimənin yazılmasında qanunsuz məqam yoxdur. Burada deyə bilmərəm ki,
Bakı Nəqliyyat Agentliyi qanunu pozub. Əvvəllər məlum olduğu kimi bu
məsələlərlə Azərbaycan Dövlət Yol Polisi məşğul olurdu. Ancaq
dəyişikliklərdən sonra bu işlə məşğul olmaq bilavasitə Bakı Nəqliyyat
Agentliyinin səlahiyyətlərinə verildi. O cümlədən də cərimələrin tətbiqi
məsələsi də bu quruma tapşırıldı. Ona görə də işarələrin olduğu yerdə
yazılan cərimələr, qanunvericiliyə uyğundur. Konkret olaraq Aybəniz
Həşimovanın məsələsinə gəlincə isə burada da məsələnin qeyd etdiyim
tərəfinə baxmaq lazımdır. Lakin məsələ başqadır”.
Ekspert
bildirib ki, istər prospektlərin infrastruktur imkanlarının
artırılması, istərsə də ölkədə ödənişli parklanmaların təşkili
baxımından ciddi işlər görülmür:
“Şəhərdə nəqliyyatın durmadan artımı bu məsələlərdə də ciddi problemlər
yaradır. Vətəndaş maşınını saxlayıb bir neçə dəqiqəlik aptekə, mağazaya
daxil olur, qayıdanda isə cərimələrlə üzləşir. Yaxud da nəqliyyat
vasitəsinin aparılması halları ilə üzləşirsə, sözsüz ki, narazı qalacaq
və qalır da. Ona görə də öncə infrastruktur imkanları artırmaq lazımdır.
Parklanma və dayanma-durma yerlərinin sayı nə qədər çoxalacaqsa, o
qədər də vətəndaşların rahatçılığını təmin edib, cərimədən yaxa qurtarma
hallarını artıracağıq.
Burada
məsələ mübahisəlidir. Sözsüz ki, Bakı Nəqliyyat Agentliyini bu məsələ
üzərində düşünməlidir. Onlar öz fəaliyyətlərini elə qurmalıdırlar ki,
vətəndaşlar narazı qalmasınlar. Burada vətəndaş konkret olaraq
qeyri-bərabər vəziyyətə salınıb. Çünki parklanma üçün yer yoxdur, bir
tərəfdən də harada saxlayırsa, gəlib cərimə yazırlar. Yəni məsələyə
vətəndaşların gözü ilə baxdıqda, onlar haqlı durumdadırlar. Ona görə ki,
ilk növbədə maşın saxlamaq üçün şərait yaratmaq lazımdır. Bu şəraitə
əməl edilmədikdə isə cərimə yazmaq haqqın var. Əgər dayanmağa başqa yer
yoxdursa, insanlar nə etməlidirlər? Bütün bunlar nəzərə alınarsa,
vətəndaşlarla BNA arasında yaşanan və davamlı hala gələn narazılıq
aradan qalxar. Əks halda problem daha da genişlənəcək və narazılıqlar
getdikcə artacaq”.
Ana səhifə / Aktual / BNA-nın dayanma-durma oyunbazlığı… – Belə qayda yaratmırlar, narazılıq yaradırlar…
Həmçinin oxuyun
Bakı Sağlamlıq Mərkəzində milyonlar necə xərclənir? – Asiman Həsənovun müəmmalı tenderləri…
Fevral ayının 21-də Bakı Sağlamlıq Mərkəzinə 2 dişinə plomb qoyulması üçün müraciət edən Xədicə Babazədinin …