Bakıda mitinqin hər hansı başqa bir gündə yox, məhz 11 sentyabrda – ABŞ-da düz 15 il əvvəl törədilmiş dəhşətli terrorun ildönüm günündə keçirilməsi təsadüfdürmü? Təsadüf, ya qanunauyğunluq olduğunu bilməsək də, oxşarlıqlar çoxdur.
Məsələn, ABŞ-dakı 11 sentyabr terroru həm də ölkədə xaos törətmək məqsədilə həyata keçirilmişdi. Bakıdakı 11 sentyabr aksiyasının da, tam nəzarətə alınmasaydı, hansısa xaos həddinə qədər gətirilməyəcəyinə kimsə zəmanət verə bilməz. ABŞ-dakı 11 sentyabr terrorunun ssenarisi məlum xarici dairələrdə cızılmışdı. Bakıdakı 15 sentyabr aksiyasının da əsasən xaricdən idarə olunduğuna dair çox ciddi şübhələr var. Bakıda mitinqin niyə məhz ABŞ-dakı 11 sentyabr olaylarının ildönüm günündə təyin edilməsinin arxasında hansı simvolik mətləblər ola bilər? Bəlkə 15 il əvvəl ABŞ-ın mənzərəsini dəyişdirmək hədəfləndiyi kimi, bu gün də Azərbaycanın mənzərəsini 11 sentyabrdakı kimi aksiyalarla dəyişdirməyi hədəfləyən qüvvələr barədə daha ciddi düşünməliyik?
Hiss olunur ki, bəzi regional güclər, gizli servislər və dini cərəyanlar Azərbaycanda sabitliyi pozmaq, xaos yaratmaq və bunun da nəticəsində hakimiyyəti zorla ələ keçirmək barədə razılığa gəlib. Bu strategiya xüsusilə də FETÖ-nün Türkiyədə həyata keçirmək istədiyi uğursuz hərbi çevriliş cəhdindən sonra daha da açıq müstəvidə özünü büruzə verir. Azərbaycan hüquq-mühafizə orqanlarının apardığı əməliyyat zamanı radikal müxalifət partiyası sayılan Azərbaycan Xalq Cəbhəsinin (AXCP) də FETÖ ilə əlaqələrinin olması üzə çıxdı. Partiya sədri Əli Kərimlinin köməkçisi Faiq Əmirli terror təşkilatının təbliğatçısı ittihamı ilə həbs edildi. Bununla yanaşı, partiyanın bəzi fəallarının da FETÖ ilə əlaqədə olmasına dair konkret faktlar göstərildi. Eyni zamanda, son vaxtlar AXCP ilə “Gülən camaatı” arasında yeni əlaqələr müəyyən edilib, FETÖ-nün Türkiyədən sonra radikal müxalifət vasitəsilə Azərbaycanda da vəziyyəti gərginləşdirmək planı üzə çıxıb.
Göründüyü kimi, ABŞ-Gülən şəbəkəsi-bəzi region ölkələri Azərbaycanda siyasi proseslərin normal axarını çərçivədən çıxarmaq, cəmiyyətdə gərginlik, qarşıdurma yaratmaq üçün birgə plan həyata keçirir. FETÖ-yə bağlı olan müxalifət nümayəndələrinin həbsindən sonra sanki radikal müxalifətə əlavə impuls verildi. Əvvəllər bəzi Qərb ölkələri və ABŞ-ın qapısı önündə onları qəbul etmək xahişilə var-gəl edən müxalifətin tanınmış simaları ayrı-ayrılıqda sözügedən ölkələrin səfirliklərinə dəvət olundu. Ölkə mətbuatında səfirliklərə dəvət olunan siyasilərin təlimatlandırıldığı, hətta kütləvi aksiyaların təşkili üçün onlara külli miqdarda pulun verilməsi barədə konkret faktlara əsaslanan məqalələr dərc edilməyə başladı. Səfirliklərdə qonaq olan şəbəkə deyilən ittihamaları birmənalı şəkildə rədd edirdi. Ancaq 11 sentyabr mitinqi yazılanların və irəli sürülən ehtimalların ciddi olduğuna möhkəm əsaslar verdi. Sentyabrın 11-də keçirilmiş mitinqə Qərb dairələrinin, habelə bəzi region ölkələrinin yaxından dəstəyi açıq müşahidə olundu.
AXCP, Müsavat, “Ümid”, REAL və digər qurumların rəhbərlərinin ABŞ və bəzi Qərb ölkələrinin səfirliklərinə çağırılması, müzakirələrin aparılması, bundan sonra Milli Şuranın mitinq keçirmək barədə qərar qəbul etməsi, habelə aksiya ərəfəsində ABŞ səfirliyindən siyasi partiyalar, QHT-lərlə intensiv əlaqə saxlanması və mitinqin dəstəklənməsinin xahiş olunması barədə mediada gedən məlumatlar bunu bir daha təsdiq edir. Cəmil Həsənlinin Strasburqa səfəri, ABŞ Konqresində, Haaqada Azərbaycanla bağlı müzakirələrin təşkili göstərir ki, bəzi Qərb dairələri Azərbaycanda vəziyyəti gərginləşdirmək məqsədilə növbəti dəfə hərəkətə keçib.
Xüsusilə də bu prosesdə avanqard rolunu oynayan AXCP sədri Əli Kərimli və onun ətrafının Azərbaycanın imicini ləkələmək və ölkədə gərginlik yaratmağa meylli olduğu üzə çıxır.
Sentyabrın 11-də keçirilən mitinqdə iştirak edən elektoratın böyük əksəriyyətini radikal dindarların təşkil etməsi prosesə bəzi başqa dairələr tərəfindən də təkan verilməsini təsdiqlədi.
“İslam Hərəkatı Birliyi”nin sədri Taleh Bağırzadənin və İslam Partiyasının rəhbəri olmuş Mövsüm Səmədovun da tərəfdarlarının 11 sentyabr mitinqinə qoşulması bu prosesin bəzi qonşu ölkələrin müəyyən dairələri tərəfindən dəstəkləndiyini və idarə olunduğunu aydın göstərir. Milli Şura və AXCP Azərbaycana qarşı yönəlmiş həmlələri dəstəkləmək və anti-Azərbaycan dairələrin sifarişlərinin icrasına meyllənməklə olan-qalan milli təəssübkeşlik şüarlarını tam şübhə altına atdı.
Məlumdur ki, Müsavat Partiyası ayın 18-nə mitinq təyin edib. Əli Kərimli Müsavat Partiyasının təyin etdiyi mitinqi pozmaq üçün, əvvəlcədən planlaşdırılmadığı halda, bir gün qabağa mitinq təyin etdi ki, digər müxalifət partiyası hansısa prosesə təkan verə bilməsin. Proseslər göstərir ki, artıq Əli Kərimlinin və onun dəstəsinin ətrafında oynanılan antimilli ssenarilər getdikcə güclənir, bu ssenarilərə AXCP-nin özü də aktiv cəlb olunur, həm də bu proses AXCP-dəki çox az sayda sağlam milli qüvvələrin aldadılması hesabına sürətlə həyata keçirilir.
Hələ 90-cı illərdən özünü bütün siyasiləşmiş dinlərdən uzaq tutmağa çalışan Elçibəyçi Xalq Cəbhəsinin varisi olan bugünkü AXCP-nin, dini cərəyan olub-olmadığı tam mübahisəli olan, hətta öz ölkəsi Türkiyədə tam siyasi uğur qazana bilməyən marginal Gülən hərəkatının, çoxdandır ölkəmizdə şiəliyi siyasiləşdirməyə və bu mümkün olmadıqda heç olmasa şiə-sünni ədavəti salmağa çalışan regional islamçı qüvvələrin bir arada olması çox ziddiyyətli görsənsə də, bu məhz belədir. Bu qədər rəngarəng siyasi spektrin bir çərçivəyə toplanması yalnız qüdrətli xarici dairələrin təlimatı ilə baş verə bilər. İranın, Suriyanın, Livanın, Misirin təcrübəsindən gördük ki, bu dairələrin hədəfi ümumölkə miqyaslı xaos törətməkdir. Təəssüf ki, xaosun mərkəzində itirdiyi hakimiyyəti qaytarmaq iddiasını bir an yerə qoymayan AXCP və onun çevrə qüvvələri dayanır.
Siyasi Texnologiya və İnnovasiya Mərkəzinin rəhbəri Mübariz Əhmədoğlu da qəzetimizə açıqlamasında əsasən bu qənaətləri bölüşdü. “Bəzi radikal müxalifət nümayəndələri özlərini çox gülməli vəziyyətə salır” – deyən Əhmədoğlu bildirdi:
“Son aksiyada iştirak edənlərin sayı ilə bağlı ağla gəlməyən astronomik rəqəmlər söyləyirlər. Hətta stadionun tutumunu nəzərə almayıb 10 minlərlə iştirakçının olduğunu da bildirirlər. Amma rəsmi qurumlar sayı 2500 göstərir. Lap olsun 5000. Bu sayla nəsə etmək mümkün deyil axı. Mənim həmin müxalifət nümayəndələrinə bir tövsiyəm var. Yaxşı olar ki, öz sözlərini desinlər, çıxışlarında onlara verilən tezisləri oxumasınlar. Bir də demək istəyirəm ki, bu yolla pul qazanmağa meylli olmasınlar. Keçmişə baxsınlar, Qərb və başqa dairələr Azərbaycanda nələr hazırlamadı… Hətta sosial şəbəkələrdəki fəaliyyəti artırmaq üçün kifayət qədər qrant da ayırmışdılar. Əminəm ki, indikindən qat-qat çox idi. Nəticə oldumu? Çünki Azərbaycan hakimiyyəti yüksək özünüqoruma instinktinə malikdir. Hakimiyyət öz gücünü xalqdan alır. Lazım olan anda həmin instink işə düşəcək. Çox təhlükəli məqamlardan biri də budur ki, özünü demokratik adlandıran müxalifət indi radikal dindarların təsiri altına düşüb. Mən həmin mitinqdə başqa çömçələri də gördüm. Yəni aranı qarışdırmaq istəyən ancaq Qərbin çömçəsi deyildi. Əminəm ki, bütün proseslər nəzarət altındadır. Yaxşı olardı ki, həmin dairələr ölkənin milli maraqlarını kiməsə qurban verməsin. Aydındır ki, belə hərəkətlərə verilən ictimai qınaq və hüquqi tənbeh çox ağır olur.
Yəqin ki, ölkədəki stabilliyi pozmaqda maraqlı olan qüvvələr bundan sonra papaqlarını qarşılarına qoyub yaxşı-yaxşı fikirləşəcək. Radikal dindar, FETÖ, demokrat, liberal eyni əldən hansısa prosesə təhrik edilirsə, deməli, məqsəd ölkənin suverenliyinə, demokratik quruluşuna xələl gətirməyə hesablanıb”.
Məhəmmədəli QƏRİBLİ