Ana səhifə / Araşdırma / Əli Abbasovun xalası oğlu ifadə verdi – “Rabitə işi”

Əli Abbasovun xalası oğlu ifadə verdi – “Rabitə işi”

Bu gün Bakı Ağır Cinayətlər Məhkəməsində mənimsəmədə və vəzifə səlahiyyətlərindən sui-istifadə etməkdə təqsirləndirilən Rabitə və Yüksək Texnologiyalar Nazirliyinin (RYTN) sabiq Aparat rəhbəri Vidadi Zeynalov, “Aztelekom” MMC-nin sabiq baş direktoru Məhəmməd Məmmədov, “Bakı Telefon Rabitəsi” İstehsalat Birliyinin sabiq rəhbəri Beytulla Hüseynov, “Bakı Telefon Rabitəsi” İstehsalat Birliyinin baş mühasibi Anar Mustafayev, “AzİnTelekom” MMC-nin sabiq baş direktoru Cəlil Cəfərov, “Azərpoçt” MMC-nin sabiq baş direktoru Qəmbər Bəybalayev, “Optik Rabitə, Tikinti və Quraşdırma” MMC-nin baş mühasibi Səhrab Hümbətov, həmçinin Emin Məmmədov, “Bakı Rabitə Təmir Tikinti” və “Təmir Təchizat Servis” MMC-lərinin direktoru Bayram Vəliyev, “Optik Qurğular” İdarəsinin rəisi Namazəli Məmmədov və “Aztelekom” MMC-nin baş mühasibi Oktay Rüstəmovun cinayət işi üzrə məhkəmənin növbəti iclası keçirilib.
“Report”un məlumatına görə, hakim Əfqan Hacıyevin sədrliyi ilə keçirilən prosesdə şahid qismində Adil Qasımov ifadə verib.
O, təqsirləndirilən şəxslərdən heç kimi tanımadığını, “Yeni Həyat” MMC-nin direktoru olduğunu deyib. İstintaqa verdiyi ifadəni təsdiq etdiyini bildirən A.Qasımov tikinti üçün 80 min manat ayrıldığını söyləyib: “Həmin pulun 40%-ni isə “Aztelekom” MMC-nin işçisi Həsənalı vasitəsilə onların rəhbərliyinə qaytarırdım. Pulun kimə verildiyini konkret olaraq bilmirəm. Bir sözlə, heç nə qazanmırdıq, hamballıq edirdik”.
Təqsirləndirilən “Aztelekom” MMC-nin baş mühasibi O.Rüstəmov bildirib ki, şahid A.Qasımov bütün işləri Vidadi Zeynalovla həll edib.
Daha sonra A.Qasımovun istintaqa verdiyi ifadəsi elan olunub. O, ifadəsində O.Rüstəmovu tanıdığını, geri qaytardığı məbləği ona çatdırıldığını qeyd edib. Bundan sonra A.Qasımov məhkəməyə verdiyi ifadəsini təsdiq etdiyini vurğulayıb.
“Bakı Telefon Rabitəsi” İstehsalat Birliyinin baş direktor müavini Əhməd Mehdiyev dindirilərkən I Avropa Oyunları ilə bağlı kabelləşmənin 200 km məsafəni qovşaqlar, qalan hissəsini isə özəl şirkətlərin çəkdiyini bildirib. Onun sözlərinə görə, müqavilə özəl şirkətlərlə bağlanılıb.
Təqsirləndirilən B.Hüseynov I Avropa Oyunları ilə bağlı işlərin görülməsi üçün 10 milyon manat vəsait müəyyən olunduğunu deyib.
“Qafqaz İnşaat” MMC-nin rəhbəri Qorxmaz Həziyev ifadəsində rayonlarda tikinti işlərində çalışdıqlarını, şirkətin gördüyü işlərin ümumi həcmi təxminən 20 milyon manatdan ibarət olduğunu deyib. Q.Həziyev Elçin İbrahimovun onun dostu olduğunu söyləyib: “Bunu hamı bilir ki, Elçin keçmiş nazir Əli Abbasovun qaynıdır. Elçinə usta, texnika lazım olanda mənə deyirdi. Mən də onun üçün göndərirdim”.
V.Zeynalov “Qafqaz İnşaat” MMC-yə pulların göndərilməsinə sabiq nazir Ə.Abbasovun göstərişi ilə özünün nəzarət etdiyini bildirib. O, şişirdilmiş rəqəmlərin özlərinə aid olduğunu vurğulayıb.
Günün ikinci yarısında davam etdirilən prosesdə şahid Vüqar Əfəndiyev dindirilib.
O, “Azərpoçt”da baş mühasib olduğunu deyib. Şahid rəhbərlikdən pul aldığını etiraf edib: “Bağlı şəkildə şirkətlərdən alıb, Vidadi Zeynalova aparıb vermişəm”.
Şahid qismində “Aztelekom” MMC-də şöbə rəisi olmuş Həsənqulu Qurbanov ifadədəsində əsasən binaların eskiz layihələrini hazırladıqlarını söyləyib. O, sabiq nazir Əli Abbasovun xalası oğlu olduğunu deyib.
Daha sonra H.Qurbanovun ifadəsinin ibtidai istintaqla ziddiyyət təşkil etdiyi açıqlanıb. Onun ifadəsi elan olunub. Şahid ifadəsində göstərilib ki, “Aztelekom” MMC-də alınacaq tikinti materiallarının qiyməti yüksək göstərilib və buna görə dövlətə külli miqdarda ziyan dəyib.
H.Qurbanov isə bu ifadəsindən xəbərsiz olduğunu bildirib.
Şahid İlqar Hüseynov isə ifadəsi zamanı “Təmir Təchizat Servis” MMC-də anbardar vəzifəsində çalışdığını söyləyib. O, tikinti materiallarının qiymətləri cəmiyyətin mühasibatlığında bir neçə dəfə artıq göstərildiyini vurğulayıb.
Məhkəmənin növbəti icladı dekabrın 23-nə təyin edilib.
Qeyd edək ki, 2015-ci ilin noyabr ayının 13-də Baş Prokurorluğun Rabitə və Yüksək Texnologiyalar Nazirliyindəki həbslərlə bağlı yaydığı rəsmi məlumata görə, nazirliyin Aparat rəhbəri V.Zeynalovun qulluq mövqeyindən sui-istifadə edərək nazirliyin strukturuna daxil olan ayrı-ayrı qurumların vəzifəli şəxsləri ilə qabaqcadan razılaşmaqla həmin strukturlar tərəfindən işlərin görülmədiyi, tam yerinə yetirilmədiyi, avadanlıqlar alınmadığı, istifadə olunan avadanlıqların, xidmətlərin qiymətlərinin isə 4-5 qat şişirdilməsi və digər üsullarla işlərin və xidmətlərin guya yerinə yetirilməsini özlərinin himayə etdikləri, yaxın münasibətdə olduqları şəxslərin adına olan özəl şirkətlər tərəfindən saxta sənədlər əsasında rəsmiləşdirməsini təmin etməklə müvafiq müəssisələrin ayrı-ayrı banklardakı hesabına köçürülmüş 73 milyon 590 min manat pul vəsaitinin nağdlaşdırılmaqla mənimsənilməsini və israf edilməsini təşkil etməsində şübhələr üçün əsaslar müəyyən edilib.
Bundan başqa, Baş Prokuror yanında Korrupsiyaya qarşı Mübarizə Baş İdarəsi tərəfindən RYTN sistemində həyata keçirilmiş yoxlamalar nəticəsində “Aztelekom” MMC-nin sabiq baş direktoru M.Məmmədov, “Bakı Telefon Rabitəsi” İstehsalat Birliyinin sabiq rəhbəri B.Hüseynov, “Bakı Telefon Rabitəsi” İstehsalat Birliyinin baş mühasibi A.Mustafayev, “AzİnTelekom” MMC-nin sabiq baş direktoru C.Cəfərov, “Azərpoçt” MMC-nin sabiq baş direktoru Q.Bəybalayev, “Optik Rabitə, Tikinti və Quraşdırma” MMC-nin baş mühasibi S.Hümbətov, həmçinin E.Məmmədov, “Bakı Telefon Rabitəsi” İstehsalat Birliyinin (BTRİB) Nizami telefon qovşağının sabiq rəisi F.Seyidov və həmin birliyin baş mühasibi R.Məmmədov, “Bakı Rabitə Təmir Tikinti” və “Təmir Təchizat Servis” MMC-lərinin direktoru B.Vəliyev, “Optik Qurğular” İdarəsinin rəisi N.Məmmədov və “Aztelekom” MMC-nin baş mühasibi O.Rüstəmov da saxlanılıb.
Daha sonra məhkəmə onlar barəsində həbs qətimkan tədbirinin seçilməsi barədə qərar verib. RYTN-in mənimsəmədə və vəzifə səlahiyyətlərindən sui-istifadə etməkdə təqsirləndirilən 11 keçmiş əməkdaşı ümumilikdə 40 milyon manat pulu mənimsəməkdə ittiham olunurlar. İittiham aktına əsasən, A.Mustafayev 567 min, E.Məmmədov 7 milyon 700 min, O.Rüstəmov 250 min, S.Hümbətov 32 min 400 min, Q.Bəybalayev 2 milyon, C.Cəfərov 1,5 milyon, B.Vəliyev 204 min, V.Zeynalov 8 milyon, B.Hüseynov 10 milyon, M.Məmmədov 4 milyon 500 min və N.Məmmədov isə 4 milyon manat mənimsəməkdə təqsirli bilinirlər. V.Zeynalov, B.Hüseynov, A.Mustafayev, E.Məmmədov, M.Məmmədov, O.Rüstəmov, N.Məmmədov, S.Hümbətov, Q.Bəybalayev Cinayət Məcəlləsinin 179.3.1-ci (mənimsəmə və ya israf etmə, mütəşəkkil dəstə tərəfindən törədildikdə), 179.3.2-ci (mənimsəmə və ya israf etmə, külli miqdarda törədildikdə), 29, 179.3.1-ci (mənimsəmə və ya israf etməyə cəhd, mütəşəkkil dəstə tərəfindən törətməyə cəhd), 29, 179.3.2-ci (mənimsəmə və ya israf etməyə cəhd, külli miqdarda törətməyə cəhd),308.2 (vəzifə səlahiyyətlərindən sui-istifadə) və 313-cü (vəzifə saxtakarlığı), C.Cəfərov 179.3.1-ci (mənimsəmə və ya israf etmə, mütəşəkkil dəstə tərəfindən törədildikdə), 179.3.2-ci (mənimsəmə və ya israf etmə, külli miqdarda törədildikdə) və B.Vəliyev isə 179.3.1-ci (mənimsəmə və ya israf etmə, mütəşəkkil dəstə tərəfindən törədildikdə), 179.3.2-ci (mənimsəmə və ya israf etmə, külli miqdarda törədildikdə), 308.2 (vəzifə səlahiyyətlərindən sui-istifadə) və 313-cü (vəzifə saxtakarlığı), 213.2.2-ci (vergi ödəməkdən yayınma, külli miqdarda törədildikdə) maddələri ilə ittiham olunurlar. RYTN dəymiş ziyana görə 163 milyon manat dəyərində mülki iddia qaldırıb. Vergilər Nazirliyi (VN) isə təqsirləndirilən B.Vəliyevə qarşı 255 min manatlıq mülki iddia irəli sürüb.
Xatırladaq ki, hazırda Bakı Ağır Cinayətlər Məhkəməsində “Bakı Telefon Rabitəsi” İstehsalat Birliyinin (BTRİB) Nizami telefon qovşağının sabiq rəisi F.Seyidov və həmin birliyin baş mühasibi R.Məmmədovun cinayət işi üzrə məhkəmə prosesi başa çatıb. Hər iki şəxsə şərti cəza təyin edilib və onlar məhkəmə zalından azadlığa buraxılıb.

Həmçinin oxuyun

Rza Talıbov bu məsələyə görə Fuad Nəcəfli ilə Naxçıvanda görüşmək istəyib…

Bir neçə gün əvvəl Naxçıvan Ali Məclisində qəribə bir gərginlik yaşanıb. Muxtar respublikadakı mənbələrdən Azpolitika.info-ya …

Bir cavab yazın