Bakının bu küçəsi belə vəziyyətə gətirildi – Foto

Nəsimi və Nərimanov rayonları arasında uzanan və sözügedən rayonların əsas nəqliyyat arteriyasını təşkil edən Təbriz küçəsində aparılan işlər davam edir.

Azərbaycan Avtomobil Yolları Dövlət Agentliyindən Axar.az-a verilən məlumata görə, 3.5 km uzunluğa malik küçənin artıq 1.1 km-i əsaslı şəkildə təmir olunaraq vətəndaşların istifadəsinə verilib.

Küçənin qalan 2.4 km-lik hissəsində isə hazırda təmir-tikinti işləri davam etdirilir. Yenidənqurma işləri zamanı küçənin 45 min kv.m sahəsi frezlənib, küçə boyu mövcud köhnə yağış-kanalizasiya sistemi bərpa olunaraq işlək vəziyyətə salınıb.

Ümumilikdə yol boyu 10 min p-metr yeni səki daşının düzülməsi nəzərdə tutulub.

Sutkanın qaranlıq saatlarında küçənin normal işıqlandırılmasını təmin etmək məqsədi ilə işıqlandırma sistemi yenilənir, 8 yerdə avtobus dayanacaqlarının önündə xüsusi “cib”li hissələr yaradılır.

Xatırladaq ki, yolun artıq təmir edilərək istifadəyə verilən hissəsi Nəriman rayonunun böyük və hərəkət intensivliyi ilə seçilən küçələri – Əliyar Əliyev, Ağa Nemətulla, Əhməd Rəcəbli, Həsənoğlu küçələri ilə kəsişir.