Yenicə təmiri başa çatan paytaxtın “Babək” prospektindən yayılan görüntülərdə maraqlı mənzərə üzə çıxıb. Belə ki, 8 km istiqamətindən şəhərin mərkəzinə doğru hərəkət edərkən , prospektdən “Ağ şəhər”ə ayrılan yolla üzbəüz, körpüyə az qalmış ərazidə olan yaşıllıq kütləvi şəkildə məhv edilib.
Azinforum.az- ın həmin ərazidə apardığı araşdırmadan sonra məlum olub ki, dəmir yolunun kənarında olan həmin yaşıllıq ərazi prospektdə təmir gedərkən hasarlanıb, sonra ağacların kütləvi qırılması həyata keçirilib. Fotodan görünür ki, məhv edilən yaşıllığın yerində hansısa yeni “obyektin” tikintisi planlaşdırılır. Ərazi aparıcı magistralın düz kənarında olduğu üçün, olduqca baha qiymətə satıldığını təxmin etmək olar. Həmin yerin tanınmış bir iş adamı tərəfindən sabiq icra başçısı Razim Məmmədovun xeyir-duası ilə qəsb edildiyi bildirilir. Yəqin ki, bu hərəkət vəzifəsindən iki gün əvvəl azad edilən Xətainin sabiq icra başçısı Razim Məmmədovun yaşıllıqlara necə qənim kəsildiyinin son mənzərəsi sayıla bilər. Güman edirik ki, əlaqədar qurumlar bu qanunsuzluğun qarşısını tez bir zamanda almaqda maraqlı olacaqlar.
Çinarə SEYİDOVA,
Azinforum.az