Çərşənbə axşamı , Noyabr 24 2020
Ana səhifə / Aktual / AZƏRBAYCAN QADINLARI ÜZ-ÜZƏ: polislər və cadralılar –  MƏHƏMMƏDƏLİ QƏRİBLİ

AZƏRBAYCAN QADINLARI ÜZ-ÜZƏ: polislər və cadralılar –  MƏHƏMMƏDƏLİ QƏRİBLİ

Son günlər ölkə gündəminin ən aparıcı mövzularından biri də Nardaran adı ilə bağlı oldu. Hətta deyərdik ki, bu mövzu Rusiya ilə Türkiyə arasında yaşanan təyyarə qalmaqalını, ondan sonra isə bir millət vəkilinin Məhəmməd Əmin Rəsulzadəni təhqir etməsinə dair səslənən iddialarla bağlı xəbərləri də arxa plana keçirə bildi. Nardaran adının bu məsələdə hallanması hadisənin məhz o kənddə baş verməsi baxımından aktuallıq kəsb etməyə başladı.
Əminik ki, analoji hadisə istər miqyas, istərsə də mahiyyət baxımından harda baş versəydi, həmin inzibati mərkəz və ya kənd adı gündəmdə olacaqdı. Çünki polisə tabe olmayan, hələ hansı əməlləri törətməyi planlaşdırdıqları istintaqla araşdırılan bir qrupun Azərbaycan qanunlarına tabe olmayaraq asayiş keşikçilərinə silahlı müqavimət göstərmələri kimi ciddi bir hadisə baş vermişdi və nəticədə 7 insan həyatını itirdi. Hadisələrin gedişi də göstərdi ki, Azərbaycan polisinin, dövlətinin Nardaranda yaşayan kənd sakinləri ilə heç bir problemi olmayıb. Sadəcə, kəndi özlərinə qalxan kimi seçmək istəyən bir ovuc radikal islamçının qanunlara tabe edilməsinə cəhd olunub. Nardaran ağsaqqalları vəziyyəti tam məsuliyyəti ilə dərk etdikdən sonra proseslər sakit məcrada davam etməyə başladı. Artıq kənddə həyat normal ritminə dönüb.
Ancaq biz bir şeyi aydınlaşdırmaq və çoxlarına bəlli olan vacib bir məqamın üzərinə qayıtmaq istədik: əslən Nardarandan olmayan radikallar niyə məhz həmin kəndi özlərinə qalxan seçmək planı üzrə hərəkət ediblər? Etiraf etməliyik ki, Nardaranda bir qədər cəhalət hökm sürür. Kənd əhalisinin əksəriyyəti dini cərəyanlardan birinə meyllidir. Qadınların təhsil almasına pis baxırlar. Bir sözlə, kənddəki həyat ritmi bir geriliyi ilə seçilir. İctimai diqqət kəndə yönələndə məlum oldu ki, kəndin küçələrində hansı quruma və ya dövlətə aid olduğu bilinməyən bayraqlar asılıb. Hətta bəzi qızışdırıcı elementlərin tələbi ilə kənddə barikadaların qurulmasına da cəhd olundu. Təbii ki, yaranmış vəziyyət kənddə xüsusi əməliyyatın keçirilməsini zəruri edirdi. Dövlətin güc nazirliklərinin birgə fəaliyyətinin nəticəsi olaraq Nardaranda uğurlu əməliyyat keçirildi.
Daxili İşlər Nazirliyinin, Daxili Qoşunların və nizami polis hissələrinin məhdud sayda xüsusi texnikası, şəxsi heyəti qəsəbəyə daxil olub, müəyyən edilmiş yerlərdə postlar qoyuldu və hazırda da xüsusi əməliyyat zonasında Baş Prokurorluğun, Daxili İşlər və Milli Təhlükəsizlik nazirliklərinin istintaq-əməliyyat qrupu fəaliyyət göstərir.
Əməliyyat zamanı DİN əməkdaşlarının sakinlərlə olduqca həssas davrandıqları nəzərə çarpdı. Belə ki, yoxlamalar zamanı qəsəbə sakini olan qadınları kişi polis əməkdaşları əvəzinə xanım əməkdaşlar yoxlayıb.

qadin-rfsdf
Azərbaycanda hüquq-mühafizə orqanlarının indiyədək həyata keçirdiyi əməliyyatlar sırasında ilk dəfədir ki, xanım polislər genişmiqyaslı nəzarət yoxlama proseslərinə cəlb olunub.
Bu xəbərlərlə yanaşı həmin proseslərin fotoları da yayıldı ki, bu fotolarda qadın polislərimizlə yanaşı duran kənd qadınlarının görüntüləri tamamilə təzadlı bir mənzərəni ortaya qoyurdu. Biz dinə qarşı deyilik. Ancaq ifrat xurafat özünü həmin fotolarda göstərirdi. Hər iki qadın eyni millətin nümayəndəsi olsa da, biri sivil formada öz dövlətinin keşiyində durur, digəri isə hələ də Azərbaycanda 20 əsrin əvvəlində atılan çadradan çıxa bilmir. Bu mənzərə Azərbaycan qadınının idmanda, mədəniyyətdə, incəsənətdə göstərdiyi hünərin davamını da özündə əks etdirir. Azərbaycan qadını sübut edir ki, lazım gələndə o ən qaynar yerlərdə belə dövlətinin maraqlarını qorumağa hazırdır.
Belə bir polis kontingentinin formalaşmasında Daxili İşlər Nazirliyinin rəhbərliyinə böyük təşəkkür düşür. Çünki qadınların polisə cəlb edilməsi ilə bağlı nazirlik elan verəndə, hətta əksər ekspertlər belə bu işin Azərbaycan qadını üçün olmadığını deyirdi. Bəziləri isə Azərbaycan qadınına “mətbəxin ayrılmaz atributu” gözü ilə baxırdı.
Qeyd edək ki, dünya təcrübəsində əməliyyata gedən xüsusi təyinatlı polislər yalnız kişilərdən ibarət olur. Qadınlar belə əməliyyatlara cəlb olunmur. Ancaq DİN Nardaran sakinlərinə anlayışlı yanaşdığı üçün orada keçirilən əməliyyata xanım polisləri də cəlb etdi.
“Polisə Dəstək” İctimai Birliyinin rəhbəri Şəmsəddin Əliyev də hesab edir ki, qadın polislərin elə əməliyyata cəlb olunması olduqca təqdirəlayiqdir: “Bu, həm də Azərbaycan dövlətinin unitarlığını təsdiq edir. Eyni zamanda, Daxili İşlər Nazirliyinin həmin bölgəyə həssas yanaşmasını ortaya qoyur. Ola bilərdi ki, həmin kənddə qadınların olduğu yerdə və ya onların üstündə axtarış aparılsın. Həmin kəndin bəzi xsusiyyəti əvvəlcədən nəzərə alındığı üçün qadın polislərin kənddə iştirakı vacib sayılıb. Mən həmin qadın həmkarlarımıza belə qaynar yerlərdə mətin qulluq etdikləri üçün dərin minnətdarlığımı bildirirəm”.

 

Həmçinin oxuyun

PUA-ları Qarabağda dayandırmaq mümkün olmadı – Fransız nəşri

Ermənilərin əlində olan Rusiya hava hücumundan müdafiə sistemləri çoxməqsədli olmalarına baxmayaraq, Qarabağda PUA-ları dayandıra bilmədi. …

Bir cavab yazın