“Rufo Gəncinski” 8 il aldı, “Ded Xasan”a görə bir neçə il də alacaq…

Kriminal aləmdə “Rufo Gəncinski” kimi tanınan məşhur azərbaycanlı kriminal avtoritet Ülfət Tağıyev Moskva məhkəməsi tərəfindən 8 il müddətinə azadlıqdan məhrum edilib.

Virtualaz.org saytı Rusiya KİV-lərinə istinadən xəbər verir ki, hökmə əsasən o, cəzasını ciddi rejimli həbsxanada keçirməlidir. Lakin “Rufo Gəncinski” hələlik Moskvanın Lefortovo zindanını tərk etməyəcək. Çünki onun barəsində başqa cinayət işləri üzrə araşdırma gedir. Bura məşhur kriminal general, “Ded Xasan” ləqəbli Aslan Usoyanın qətlinin təşkil edilməsi də daxildir.

Tağıyev təcridxanada özü etiraf edib ki, “Ded Xasan”ı vuran killeri qoruyub və onun hadisə yerindən qaçmasını təşkil edib.

“Rufo Gəncinski” 2013-cü ilin sentyabrında Moskvada xüsusi təyinatlılar tərəfindən saxlanılıb. Əməliyyatçıların məlumatına görə o, məşhur azərbaycanlı kriminal avtoritet “Rövşən Lənkəranski”nin yaxın ətrafına daxildir və onun killerlər briqadasının rəhbəridir.

“Ded Xasan”ın öldürülməsinin “Rövşən Lənkəranski” tərəfindən təşkil edilməsi kriminal aləmin və əməliyyatçıın üstünlük verdiyi əsas versiyadır. “Ded” 2013-cü ilin yanvarında Moskvadakı “Köhnə Fayton” restoranından çıxarkən güllələnib.